[再次滾動吧!] 征服台灣武嶺之HeHe飯糰

Ronald (左) 及城城

征服台灣武嶺，過程一點也不輕鬆，其中一個原因是上年環台返黎後飲食習慣開始慢慢放縱起來，身形亦慢慢打回原形！練習也放鬆了下來，想踩先踩，早前寒流來襲的天氣更加不用說，加上新春佳節吃過不停！身體早已回復當年本色！一層又一層嘅脂肪包圍住我嘅肚腩。岀發之前都冇乜做過Research，所有住宿機票路程都係靠隊友Ronald幫我搞掂哂，所以今次都唔知邊度黎嘅勇氣驅使我夠膽挑戰今次既旅程。

4/3清晨6:00，很早就起床了，不敢怠慢！因為事前已經知道將會係好辛苦嘅一日！還記得臨瞓之前仲係度諗應該用咩心態去面對，去征服⋯⋯其實係緊張！ 天未光就去咗便利店食個早餐就從埔里民宿出發喇。早餐當然係滾動吧❗頭號美食⋯⋯飯團！食過返唔到轉頭！

而印象中我最深刻嘅有幾個地方/時刻。

1. 好快到達”人止關” (而當初我都唔知道係咩黎同埋有幾高😂）感覺好似好快到咁，乜咁快到第一個影相地方

2. 去到清境，瑞士小花園，休息一會再岀發既時候大腿肌肉已經發出警示。媽呀⋯⋯才快到一半！感覺係體力仲有貨，但大腿已經7788⋯

3. 去到農場，見到好多羊呀，旅客呀⋯但我身體已經跌watt跌得好利害了。我知道仲有好長嘅路要行，係冇得選擇嘅情況之下我食咗人生第一包Power Gel.一個字：冇水根本吞唔到落去！再起行的時候專注力去晒自己個身體度，因為好想感受下要過幾耐時間先會發揮功效😅同埋可以維持幾耐⋯⋯印象中應該踩咗10-15分鐘，我覺得我精神上開始有改變，慢慢越來越冇覺得咁容易攰。至於維持咗幾耐我就冇去留意啦，因為已經踩到麻木了⋯⋯

4. 去到大概¾嘅行程，第二包Power Gel都食完了，帶兩包真係高估咗自己！基本上我同Ronald早時已經前後腳踩緊了，身體已經透支了，意志消沈⋯⋯有幾下停低休息緊嘅時候我問自己究竟做唔做到？好似思覺失調咁一路踩車一路同自己講野。內容大致係：你唔係而家先嚟放棄呀？而家落返去死緊架喎！一係依家上埋去，如果唔係唔知幾時先有下次，或者永遠都唔會有下次！
但係當上到咁高，又冇力落山，又冇力踩既時候，嗰種掙扎矛盾⋯⋯

5. 同Ronald分享埋最後一個飯團，停低咗休息，係！冇錯！又休息！基本上後段休息嘅次數係越來越多！等咗陣見到Ronald都踩到上黎，佢問我：喂，您係咪仲有一個飯團呀？喺嗰陣時我哋就分享埋我地最後一件我稱佢為能量補給！人哋一條底褲兩份著，我哋一個飯團兩份食！食完人生最感動既一個飯團之後，大家互相鼓勵下就繼續啦⋯接下來的路程除咗半樽水外我已經冇晒補給！

6. 望見傳說中嘅髮夾彎，雖然途中已經踩過好多個髮夾彎，因為我知道呢個係最後一個，還記得早少少時間Ronald同我講過話：仲有差唔多9K，踩埋呢條直路(即係相對少轉彎嘅斜路😑)，再上埋幾個髮夾彎就到啦！所以見到心情難免感動。但同時間我心裡忍唔住講：唔L係呀？仲有咁多⋯不過去到嗰啲位都係嗰句：都上到嚟呢度啦唔通你落返去咩！行程繼續⋯⋯

7. 上到太魯閣國家公園碑，上到去果一刻我已經講唔到野，因為條氣太喘，氣溫已經降到十度以下，Ronald話係高山反應，總之一踩條氣就喘，真係好似冇氧氣咁，有幾次休息緊仲差啲訓鬼著咗⋯同埋第一次睇清楚感受四周風景，原來已經喺雲層上面！感動！不過仲未到，不過已經望見家鄉啦！仲記得上到去有幾個大媽捉住我影相，影相咪影相囉！做乜影相要將你隻手放喺我隻手手上面！

8. 山上既補給-昆明休息亭！影完相之後見到有熱食！即刻諗起賭俠大戰拉斯維加斯其中一段！拖着疲累嘅身軀入去大肆食嘢！順便處理一下我地落山既安排！的士台話因為冇詳細地址，叫我地搵派出所😑

Thank God 最後都叫到車！竟然係一個三唔識七既呀叔幫我地！再一次多謝台灣人嘅人情味！

9. 最後2K，食完野唔洗講野！成條路仲有幾長見到哂！望見埋家鄉！老虎蟹都頂埋佢！上到去之後雙手疆凍，意志薄弱，只知道我做到了！兩人用力擁抱！拍照留念！以感動的淚水結束今次征服3275！

(按圖放大)

原文及更多圖片載於滾動吧！單車日誌。Facebook專頁