Fitz > 運動 Sports > 三項鐵人 Triathlon > [Sea Sun Fire 2017] 人生的很多快樂由許多的 On9 開始

喺好耐好耐嘅無幾耐之前,有幾個運動狂熱份子因爲要練三鐵打 Full IRONMAN,每個星期都會揾一日由市區跑去南區海灘游三幾K然後再跑番市區,史稱 Super Thursday! 跑步其實幾悶,於是幾條友一路跑一路吹下水,廿幾公里容易過好多……

KI : 其實港島有幾多個沙灘呢下?
KF : 十個八個啩!
LM : 應該係十二個! 深水淺水中灣南灣舂坎角聖士提反,再落去赤柱正灘夏萍灣龜背灣石澳石澳後灘同埋大浪灣,一共十二個!
KI : 嘩! 有見識喎!
KF : 但係夏萍同石澳後灘唔可以游水,即係十個!
LM : 咁點唧,你問乜春啫,唔通您想一次過跑晒佢游晒佢咩?
KI : 咦,其實 …….. 又唔係唔得喎,好似幾好玩喎!
LM : 唔撚係嘛? 我豬噏咋喎!
KF : 咁撚爆? 不如跑晒游晒十個灘之後再跑上山頂食雪糕吖笨!?
KI : 咦? 好主意喎! 計計埋埋都係 50 公里度啫!
KF + LM : 喂屌,您認真㗎? 得唔得㗎? 會唔會太 On9 呢?
KI : 您未試過點知唔得? 如果明知一定得有乜好玩? 明知不可為而為之先係運動精神嘛! 人生難得可 On9!
KF : 您講得咁感人肺腑扣人心弦我無理由唔去啫吓嘛?
LM : 基於捨己害人嘅 On9 精神,無理由我哋幾條友自己玩㗎? 不如叫多尐朋友一齊玩? 起個乜朵好呢? 就叫番 Super Thursday?
KF : 唔得,呢個名太普通太唔 Sexy,而且星期四唔係個個可以射波去玩,但如果唔係星期四又點叫 Super Thursday?
LM : 咁叫 Super Holiday 囉?
KI : 屌! 旅行社咩?
KF : 喂,既然又海又跑又要 Keep 住團火,不如就叫 Keep 住火游跑啦?
LM : 咦,得喎! 個名有態度喎!
KI : 有態度但無乜深度,而且好似撟口摻手咗少少 ………. 喂,既然成件事咁陽光咁有活力咁有火,不如就叫 Sea Sun Fire 啦?
KF + LM : 喂屌! 得! 掂! 一於叫 Sea Sun Fire 啦! 仲要一年一次!
KI : 好!一於年年 Sea Sun Fire 將 On9 精神弘揚開去!

And after that is History!

第一年 Sea Sun Fire 跑游跑游十個海灘再跑上山頂做終點,50 公里!

第二年 Sea Sun Fire 減少兩個海灘跑長尐,最後貝璐道跑上山頂做終點,54 公里!

第三年 Sea Sun Fire 增加 off road,只游四個海灘,上完山頂落番中山公園做終點,50 公里!

嚟到今年第四年 Sea Sun Fire 2017,本人終於第一次參加! 事前已經聽 Midageon9 教主 briefing 時解說過,今年會加入大量 adventure race 元素,唔係跑下游下咁簡單,總長度亦減到四十幾公里! 但我心諗……我話晒跑過幾次全馬半馬,打過 Half 打過 Full IRONMAN ,齋水陸賽都打過幾次仲十名之內……同年齡組別,體能比上可能不足,比下大大大大大大撚把有餘,唔通怕你? 超!

事後證明,次次我心諗嘅,都瀨嘢!

晨咁早 0730 足足成百人喺小西灣公園集合,經 On9 教主 Kim sir 最後解說同影張集體照之後開始出發,經龍躍徑又行又跑好輕鬆已經去到大浪灣,游完第一轉水之後,逆走港島徑開始入林,要澗水跑引水道一路殺到去拍過百幾次戲嘅大壩底,再跑番上大路直去龜背灣,沿路有 off road 有石屎路但難度不高,而且大伙兒一齊跑有講有笑唔多辛苦,屌,SeaSunFire 唧,有幾甘吖……我又心諗!

龜背灣游完之後經過另一個 check point, 食咗隻蕉跟住就係全程第一個亮點,上孖崗! 玩慣山嘅都知道上孖崗有幾正,但叫得 SeaSunFire,”幾正” 絕對唔係要求之內,今次上孖崗係要由龜背灣上馬路紅山半島對面上護土牆鐵梯,沿引水道跟絲帶上,去到一條只係望到向上嘅石澗,左右完全無路,我望一望同行班隊友用眼神問 “路呢”? 一名非常大隻嘅隊友用眼神指引我望向石澗上樹枝嘅絲帶,然後再用溫柔嘅眼神回覆我 “路囉!” 大家面面相覷,苦笑一下 古語有云:「條路自己揀,仆街唔好喊!」於是乎各自戴上大會 “建議” 帶備嘅防滑手套,開始一步一驚心咁沿住石澗向上行,其間手,腳,口並用! 腳在走,手在爬,口在屌!

涉水爬石加上怕跣怕滑進行得好慢,好多石面都長滿青苔,大家都要小心翼翼咁行,足足且爬且屌咗個幾鐘,終於見到前面有一班人企喺上面一舊大石度,我哋正想高聲歡呼可以行番尐正常嘅路,點知上到塊大石面,前面嘅係一個水潭,根本連想涉水過去嘅石路都無! 而我左面係一大堆樹,右面係一面大約 70 幾 80 度斜嘅石崖,上面有幾條好粗攀石用嘅繩,分幾階段一路連接到二樓咁高!


