熊倪
四年一度嘅體壇盛事奧林匹克運動會已於日前啟幕，並且首次由南美洲嘅國家巴西主辦。舉行揭幕禮嘅 Maracana Stadium，自己曾經響 2010 年嘅巴西之旅亦有到遊過。雖然今年未能親身到場一睹開幕盛事，但總算是見識過呢個 「足球聖殿」之宏偉氣勢。
多年前曾踏足「足球聖殿」Maracana Stadium 睇過一場足球聯賽, 當時已經覺得呢個場館十分宏偉
第一次睇奧運，其實係 1988 年嘅事，而第一個睇嘅比賽項目就係男子十米高台跳水。當時十四歲嘅中國運動員熊倪力併美國跳水王子盧根尼斯，鬥得相當難分難解。由於是次比賽為盧根尼斯退役戰，最後響有評判偏幫之嫌下由盧根尼斯勝出。當時真係睇到咬牙切齒，心中憤憤不平，十分替熊倪不值。及後中國奧運代表團曾到訪香港，自己更專情手摺左一條星星鍊送比熊倪，鼓勵佢要振作，唔好因為一次嘅經歷而洩氣及放棄。
當年小小心意贈送失意嘅熊倪，希望佢不要洩氣 (圖為筆者所攝)
然而運動員能否響比賽上奪魁，豈止單憑實力？天時、地利、人和等等亦是相當重要；錯失一次機會，亦不代表下次就能捲土重來。尤其去到世界級嘅賽事，講求嘅是爭分奪千萬分之一秒；稍一失誤，盡管只是失之毫釐，已可以差之千里。結果熊倪在 1992 年巴塞運奧仍未能奪得金牌，更被師弟孫淑偉追過嬴得當年十米高台冠軍，熊倪就只得到第三。
----- 廣告 Ad -----
盧根尼斯
以前年代嘅運動員，運動壽命很短暫，運動表現及能力亦會隨著年紀增長而下降；眼見熊倪嘅時間越來越少，心中少不免替佢心急。幸好1996年，熊倪轉戰 3 米彈板後終於一嚐奧運奪冠滋味，4 年後嘅悉尼奧運更一口氣摘下3 米單人及雙人男子彈板兩塊金牌；雖然係遲來嘅春天，但總算為熊倪運動生命抹去遺憾，亦為佢嘅跳水生涯劃上完美嘅句號。
見倒熊倪終於能夠贏得金牌，實在替佢高興（網上圖片）
熊倪嘅故事，以運動員嚟講，其實已經算是相當圓滿。雖然飽歷障礙、挫折，最終總算能站過奧運頒獎台嘅最高點。然而有無數嘅運動員，只能匆匆地成為奧運嘅過客，名字可以係完全無人記得起；有些甚至窮一生嘅能力，都未能拿到奧運入場卷。
儘管如此，奧運這個舞台，依然係運動員畢生追求嘅夢想。那管一生只是能夠參與一次半次，只要能夠在奧運競賽場地留過足印，與其他國家選手一起共舞，已經是不枉此生。 每一個運動員嘅背後，都帶住一份拚搏精神，背負不同嘅奮鬥故事。現在比賽正進行得如火如荼，期待看到每一個運動員都能夠好好發揮，綻放光芒，為佢地嘅運動歷程留下美麗印記。
----- 廣告 Ad -----
更多：
Fitz.hk Facebook專頁
[撒哈拉超馬] 第一日: 34公里的挑戰
[Translantau 100] 義工的使命
張思縈@Fitz.hk
Fitz Hiking 行山
