做運動對婚姻生活的10大好處

英國傳媒引述美國耶魯大學嘅研究話，丈夫如果有運動習慣的話，會增進夫婦之間感情，令婚姻生活更美滿。

簡單講，丈夫持續運動，身體因受安多酚嘅影響，心情會好，會令妻子都同樣開心。不過，研究話妻子做運動，係對婚姻生活無幫助咁話。(資料：英國每日郵報)

我唔敢話自己係碧咸，不過每日郵報揀咗呢張相做呢單新聞嘅主題圖片。講婚姻生活，又點解剩係著條底褲？

當然，如果講婚姻美滿，我應該點都唔及我哋Blogger李國泉兄，佢嘅文章成日出現佢一家三口Sweet Sweet嘅合照。

不過，我結婚六年，都可以用過來人身份講下做運動對婚姻生活的好處，一定係唔剩係得安多酚囉。

1. 你因為要做運動，雙方多咗獨處時間，減少磨擦
2. 老婆少咗啲理由去鬧你立亂買嘢（「我一個禮拜跑成50K，對鞋好快爛呀！」）
3. 食豆腐火腩飯都唔會畀人鬧（「陣間跑番10K乜都無晒啦！」— 前題係，你個Runkeeper唔好Share畀老婆睇。)
4. 星期日可以豁免唔使陪佢返外家（「你知啦，星期日好多比賽丫嘛。」）
5. 跑步行山令你認識更多郊野地方，一家大細放假都可以多啲地方去玩
6. 夫婦間嘅話題唔再局限喺工作、兒女、家事，話題多咗，感情自然增加
7. 兒女會因為你做運動而有樣學樣，小朋友乖啲，夫婦間又少咗一樣嘢有爭執啦(我囡囡就話因為佢老豆有跑步行山，話會專心啲上體育堂喎)
8. 你因為要做運動，就算做少咗家頭細務，老婆都可以容忍
9. 你因為做運動要沖涼，老婆又少咗因為你唔沖涼上床訓而鬧你
10. 你參加比賽，老婆帶埋仔女嚟打氣，咁就多咗一樣家庭活動嘞

結咗婚嘅朋友，仲唔快啲換對跑鞋落街番轉？

更多：
Fitz Facebook 專頁
第26項重拾跑步樂趣-生理篇
25個重拾跑步樂趣的方法
Fitz Sports 運動