Fitz > 運動 Sports > 行山 Hiking > 富安花園「封村」事件 居民: 有人怪責受害者
陳小姐: 只係得條橫額仔,又唔係落晒閘,大家反應唔使咁大。

近呢兩個月,馬鞍山富安花園多個出入口都掛咗一幅橫額,表示:「富安花園屬私人地方,行山人士,請勿入進,面斥不雅,多謝合作。」橫額圖片分享至幾個行山群組,有網民對此大表不滿,認為呢個係「封村」所為,事件擾攘接近一個月。

有富安花園居民陳小姐致函 Fitz,以求「替佢居民取回公道」。以下文字經筆者整理,並經陳小姐同意發表。

富安花園掛橫額拒行山客逼不得已?

陳小姐係富安花園第一代居民,1987年住到而家。由於富安花園第17座旁邊,有小路可進入梅子林路,再經梅子林上茅坪或黃牛山,加上唔少網上資訊都叫人喺富安花園起步。於是呢度就成為唔少行山人士集合嘅地點。

後面紅色嗰支,係居民俗稱嘅風水柱。

「屋苑大門有支紅色嘅風水柱,好易認,兼且對正巴士站,大家一落車就望到。加上巴士站對出有便利店、超市、餐廳,所以成為好多人集合嘅地方。周末時都有大批人喺風水柱等人。」

「我住喺呢到三十幾年,好多居民亦鍾意行下山,所以不嬲同行山人士都相安無事,佢哋入唔入邨,我哋無乜所謂。」

陳小姐話,近年大金鐘、昂平、茅坪等地方成為打卡勝地,每個星期六日朝早都有大批行山人士喺屋苑大門集合;到咗下晝,亦有好多人行完山經過屋苑離開。連串現象,衍生咗幾個嚴重問題:

1. 噪音擾民

「可能啲大叔大媽行慣山中氣特別好啦,佢哋等人嘅時候,好鍾意高談闊論。如果打工仔女星期六日想瞓晏啲,就真係多得佢哋唔少。」

陳小姐補充,富安花園一共17座大廈,都環繞住中間嘅花園同泳池,而且地下一層亦有住戶,只要大聲少少,噪音係會入晒屋。

地下都有單位,所以行過大聲啲講嘢,都會嘈到入屋。

2. 疫情傳播

去年疫情嚴重,但好多行山人士都唔跟規矩,入屋苑唔戴口罩。試過有街坊叫一位大叔戴返口罩,大叔反駁話:「政府話行山係唔使戴口罩!」完全捩橫折曲。

3. 入口太細人太多

巴士站對出嘅屋苑入口,其實唔算好闊落。不過有啲行山團一行幾十人,企晒喺風水柱等人,阻住居民出入。

4. 17座鐵閘嘈到人

富安花園17座有條小路,可過河直接進入梅子林路,不過屋苑範圍有道好細嘅鐵閘,一開一關會發出好嘈嘅聲響。有人無公德心用力關閘,就會發出響聲嘈到人。

5. 管理員好人難做

陳小姐話,富安花園有三十幾年歷史,管理費出名平,所以管理員「都唔會好後生」,不過佢哋反而有人情味。陳小姐話,管理員因為噪音、口罩等問題,不時被唔守規矩嘅行山客以粗言謾罵。所以,呢次管理處出橫額,絕對係逼不得已。

去梅子林唔使入屋苑

其實要上梅子林,最簡單直接方法就係行梅子林路,條路無咁轉折,又有樹蔭溪流。就算要去便利店買嘢,要去餐廳食早餐,都可以選擇一條唔入屋苑嘅路。至於集合地點,可以選擇新建嘅亞公角街公園,有櫈坐又遠離民居,鍾意幾大聲都得。

不入富安花園上梅子林的路線

  1. 搭馬鐵
    • 大水坑站 B 出口 (恒德街)
    • 亞公角街公園
    • 過橋
    • 梅子林路
  2. 巴士 (亞公角街站落)
    • 往前走,右手邊過馬路
    • 亞公角街公園
    • 過橋
    • 梅子林路
  3. 巴士 (富安花園站落)
    • 經九龍城浸信會禧年小學外圍
    • 亞公角街公園
    • 過橋
    • 梅子林路
跟呢條橫額往前行,右手邊就係亞公角街公園

路線參考圖

網民回應好鬼mean

陳小姐認為,管理處只係掛條橫額,而唔係拉閘封邨,其實措施相當溫和。只要外來市民唔好太過份,大家隻眼開隻眼閉,都應該唔會有人干涉。陳小姐覺得最離譜嘅,係部份網民嘅激烈反應,有人甚至blame the victim。

  • 「市民有路權,反對!」 (陳小姐反駁: 居民都有業權)
  • 「富安居民好自私!」 (陳小姐問: 邊方面自私? 我唔畀你入我屋企叫做自私?)
  • 「而家咩面斥不雅呀? 我就想睇下有幾不雅!」 (陳小姐回應: 人無恥就無敵?)

其實,富安花園並唔係沙螺灣村,封咗富安花園仲有大把路上到梅子林,點解一定要進入一個私人屋邨上山呢? 總之希望大家自律,無良市民玩爛個場,都已經唔係第一次啦。