近排以下呢兩張圖喺網絡上瘋傳：
上面呢張圖嘅源頭已經查唔到（繁體字+少女體，估計係台灣製作），叫做「停止運動後身體的可怕變化」。踏入五六月，天氣唔係落大雨，就係曬到似焗爐，對鍾意做戶外活動嘅朋友，真係莫大挑戰。而呢張圖，確係可以激勵大家，無論點辛苦都好，都要Keep住鍛練！
至於上面呢幅，就係天文台提醒市民，喺酷熱天氣之下，要提防中暑。大家夏天做運動，要睇溫度之餘，仲要留意濕度。兩樣加埋，就可以得出酷熱指數，即係身體實際感受到溫度。而呢個指數，可直接影響身體，身體抵受唔到，會出現熱衰竭甚至中暑。
沙灘排球都好適合夏天玩
----- 廣告 Ad -----
Fitz Blogger李照邦喺佢嘅大作《烈焰神功》，固然提供超實用嘅酷熱練跑心法畀大家。不過如果真係頂唔順喺烈日之下練跑，只要識變通，其實仲有好多方法做運動：
- 游水：除咗去游池操水，出海玩滑水、滑浪，都一樣可以鍛鍊身體
- 去健身室：單車、跑步機、舉鐵……有冷氣無太陽，你無理由拒絕啩
- 開拓新興趣：趁住暑假玩下啲平時少玩嘅運動。例如打羽毛球、籃球，再唔係一個人打壁球，都係喺冷氣地方進行。至於掟鏢、桌球、圍棋，雖然都係運動，但係運動量又會唔會少咗啲？
- 行山／跑山：郊外山路多樹木，相對跑街氣溫會較低。
- 家中做Workout：唔使出街之餘，又可以健身，仲想點？
你咪睇滑浪好似就咁企定定，其實運動量都好大。
海邊打羽毛波？都好呃LIKE喎，一開波個波都唔知吹咗去邊。
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」