[自由潛水] 閉氣潛水係人類本能?

好多人都認為自由潛水係極限運動，早幾年甚至有雜誌話自由潛水係十大危險運動之一 (註)，其實 freediving 意外好多時係由於忽視咗安全嘅重要性，有啲人喺網上睇相同埋短片覺得好容易就自己去試，加上高估咗自己能力，例如用好多鉛沉自己落去但冇諗過自己會唔夠力氣上番水面……

其實閉氣潛水係人類自然本能，如果放一個 BB 落水會發現佢自然咁識得喺水入面閉氣，甚至反壓，只係大部份人成長時冇用到就喪失咗呢項本能。呢項本能喺海豚、鯨魚等水生哺乳類動物身上都可以搵到，叫做「哺乳動物潛水反射」(mammalian dive reflex)，當中身體會出現以下改變：

1. 心跳減慢 (Bradycardia)

講緊嘅唔係做運動做得多會令心跳減慢，而係當我地只要浸塊面落凍水，身體就會本能咁減慢心跳，一般會比正常心跳慢10-30%，經過訓練後更加可以減慢一半以上。唔信可以睇下呢條短片，果個人嘅心跳由原本嘅每分鐘七十幾下跌到得番四十下:

2. 末端血管收縮 (Peripheral Vasoconstriction)

手手腳腳嘅血管會收縮，使更多血液 (同氧氣) 可以輸送到重要器官，例如腦、肺同心臟。

3. 脾臟收縮 (Spleen Effect)

脾臟其中一個功能係儲存血液，當身體有需要時就將呢啲後備血液輸出。

當我地閉氣一段時間後血含氧量會下降，就會刺激脾臟釋放呢啲後備血液去重要器官；因為多啲血即係多啲紅血球即係多啲氧氣轉輸；但亦都因為咁會多咗血液流經腎臟，所以玩freediving時會成日想尿尿…

4. 肺部血液供應增加 (Blood Shift)

上面講咗四肢嘅血管會收縮令多啲血液流番去身體嘅重要器官，其中一個地方就係個肺。

有玩水肺潛水嘅朋友都知道潛得越深，水壓就越高，喺水深十米時水壓比喺水面高一倍，喺水深三十米時就高四倍，即係話如果我地帶個空水樽去潛水，去到十米水壓會令個水樽縮細一半，到三十米個樽會縮到得番四份一，但上番去水面水壓減低時個水樽就會漲返去原本嘅大細。

玩 freediving 時我地個肺就好似個水樽，越潛得深就縮得越細，不過因為個肺連住肋骨同橫隔膜，所以漲大同收縮嘅幅度都有限制，超越咗限制個肺就會有壓力創傷 (lung squeeze) …但係呢個反射本能令到多啲血流去肺部，因為血係液體，唔會受水壓影響，即係可以支撐住個肺黎抵抗水壓，減少有壓力創傷嘅機會。

（網上截圖）

科學家未發現有呢個反射本能之前推算人類最多只可以閉氣下潛到三十至四十米，超過咗呢個深度個肺就會抵抗唔住水壓，但宜家有好多 freediver 經過長期嘅適應同訓練都可以潛到落一百米以上。

玩 freediving 嘅人唔係有特異功能，我哋只係去重新發掘人類身體與生俱來就有嘅潛能；但我地都 強 烈 建 議 大家搵合資格嘅教練上堂學正確嘅技巧同安全知識。Freediving 係好好玩，但記住每項運動都有佢嘅危險性，唔安全咁玩 freediving 就好似啱啱拆輔助轆學識踩單車就唔戴頭盔走去踩屯門公路……

註：戶外雜誌 Outside 曾經發表一篇文章 話 freediving 係世上第二高死亡率嘅夏日運動

Holos Freediving Facebook專頁