日前有行山人士突然遇到行雷閃電，結果有人不幸被雷擊中，送院後不治。出發行山前，故然要留意天氣情況，天氣惡劣就應該放棄計劃，不過惡劣天氣亦可話嚟就嚟，如果喺郊野地方聽到有雷聲，甚至睇到閃電，就要記住以下8個安全守則:
行山遇上行雷閃電 8個安全守則
1. 尋找人工建築物
現代石屎建築是避雷好幫手。就算係關咗門嘅石屋，都盡量走到建築物匿埋，待天氣好轉離開。
注意: 露營帳幕勉強算係人工建築，不過帳幕被雨水淋濕之後會導電，如果搭建喺平地之中，往往係雷電目標，相當危險；營友遇上行雷閃電，就應離開營幕。
2. 離開高處
身處山頂或高處，要盡快往下方走
----- 廣告 Ad -----
3. 離開樹木或電纜
雷電會尋找最高地方傳電，所以附近如有樹木或電纜，要立即離開
4. 遠離金屬物體
鐵欄、天線、水管等金屬物會吸引雷電，身上如有頸鍊、手飾亦應除下
5. 地面有水勿瞓低
雷電大多數伴隨大雨，造成地面積水。水是優良導電體，雖然有人話坐低甚至瞓低可以避開雷電，不過喺地面有水之下，如果雷電擊中附近地方，隨時亦會被波及。所以，最好方法就係身體蹲下，雙手抱頭。
6. 離開空曠地方
雷電會尋找最高嘅物體，如果身處空曠地方，人體就係最高物，所以應第一時間離開空曠地方，如果走唔甩，就盡量踎低，並將身上金屬物品除低。
7. 熄電話
漁護署指引叫大家熄電話，雖然外國有實驗指出呢個講法無根據，不過熄電話對大家無乜損失，咁就寧可小心為上
8. 離開河流海面
於溪澗河流或海上進行水上活動的話，就要第一時間上岸
「30/30守則」(30/30 Rule) 咪盡信
早年有人提出「30/30守則」(30/30 Rule)，以行雷閃電嘅時間，判斷雷電會唔會對人有危險:
----- 廣告 Ad -----
- 見到閃電後，如果少於30秒聽到雷聲，就代表有危險，要做足安全措施: 蹲下，雙手放頭。
- 睇唔到閃電，只係聽到雷聲，或閃電同雷聲嘅時間多於30秒，代表暫時安全。可迅速逃去較為安全地方，如低地、建築物
- 最後一個雷聲過咗超過30分鐘，再無行雷閃電，而天氣亦有跡象好轉 (如天變亮、風漸細)，可離開暫避之處
不過 美國國土安全局 (FEMA) 提醒國民，行雷閃電係大自然現象，本身極難捉摸，加上一般人喺30秒內根本不足以進行任何預備動作，近年「30/30守則」已受各界質疑，所以呢個方法都係聽下就算。
資料來源：美國國土安全局 (FEMA) 、漁護處
蝦里
去去，武器走！