近年，我覺得最L煩，同聽L到厭的四個字就係『集體回憶』。但當切切實實發生在自己身上時，原來impact會這麼大。
友人寫到「喜樂有時，哀痛有時，相見有時，別離有時，她如此倒下，能不黯然傷感?」我感到不勝唏噓。
呻港人減唱K改跑步
California Fitness由盛轉衰，究其原因? 會不會又是因為我地呢班大力推廣跑步的院友呢? 之前Neway縮減屬銅鑼灣地標的糖街CEO舖面，令港人感嘆樂壇萎縮，唱K熱潮褪色。唱K熱潮消退，Neway揸fit人溫國樑認為亦與港人追求健康有關，「facebook都多跑步、行山相」，K客減少高利潤的酒水消費，致客人人均消費減少兩成。加上香港生活繁忙，「難在大家都有大家生活」，從前20、30人相約唱K的情景不再，縮至僅4至5個人一枱。
貴為死剩的元老級Infinity會員，California Fitness給我的遠較我付出的多 。這幾天，自己跟朋友紛紛往各分店預瞻(仰遺容)。
----- 廣告 Ad -----
緣起
上一個世紀，朋友Six Majors帶我同另一位朋友到灣仔旗艦店找top sales入會，top sales是壹仔都有介紹過他年薪多少多少。到現在，sell會籍仍是非常搵錢的。但當時的top sales 無咁狼死，不似依家的sales，智障都叫你去借大耳窿健身。
當天糾纏了粒幾鐘，入會費終回落到五位數字而月費不用一叉嘢。係，仍然好很貴。若單拖去，可能仲貴。所以阿媽教落never go into a negotiation alone.
慣技
過了sales 呢關，便到PT. 入會後，會免費奉上由專業教練指導的體能測試。測試目的就是要打擊你的自尊心。
當時教練拿著軟尺同一個鉗，先度高再量體重，一上磅，教練就「嘩! 五呎爭吋半，一百六十幾磅，爆哂錶呀!」
落磅再度腰圍，教練又「嘩! 四十吋，中央肥胖噃!」
之後，再拿個鉗度BMI，當他準備「嘩」的時候，我即刻說: 「屌你呀! 教練，使唔L使畀個咪你呀? 咁L大聲。」他才收歛少少。
最後是心肺，要在跑步機跑五分鐘，因為之前給教練羞辱過，要攞尾彩，一上機就喪跑。五分鐘後，他問: 「Okay嗎?」我掩著個咀同教練講: 「廁所係邊? 我想嘔，劏完先講。」真係柒出國際。最後我都沒有用PT，以前的PT pro 好多，會悉心指導，從不硬銷。
----- 廣告 Ad -----
多元
加記另一特色是會員多元化，老Lan個間多專業人仕﹑金融才俊、財經演員、鬼佬﹑鬼妹﹑鬼婆﹑鬼仔﹑超索中環OL。旺角有公仔佬，爛口MK妹和蠱惑仔，似鐵館多啲。尖咀啲女都正，而且較親民，中間溝了一些C9在其中。見過陶傑係度work out。灣仔名人同模 del 多一些，見過落選港姐做sales﹑王敏德﹑作家張小嫻來做gym。銅記啱仔多啲，試過係steam房被仔媾。黃埔最多C9，吹水多過做運動，有次有條C9係隔離部跑步機十分披，不停問我典解唔講嘢，頂佢唔著，叫她可唔可以靜一靜，我分心會仆街架。
索女
尖咀的索女係多到瀉的。反觀另一家同樣在尖沙咀的P記，搭車經過時，見到一排跑步機上的女生，你會肯定自己會好專心做運動。當時加記的女members是超班的，如果你跟我一樣都是上世紀加入，應該見過戴安娜，身形高佻﹑model骨架﹑輪廓精緻﹑樣子甜美﹑好sporty﹑超索﹑很有型格，一口Queen’s English，職業是急症室醫生。『妙手回春』個啲，收皮啦。她逢星期日早上都會教spinning class，因為她，我幾早都可以起到身。有一次跑渣馬十公里，衝線時，她跑在我身旁，頃刻有諗過扮瘁死，等她來救我，搵藉口講多謝，然後去媾佢。不過，她當時已經被marked.
上堂
加記開很多班，場場爆滿，因為教練全是打得睇得。我通常會參加super spinning class. 講你都唔信，你要像渣馬一樣在特定時間打崩頭報名的。每年他們都會在銅鑼灣搞Tour de France spinning，好似係踏四粒鐘，超級受歡迎。訓練班教練全部都非常投入，好用心去帶，開始不消十分鐘，各人已進入如去了club dancing 的 trance state. 那份快樂同滿足感，只有熱愛運動的人才明白。
超值
入會幾年後，我再被游說轉會籍，我還是落曡同銀行借P loan轉了 Infinity. 條款是如果十年內我唔死﹑它唔摺的話，之後我可以用很低年費繼續享受all clubs all time這優惠。背了這身債，唯有勤力做gym，令自己覺得抵啲。
應該是二千零四的渣馬，歷年來最冷的一次，當日氣溫只得五六度，還下著雨，體感像零度。跑回灣仔時，手腳已經全部冰凍僵硬。取行李時，唔知啲童子軍攪乜春，係運動場排了成個鐘還未攞到行李。待取回行李時，拖著低溫症的身體去到灣仔的California。當我能夠沖一個熱水浴時，此刻無價，什麼也值返哂。
開首話跑步是California Fitness死因，當然是開玩笑。
從來都是香港人自己攪撚死自己啦，關其他嘢Q事咩!
當我們不可以再擁有時，唯一可以做的就是儘量不要忘記。
那你的美好加州回憶又是什麼? 可以分享嗎?
----- 廣告 Ad -----
更多：
Fitz.hk Facebook專頁
[讀書包膠]《跑馬拉松絕對不能做的35件事》之一
CV夾張馬拉松證書有無So
[從0到42.195]「起機」十五招
Yiu Kwong Chan＠Fitz.hk
Fitz Running 跑步
