要做大婆，不單要身材正，裝備靚，還要pose索，Frankie齊
事實是大婆只得一位，但阿二、阿三、阿四….卻無數。要上位阿二變大婆，不能等大婆變黃，世上沒有醜女人，只有懶女人。如果不自強，呢日好渺茫。
上回訪問跑山裝備店 Action Panda 其中一位老闆 Adrian，他謙稱熊貓是屋村街市，Cam2 是領匯商場，即係大婆。其實 Cam2 也經歷過板隔房的阿二日子，才走進今天在油旺區的5千呎巨舖豪宅。在商場，陽光不會普照，那些位於暗角的，不是枯萎，便在殘喘。強者的報酬和弱者的下場，是商場的日常。關愛隊在這裡沒有位置，殘酷？又談不上。
商場只能留下強者，Frankie 要加強訓練……演技 (網友話)
----- 廣告 Ad -----
Frankie 在運動裝備零售業有廿五年的工作經驗，其中7年在 Cam2 中渡過，是舖頭的店長、icon、archive 和吉祥物。農歷年前卻做了個2.99難度分嘅跳船動作，吉祥物離開 Cam2，搭上可能是轉工的尾班船，任另一新進跑鞋代理的品牌經理，再戰江湖。老套講句，天下沒有不完的劇集。Frankie 看盡跑界裝備的潮起潮落，平行宇宙同時間亦穿越大時代的風雲色變。
唔好誤會，唔係上柏架山頂做訪問咁熱血，Frankie 搞試鞋活動，佢嚟收鞋。乜嘢牌子？相中尋
睇招紙搵工的歲月
「點解會入行？」
「我中五畢業就出來搵工，廿幾年前未有 JobsDB，有日行過洛克道，見到間舖頭貼左張招紙請 sales，是 Adidas 加盟店，於是膽粗粗入去見，從此在運動 gear 舖做左25年。」Frankie 可能是睇招紙搵工的最後一代，跟著的世界萬物，都是在條線上面發生。
「之後轉去 i.t 賣 fashion，做左兩年，有人搵我去波鞋街賣波鞋，果時自由行啱啱開始，大批內地人嚟掃貨，可以一買就買10對，仲唔洗點俾折。」自由行對香港的文化是衝擊，但對零售業卻是沖喜。
跟住轉去太古集團嘅馬拉松。因為玩毅行者，開始認識一些山界朋友，毅行隊友知道 Blue Mountain 嘅 Paul sir 想搵人幫手開舖賣越野跑裝備，就介紹我去做，間舖係自己買。果時我已36、7多歲，都想試下轉跑道。」
Frankie 推介環四姑娘山超級越野跑，聞說異常艱辛，卻十分精彩，正好影照做了廿五年零售工作的閱歷，和心中的一團火
「做開大集團，唔係點需要聯系供應商。而家要主動搵批發商，傾左幾個牌子，好似 UD、Overstims、那時雄霸市場嘅 Salomon、剛冒起嘅 Hoka、和已經絕了跡的 Inov8 等等。果時店舖爭沒那麼大，Action Panda 啱啱開，主要係 All Weather (現已結束)、Overlander、Reecho等。」
----- 廣告 Ad -----
「當年 Blue Mountain 做左好多創舉，係第一間舖頭搞比賽同訓練班，記得第一班係聰sir教。」零售店引入周邊活動作推廣，Frankie 是大旗手之一。不過他做了兩年，連人帶經驗轉到 Cam2。
「果時 Cam2 在旺角賣開相機，面對競爭超激烈的市場 (想像下你的對手是百老匯、豐澤、大成/有成等巨人)。老闆 Toby自己玩三鐵，覺得市場上賣裝備舖頭唔係咁理想，有意思自己搞，搵我過去幫手。那時 Cam2 在旺角友誠商業中心，鎅了幾百呎用來陳列貨品。」記得第一次上 Cam2，9樓lift門打開，滿眼盡是相機鏡頭，還以為去錯樓層，越野裝備明顯是阿二。
上Cam2有水吹
Frankie 擅長多生事端，搞比賽和推廣。記得2018年 Cam2 搞首屆的Kill標越野賽，是我早期參與的山賽之一。著住對鎖記用來行山的工業安全鞋 (型號3D什麼的，鞋頭同鞋底都好硬) 落場跑23K。事後上 Cam2 問 sales 大通跑山要買什麼鞋。佢心諗：阿叔，你著乜嘢鞋有分別咩？
