昨日，為數約20人的香港傳媒訪問了單車隊。李慧詩 Sarah Lee Wai Sze 跟我們詳談，由天光談到天黑。我真的希望，所有香港人都能在場。整個過程，笑中有淚，淚中又笑，「阿詩」當上導遊，帶我們窺探她的內心世界。我能做的不多，現以自己方式，最原始的直接引述行家們的問題與答案
盡做，以下先分享第一條。
背景：李慧詩自今年一月亞洲賽後，已經沒有回家。
記者：最想同屋企人講d咩？
----- 廣告 Ad -----
李慧詩：「最想講呀……（諗左10秒）我阿媽成日都同我講話：『今屆如果攞到獎就退役啦！（大家都笑）唔好再踩喇，咁辛苦』，但係我自己真係……一方面我有啲唔捨得喇，另一方面，errr，我覺得成個運動員生涯改變嘅，唔單止係我個人，仲有我同我屋企人嘅關係。Errrr，由我一開始出去（踩車）嘅時候，我真係唔係好同屋企人溝通到，兩句就嗌交，成日鬧阿媽，阿爸阿媽都成日鬧嘅，errrm，啫係，會覺得家姐……佢好叻架嘛咁，家姐讀書，家姐讀書咁叻，啫係我比落去，就好差咁樣囉。」
「但係，慢慢我阿媽，知道我係可以喺運動成績度攞到獎，佢又慢慢開始了解運動員。之後佢就會話：『唔好騷擾阿詩喇，errr，得架喇，我地喺側邊睇吓新聞喇』，啫係佢哋係從新聞知道我（嘅消息）好多時候。甚至，我唔去開幕禮，佢都唔知，佢哋會留守喺個電視度睇。嗰時我已經無開電話，但係我唔記得同佢哋講，跟住佢哋睇開幕禮又無見到我，跟住我就覺得『哎呀！點解我無同佢哋講呢？』我後尾完晒（比賽），睇翻（訊息）我先知。啫係我有好多野，無同佢哋交代，但佢哋都會好諒解我，errr，到到尋日，啫係……（沙啞）啫係……完左比賽呢，咁即係打翻屋企，佢哋第一時間會聽，同埋……（流淚）你哋又偷影我～（大家大笑）同埋佢哋第一時間會聽，聽到佢哋把聲係好舒服嘅。有時我覺得，我好想喊，唔係因為輸嗰啲㗎，啫係可能我真係好掛住屋企人，好耐無見，奧運前我已經係好掛住佢哋。」
記者：「係咪有種打完仗返屋企，想攬住佢哋嘅感覺？」
李慧詩：「Errrr，我哋無咁open架（大家大笑，有人搞gag話試一試喇，人一世物一世）。我地屋企好傳統架（咁握吓手喇！李小姐你好，我係你老豆！），我地唔會講呢d，即係唔會話『媽咪我愛你！』呢d啦，又唔會抱呀、鍚呀呢d～」
My commentary
袁志偉 (按：無綫新聞部阿頭)，你現在應該明白，為何體育新聞是必須、是不可或缺的。李慧詩：「媽媽好多時候係從新聞知道我嘅消息。」
原載於 丹尼爾 vs 陳恩能 Facebook專頁，獲作者授權轉載。
更多：
Fitz.hk Facebook專頁
[丹尼爾里約直擊] 李慧詩回家了(下)
有一種感受叫心痛 (記李慧詩失落獎牌)
[里約奧運] 女子馬拉松 姚潔貞名列39 東亞第5
[里約奧運] 男女子馬拉松賽道大拆解
[里約奧運] 水神菲比斯 一日食12,000卡路里!
[一個傳奇的誕生] 丹尼爾 vs 陳恩能 愛做有意義的事
----- 廣告 Ad -----