我望住條繩,再望下傍邊一位應該係 support team 嘅師兄,再望下條繩,然後再望番師兄,口吐人言震晒咁問 : “ 唔撚係嘛?”,該名師兄笑笑口用充滿鼓勵 (欺騙?) 嘅眼神望住我,好輕鬆咁講一句 : “放心,好容易㗎咋!” ,大佬但我幾十歲人從來未攀過石喎? 疑似師兄再加一句 : “真係好易,好多女仔都上咗去!” 嘩! X 家 X,你出到呢招? 咁唔通我又沿番條碧濤澗番落去咩? 我望一望個山崖,深呼吸一下,同師兄苦笑咗一嘢,轉身揸實條繩咬一咬牙開始破處,處男攀石之舉! 好不容易腳都震晒爬到上去,諗住和平嘞可以行番尐正常路啦,汗都未滴完我見到一條攀山繩喺石上打橫伸過去另一個崖邊,下面就係頭先條山澗! 基於根本無得走嘅情況之下,又唯有一面狂爆粗一面戰戰兢兢游繩過去!

攀完石游完繩,以為有好日子過? 邊有咁著數吖? 之後又係上石澗,我最Q怕尐滑潺潺嘅嘢,仲要係滑潺潺嘅石頭,終於一個跣腳之下撻個四腳朝天落條澗度,起身發覺右手掌已經馬上腫咗,屁股亦隱隱作痛,但咁啱前面尐人行快咗,後面尐人行慢尐,根本無人理 Q 我,唯有咬實牙關死頂! 行咗好似一個世紀咁耐,終於遇番尐隊友,跟住絲帶指引離開條 碧濤澗,但前路並無變得順暢,跟住係一大段唔係路嘅山路,不斷跟住絲帶駁絲帶咁劈林上山,好辛苦好很倦開始想放棄!我估唔到我一直引以為傲嘅體能咁不堪一擊! 喺大家意志力最低嘅時候,忽然後面傳嚟一把沙啞而帶感染力嘅聲音大叫 : “ 點樣? 揾唔揾到路? 企歪少少,等我上嚟!” 一件赤裸上身嘅大隻佬嚇然唔知喺邊忽閃出嚟,語音未落,大家嘅體力無厘頭隨住腎上腺數飆升,一路跟住呢件唔著衫嘅中佬劈上去,終於到咗孖崗頂! 條中佬唔X使講當然就係 Sea Sun Fire 嘅始作俑者,Midageon9 教主 Kim sir!

攻完孖崗之後直落就係最大個 Check point 淺水灣,圍住五個浮台游一圈之後 Sea Sun Fire 傳統嘅叉燒飯已經等住我哋! 餓到已經前胸貼後背嘅我對完一碗叉飯對多塊 Pizza 再對多條蕉同時爭取時間用冰敷下腫到大半隻雞蛋咁嘅手掌!

休息過後,有人決定退出有人繼續死撐,包括我! 沿住淺水灣深水灣黃竹坑一路跑到去醫院傍邊轉上舊村,但我見唔到路,只係見到 support team SK 企喺個類似水渠井口嘅物體望住我哋笑,笑得好詭異! 我心下一凉,心諗 : “ 唔撚係嘛?”,SK 望住我哋笑一笑再指一指個水井起勢咁點頭! 剎那間方圓二十公尺嘅空間充滿男女性器官同粗獷性行為用語! 狂X一輪之後大家戴上頭燈爬入漆黑一片伸手不見五指嘅大水渠內,亦步亦趨慢慢走出光明,跑住又係劈林,今次直上山頂!

以為之前尐路辛苦? 原來至甘嘅留喺最後,一路打上山條路越來越唔係路,人人舉步維艱,腳開始軟背開始酸頭開始赤眼開始花,打到上金馬倫山頂見到條石柱諗住行番尐正常路,但去到條石柱先發覺舉目四望,除咗樹林同樹林就都係樹林! 我深信如果果樹可以俾錢叫到直升機嚟接我哋嘅話,我哋一定夾錢!

但事實係無吖? 放是 “硬著頭皮” 四個字又出現嘞,大伙兒休息一下出埋最後飲奶之力殺落甘道,殺上山頂,然後鼓其餘勇一直殺番去終點 招商局碼頭!大家全身發臭但興奮到不得之了,終於都完成咗呢個不可思議不足為外人道 四十幾公里歷時接近十二小時嘅艱鉅賽事!

同其他賽事唔同,Sea Sun Fire 無人會輸,每一位完賽嘅,甚至未能完賽嘅都係贏家! 因為夠膽參與呢項咁離奇艱鉅嘅活動,去試未試過嘅嘢,挑戰之前唔敢突破嘅高度,強度,難度,您已經贏咗自己!

其實好幾次經過 CP 經過馬路我都想退出想放棄,因為真係太辛苦,辛苦到罄竹難書!比起 Ironman 70.3 有過之而無不及,但我知道如果我放棄我一定後悔,而且無理由班後生仔後生女完成到我完成唔到,於是我決定死撐完成佢!

係咪好 On9? 係好 On9! 但塵世間好多嘅快樂,就係由許多 On9 開始!

共勉之!

PS . 圖片來自 Sea Sun Fire 2017 Facebook 專頁!
PS2. 以上對話內容屬實但文字經過偽文學修飾,不喜勿插!


更多:
Fitz Facebook專頁
[MidageRunner 的跑步存在主義] 我跑故我實實在在!
[Ironman Cairns 226] 黐纏戀後廢枕忘餐奮力追求嘅三個數字!
Fitz Running 跑步


文章為作者意見,不代表Fitz立場。