Frankie 又引進幾位熱血又跑得又吹得嘅 sales，包括大細通、Plato、占士、偉雄促銷，顧客購物之餘，還可以吹水攞 advice，呻下中伏嘅賽事、山界是是非非等，對精神健康十分有利。我策略性地同大通混熟，他以為我有跑山熱誠，我未買夠數也把我成為 Super VIP (享更高折扣)，可見他入世未深。不過好感激他啟蒙我的越野跑知識，Frankie 在這幾百呎劏房拓展了一個山界小宇宙和實體的社交平台。
Plato(左上一)、James(右上一)，左下：大通(你想點)、偉雄、鐵堅，這些名字，明就明，唔明就係未去過友誠
友誠的歲月，除了賣鞋，還要賣chok。右邊位同事唔知去左邊？(代女讀者問)
劏房戶上樓5千呢豪宅
Cam2 運動裝備部已擴展至半間舖，阿二開始發動變大婆的革命。不過人生要有點意思，總要經歷下風浪，社會運動是第一個浪:「我哋試個幾次要突然閂門，生意受影響，到了後期才平穩下來。」
踫巧友誠商業中心的租約屆滿:「間舖都開始殘，有兩個可能，一是大裝修，但要停業幾個月，一是搬舖。我哋選擇後者，要搵五千呎、有停車場的樓上舖。朗豪坊同家樂坊符合條件，租金相若，但朗豪坊要在寫字樓那邊搭lift 上。最後揀左家樂坊，當時家樂坊還未是國內遊客追捧的戶外裝備勝地，後期才常被小紅書點石成金。」
2019年11月22日搬離開了做了十多年的友誠大廈，往另一條跑道起飛。原本細舖搬大舖是喜事，豈料又遇上世紀疫情:「初時冇人出街，落街跑步都要戴住口罩，生意跌落谷底。」整個市場都十分被動，要隨著變化多端的疫情和政府政策起舞。世界停擺，前景暗淡，連臨死前隧道前面那點光都看不見，大家都等著拔喉的日子到臨。
搞旺左孖崗山
不久情況慢慢逆轉，很多國家如日本、韓國都經歷過封關，港人不能「回鄉」。造就了一股全城行山和 virtual run 熱潮:「我哋係搞虛擬賽先驅，2021嘅 Compressport Virtual Trail Hong Kong (分11K單挑組和22K環迴組)，有三千幾四千人報名。」弄到攞你命1000級的孖崗山一帶每天都人來人往，少見港人咁熱血。不過亦因為反應太熱烈而出事:「活動俾人投訴，我哋被罰錢。」明白，如果正式申請，成功機會接近零 (戴頭盔先，我冇話政府唔啱)。
----- 廣告 Ad -----
「謝謝謝」，咪以為戴左口罩就唔認得你 (好聽話，出發前戴住口罩)
三位，留番啲機會俾我哋啲後生仔好喎，Frankie又係，點可以俾佢哋報名
幸好財爺大愛，出手闊綽派發每名市民10,000元消費券。大家出完手機，仲有少少錢剩去入對跑鞋。開創全城行山嘅黃金歲月，令生意爆升，不少 gear 舖小店借勢成立。「果時你只要有貨就有生意，好賣到不得了。」
大婆阿二玩音樂椅
不過到了疫情未，日本韓國重新開舖，港人報復式旅遊，又北上消費，加上移民潮，少了很多運動客。銷售曲線又向下。面對浪奔浪流，去年有數間老店和新店陸續結業、轉型或收縮。
Frankie 舉了一間已結業的裝備老店為例，起初因價錢平貨品齊是市場大佬之一，「奈何陳列雜亂，通道超窄。千多元嘅鞋混於一堆雜物中，想搵張櫈試鞋都難，公眾假期又不開舖，因老細自己有行山活動。咁樣經營好難唔俾市場淘汰。」我初玩越野跑都是這間舖的常客，星期日想去買嘢，要踫運氣打電話問下開唔開舖。
Cam2 另一成為市場大婆嘅因素係專注:「老闆一直堅持核心業務是越野同路跑嘅裝備，我哋冇因疫情時多左人去 camping 就賣露營用品，亦冇因天氣凍賣羽絨。我哋引進牌子方面十分專注，例如果時做 Hoka，Cam2 要做到全港最多貨，有最多嘅款同顏色，呎碼齊，顧客上嚟，由頭至腳，可以買齊所需。」
