[滾動吧!] 滾動台灣的第一天!

中午一點半，我哋到達台中機場，喺行李帶上見到自己嘅愛車，即刻拿拿林check 下，見到紙皮箱竟然有破損，hubs 破壞表露無遺，於是即刻拆開來睇，好彩有驚無險，單車無破爛。多得台妹 Kimberly 仗義幫忙，唔單止幫我哋Book咗部的士，一次過可以放晒四部單車，佢自己仲開車車我哋去民宿。

我哋住嘅係日安生活，其實幾奇怪嘅一個地方，因為佢唔係賓館，亦唔可以算係民宿，佢係一間咖啡店。。。只不過喺咖啡店中間零零舍舍有一個空間可以做一間房，但係都尚算清潔舒適。

到咗夜晚，基本上咖啡店所員工走晒，就會比鎖匙你自己一個留喺裡面。。。你可以隨意移動，但小心有部份地區有感應器，唔可以進入。

日安生活
地址：台灣台中市北區太平路75巷7號
網址：https://www.airbnb.com.tw/rooms/3203054室內裝修比較古典日式，地下用榻榻米，其實幾有格調，不過三面圍住玻璃窗無遮無掩，我哋一班男仔當然唔介意啦！
整體滿意，係個沖涼冷熱水真係杯具。。。

好嘞，放低行李已經急不及待去組裝單車，本來一切順利，點知。。。上緊鵝頸粒螺絲時突然鬆手，先發現側面台階地板原來有罅隙!!粒螺絲跌咗落去!!!點算好。。。。好彩偉大嘅阿祥San竟然唔知喺邊到攞咗粒士啤嘅出來。。。。。鵝頸螺絲都有士啤。。。真係神一樣的存在!! 咁就大步檻過。。。

組裝車輛完畢就已經五點，於是拿拿林去逢甲夜市逛一逛。。。都係果幾味，無咩好講。返黎執一執行裝，之後時間剛剛好做直播報平安。

然後先正式圍埋一齊開個會。明天初步計劃係7：30am 到台中火車站集合，8時正式起步!

路線就，本來考慮是否要繞路出海邊，不過後來決定都係行公路1乙→1→1丙→19→145→1→嘉義市

全程大約100公里。。。都係暫定嘅姐。。。有時計劃既野。。。係需要隨情況改變嘅 嘩卡卡，唔知會點，Youtube再同你講!

[滾動吧！環台期間，每晚都會喺Youtube直播update最新情況，大家到時可以喺Youtube上面直接留言Live Chat，準時九點開始，應該得，除非唔得]

9月20日Youtube直播link：https://www.youtube.com/watch?v=ijllENps7xg

Fitz.hk Youtube: https://goo.gl/sZ3ET2
Fitz.hk ig: http://instagram.com/fitz.hk

滾動吧！單車日誌。Facebook專頁