----- 廣告 Ad -----
夏天熱死辣辣,鍾意跑步嘅筆者我都唔係日日跑嘅,浸吓水都係一個唔錯嘅選擇,29号就去咗一個主題水上樂園試玩活動,詳細查詢資料就唔多講,可以自己上網揾資料,今篇著重分享試玩過程~
朝早九點九在大學站上大會安排接駁旅遊巴士,準時開車,眨吓眼就到,一落車大會人員就安排我地去 Locker 放置私人物品,每人一條電子感應手帶,唔係插鎖匙果啲咁老土,Locker Size 夠放大背包有餘,旁邊仲有一排人咁高類似試身室的隔格,方便換衫。
户外主題公園
隨即大會人員帶我們約三十人,到室外參觀主題公園,第一個景點係叫烈陽號甲板,有幾個海賊王主角1:1嘅人形硬膠公仔供拍照,以欣賞角度,我就覺得造得幾靚,但我其實係對海賊王這漫畫零認知…
----- 廣告 Ad -----
跟住附近有幾個攤位遊戲,其實都係果啲嘢,扔吓嘢拋吓嘢果啲,但係啲公仔就幾靚,而且依種遊戲嘅魔力係,當你唔忿氣或側邊有女仔望住嘅時候,就想表現自己不停咁玩。側邊草地仲會有迪士尼式工作人員,穿上海賊王角色蛤蜊衣周圍走,依啲就啱哂細路,我望咗好耐,都發現唔到佢地用邊個窿睇嘢,同埋三十幾度我心諗會唔會中暑。最後睇埋掛响鐵架上面果個超巨型路飛裝置,就走返上樓去下一個景點~
室內主題展館
行幾极樓梯上到一樓,有個空中花園觀景台,可以望到出面全個白鷺湖,左邊風景係水上樂園,右邊就係整個主題公園,空中花園依度仲有一啲俾小朋友玩嘅番梘水吹波波,如果閣下女朋友係扮萌系少女,佢都啱玩,懒有童真玩吓d飄嚟飄去嘅波波,然後叫你影佢。離開空中花園,行入室内展館終於有冷氣嘆吓,啲冷氣都叫幾恆,首先會有精品區,啲嘢手工幾靚,例如公仔、草帽、T恤及紀念品等等,價錢見人見智。然後側邊一條差不多望唔到盡頭嘅寬敞走廊,就係展覽館,據講好多展示品仲係第一次在港作公開展覽,包括1:1人偶及經典場面佈置等等。
水上競技樂園
終於去到戲肉,當然就係落水,首先返去Locker放低部電話,補吓啲防曬就行去水上樂園區,首先入口處工作人員會為大家穿上救生衣,然後就沿條橋行出去,臨落水有鞋架,可放低拖鞋,跳落水游5,6秒就可以爬上競技區,其實整個競技區可以話係一眼望哂,起初筆者我覺得依啲實屬小兒科,細路仔玩意遮,點知玩落去先知,少年你實在太年輕了,真係好鬼攰,有啲關卡難仲幾高,平衡力胆色力量決一不可~
----- 廣告 Ad -----
餐廳
玩完最緊要係食,尤其係落完水之後,果種肚餓就好似飢民一樣,今次旅程最大驚喜是餐廳的小食水準,筆者我好大胆講句,除非你係鐘意食十二度燶味果啲幫派,依度啲小食真係少年蔡瀾都話無得彈,我就好欣賞炭燒美國蠔同埋日式香草黑豚熱狗~
最後响更衣室咪咪麼麼沖個涼 (洗頭水沖涼液自備),坐大會旅遊巴就落返去大學站~
整體嚟講,其實無論你係唔係海賊王粉絲,想夏天有個節目玩吓水嘅,依個係一個唔錯嘅選擇,可以一去~
購票專頁 (樂園最高入場人數: 每節限定150人入場)
陸上樂園 (海賊王) Facebook 專頁
水上樂園(CORE) Facebook 專頁
----- 廣告 Ad -----
Fitz 連結: https://fitz.hk/?p=98300
更多:
Fitz Facebook專頁
[越野跑鞋] 實測 Brooks Caldera2
[搶閘先試Brooks] 最新緩震技術鞋款 Levitate
[跑鞋實試] Hoka OneOne Tracer2
[越野跑訓練鞋] 實測 Salomon Sense Pro Max
[越野跑鞋] 評測 Hoka Speedgoat 2
官塘朝偉@Fitz
Fitz Running 跑步