大家咪噓住，標題略有浮誇，不過今次介紹呢篇潮文又真係幾值得大家睇睇。
先講講我心目中嘅潮文。潮文就係唔係太知道文章嘅出處，標題嘩眾取寵。內容方面，資料又不盡不實，缺乏證據，而最大特點就係亂咁引用名人例子。今次介紹呢篇潮文有齊以上特點，但唔同嘅係，佢講嘅嘢又真係幾有道理。
呢篇潮文叫《原來我們的都錯了！ 科學家揭示真正讓人恢復精力的『休息模式』》，內容講所謂「休息」，並一定係上床訓覺，有時訓覺都未必有用。文章話，如果唔係因為身體疲勞，而係腦力使用過度，訓覺並唔可令人真正休息。
佢提出嘅理據，我嘗試整理一下：
- 如果因為工作等腦力上疲勞，而採取「靜止」方法去休息（如訓覺），咁心理興奮嘅狀態係唔可以得到紓緩。
- 要令心理興奮狀態降低，可以採用「轉移方法」，將腦部工作區域由A轉到B。即係話，如果你喺公司做嘢做到好攰，畀你即刻返屋企上床訓覺都無用，你可能需要做下其他活動，如做運動、做下家務、煮餐飯，令心情得到紓緩。
- 人感覺嘅疲勞，好多時並唔屬於身體，而係心態上對事嘅疲累。即係話，人無心機做嘢就會覺得攰。所以，真係休息就係要提升自己對事嘅熱誠。方法係發掘多啲自己興趣，結交多啲朋友，好好利用每一日。
佢呢個結論雖然有啲夾硬，但我就覺得極為正面，超有鼓勵性。所以，呢篇文好睇嘅地方，並唔係佢講嘅嘢有無科學性（佢引用盧梭等名人例子，就真係唔知真定假。），而係佢用一篇健康小百科嘅包裝，講緊人生大道理。
總之，唔好再做一條成話好攰，而走去蒙頭大睡，有得玩都唔玩嘅大懶蟲囉。
----- 廣告 Ad -----
更多:
夏天運動會洩咗度氣 中醫話嘅
10個暴曬急救的DOs & DON’Ts
Fitz Life 生活
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。