除了賣 gear，舖頭也是搞 event 和 marketing的舞台 (2020)
「這是老闆成功嘅地方，但亦會因太專注，錯過了一些好有市場潛力嘅牌子，例如N字鞋，如果第一水就食埋已可以賺不少。但當時我哋都認為唔係咁得。不過做生意就係咁，唔可以賺盡，唔入咪就唔會蝕囉。」
Frankie 與 Cam2 老闆 Toby (中)合作多年，做生意之餘，也攜手把越野跑發光發亮
「Cam2 亦因舖大闊落，地點靚，能夠提供好嘅購物經驗。好多內地客好鍾意去家樂坊掃樓，由18樓一路掃到落嚟 Cam2。另外我哋搞比賽、訪問、搵跑界KOL同跑星做宣傳同代言，效果都好理想，顧客層面擴闊好多。」
搬舖後面積大了許多，可以搞不同類型活動，我有幸在Cam2聯同教練KFC做過兩次專訪主持，更難得與3粒巨星坐定定作世紀對話
----- 廣告 Ad -----
「Action Panda 話唔做代理係因為唔想推貨時失去客觀性，但 Cam2 有做，你點睇？」
「基本上我同意呢個睇法，不過做代理是純商業考慮，收入亦會相差好大。」Cam2 是一盤生意，亦跟商業的邏輯和模式去辦事，這不是對與錯的問題 (又要戴頭盔)，大家定位不同，OKOK，一人少句啦。
跳船的決定
「你而家轉為品牌經理，比起係舖面，企番後少少。點樣做呢個決定？」
「首先我好認同呢個品牌嘅價值觀和理念(明，見工時必講對白)，而且我累積左咁多年前線經驗，可以幫有引入我哋品牌貨品嘅前線同事，學識點樣sell得好啲。始終而家年紀大左，唔可以再企到咁前，如果係5、60歲人哋都唔要你賣鞋。」又要抄低先，「始終而家年紀大左」呢句好萬用，後續句可以係 – 我唔記得左添、我要早啲走、我唔想洗碗….。
「賣跑鞋，睇我表現啦!」這位跳了船的前店長，拔劍出鞘，江湖是否從此多事?
「而家搞好多推廣活動，例如呢兩日都有試鞋活動。山鞋較少搞呢類活動。而且我哋對N鞋壽命有過千K，可以隨便試。(過千K？) 公司搵左511個唔同地區唔同性別嘅跑手去試，平均可以著到1350公里，Kilian自己著番同一款鞋，著左1200公里，聰sir試過，佢著左2000公里至要退役。」弊，唔記得叫「唔好」、「停」，俾前店長偷襲了個廣告位，好嘢。
「N品牌好推動環保和減炭排放，包裝用嘅膠袋浸係熱水會溶解，可以係廁所沖走。膠袋係香港牌子，以 packing 計成本好貴。我哋有對鞋可以更換中底，以配合訓練、比賽或者出街時的唔同需要。背後理念是希望你唔需要買咁多對鞋，好環保。」好啦，要收費啦 (利申，我冇收過該公司和 Frankie 嘅任何利益。)
今個月的首爾馬，大PB的 Frankie 出post說過程中不停同自己講:『要跑落去，唔好停!』我哋亦咁樣向佢講
「香港嘅消費者好多都係追款，或者聽朋友同星級跑手推介，而唔係咁了解自己需要啲乜嘢。對品牌忠誠度較低，我見之前好多一度好流行嘅品牌好快都冇晒影。另一方面，由於香港市場細，好多歐洲流行品牌未必會引入香港，或者只佔好細嘅市場比例。」香港消費者是款式敏感大於價錢敏感，優質客 (態度除外)。
祝願
Frankie 上了尾班船，前面海闊天空，轉千灣轉千灘，無限可能，可以是輕舟已過萬重山，也可以是萬里滔滔江水永不休。但最近見 Frankie 的首爾馬快了38分鐘，超加大碼 PB，跑進330揮手區 (仲要話唔多滿意，提防俾人推落樓)。祝願身在廚房的 Frankie，能在另一高峰，著住對好耐用嘅N鞋，笑看風雲過！
沒有肥嘅男人，只有懶嘅男人，Frankie可以出庭作控方證人 (士林越野2024)
