女孩子一刻感動值幾錢？一條二千幾蚊嘅Pandora？一餐幾千蚊嘅燭光晚餐？定係幾萬蚊嘅鑽戒？
Nike話你知，女孩子感動自己嘅一刻係可以值廿億美金。Bloomberg彭博估算，Nike女裝銷售總額，嚟緊日子嘅增長會快過男裝，去到2017年嘅總額，由現時嘅50億美金，提升至70億。
唔怪得之，佢哋越嚟越多女孩子廣告，甚至係前所未有咁多。嚟緊月尾，佢哋仲會喺上海開設全球第二間全女裝旗艦店添（第一間喺美國加州）。
唔再以專業運動員做生招牌，Nike近年嘅宣傳攻勢特別針對女孩子。無論你係做咩運動、初哥定係老手，品牌嘅廣告都鼓勵你去挑戰自己，走出comfort zone。
挑戰到自己，真係幾感動。你睇下上次Nike香港女子10Km同由佢哋贊助嘅名古屋女子馬拉松，參加得嘅女孩子個個都冧冧豬咁完成，就知Nike嘅招數中哂女孩子嘅心態。
目前為止，單係個Nike+ app，已經吸引咗超過7千萬女孩子開戶使用，佔總用量超話54%！個數仲要一直上升緊，話唔定個銷售目標唔駛到2017已經可以實到。
所以話，女人錢真係易賺啲。
----- 廣告 Ad -----
參考資料：Bloomberg, Business Insider
更多：
Under Armour 37億買起你嘅卡路里
厚墊跑鞋有Market
Fitz裝備文章
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」