[郁民轉載] 關於TVB唔直播兩位香港劍擊代表二三事

按：奧運第一及第二日比賽，香港兩劍擊小將江旻憓及張家朗，在奧運贏得香港劍擊史上第一場勝仗，晉級16強。好可惜，獨家喺香港轉播奧運的TVB，不是播頒獎禮，就是播電視劇。

而當時竟然有一個Facebook專頁，比任何一個本地體育媒體最快報道兩場比賽嘅消息，這個就是貨客車服務CALL4VAN。而我們亦得益於他們，可以緊貼追踪劍擊的消息。

以下這篇文章，原載於CALL4VAN專頁，當中很多精句，亦提出了不少香港人的疑問，值得一讀！

[關於TVB唔直播兩位香港劍擊代表二三事。]

各位都估到，我同劍擊有少少淵源，所以呢兩日都係講得比較多呢個奧運項目嘅消息。

我記得當年喺澳洲讀書時，無論係咩項目，一有國家隊選手出場，全世界就會乜都唔做，先生即刻唔講書、返緊工嘅即刻停手頭工作，全部人望著電視。

相對新加坡投放資源更多，但連出賽資格都冇，香港劍擊最top嘅全職運動員得一萬鬆啲蚊資助，大部份出外比賽都要自費，「竟然」都可以有三位入到奧運，唔係好難能可貴咩？

噉點解咁難得入到32強，TVB依然寧願播其他嘢，要出線先有直播，都唔肯支持吓香港運動員？咁貴買個轉播權返嚟，我已經唔會期望好似澳洲咁樣有anti-siphoning law硬性規定免費播重要賽事，但原來就算畀錢買個「賣TV縮爬」，一樣冇得睇香港隊嘅直播，結果好似我噉要「翻牆」去美國，再借朋友嘅美國有線電視account先可以睇到。呢個電視台，好唔好意思叫做香港人嘅電視台？

啱啱有朋友講起，江忞懿喺100米蛙式熱身賽尾二返嚟，發揮唔到水平。但唔好話排尾二，就算慢兩個塘都一定要睇，一定要撐，因為佢地就係代表緊香港，同喜同悲，榮辱與共。

香港人，撐香港隊，就係咁簡單。

P.S. 星期三10號香港時間20:10，女子花劍連寶香迎戰意大利冠軍，撞正黃金時間，我諗播嘅機會都渺茫，我會用自己方式，搵地方同朋友一齊睇，一齊撐香港國家隊。

WE ARE HONG KONG.

原post：