----- 廣告 Ad -----
有人講過,「世上沒有不跣人的石頭」。(編按:原是囉嗦大叔所創) 石頭一濕水,無論著咩鞋都容易跣到攤攤腰! 不過好奇怪,有人居然用石頭去舖設山徑,落雨行過,真係想唔PK都幾難。
長話短說,上星期 (2019年1月初) 有幾日都keep住有毛毛雨,濕度又幾高。一個平常嘅早晨,我走咗去荃灣柴灣角,踏上元荃古道,打算由荃灣行去深井。過咗石龍拱涼亭,行咗都唔夠一公里,一個唔覺意跣低咗,四腳朝天! 雖然受傷唔係好嚴重,但係條腰就痛足幾日!
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-3.jpg?resize=374%2C680&ssl=1)
呢到就係我PK嘅地方,地面仲有積水 (下圖)
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-7.jpg?resize=528%2C707&ssl=1)
積水之外,細心睇舊舊石頭都有唔同,有啲跣啲有啲無咁跣。
----- 廣告 Ad -----
跣底咗之後,我要用蟻躝速度慢行,而喺呢個時候,我研究咗呢一段山徑嘅情況。由荃灣柴灣角至深井呢一段元荃古道,每一段路面情況都有唔同。
柴灣角 > 深井 路面舖設情況 (總長度約8公里)
- 初段柴灣角至石龍拱,係一般行山道嘅石屎路面,會加入坑紋,用以防跣 (約1公里)
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-8.jpg?resize=760%2C428&ssl=1)
未到石龍拱仲係普通石屎路
- 由石龍拱開始1公里,係用大石+石屎舖成嘅「靚靚路面」,我就喺呢一段跣低。我稱之為「PK路」(約1公里)
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-6.jpg?resize=760%2C428&ssl=1)
呢到開始就係PK路
- 中間至麥理浩徑九段,有一段平常山徑嘅泥路。石級略經整理 (約1公里)
- 接入麥徑九段,係石屎車路,有車行 (約2公里)
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-11.jpg?resize=760%2C428&ssl=1)
進入麥徑九嘅車路
----- 廣告 Ad -----
- 到田夫仔轉入清快塘落深井一段,係石屎村路。 (約2公里)
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-9.jpg?resize=760%2C428&ssl=1)
落深井又變番石屎路
PK路有咩問題
元荃古道我唔熟,我唔知條「PK路」鋪咗幾多年,不過睇佢嘅損耗程度,估計都係得幾年歷史。我跣低之後,反覆研究呢段路,發覺有好多問題:
- 當日朝早只係落咗陣毛毛雨,其他路面都已經乾咗。但「PK路」仍然有積水,去水好差。
- 「PK路」路面由多種唔同石頭鋪成,有大有細。當你適應咗黑色質地嘅石頭,而唔覺意踏上白色嘅石上面,就會PK。
- 石頭鋪到凹凹凸凸,相信就算係好天氣,行喺上面都會唔多舒服
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-4.jpg?resize=528%2C674&ssl=1)
唔知係因為靚定係實用,啲石頭舖到有凸有凹。唔畀佢跣親,都會畀佢Click親
相信一定會有人話:「驚PK就唔好行囉,投訴L!」
首先,我而家唔係投訴邊個,只係叫大家小心啲。第二,政府鋪到條路咁「靚」,個目的就係想吸引多啲人去行,如果條路係「新手不宜」,咁佢整番泥路咪得,使唔使咁多舊魚先? 第三,鋪路嘅錢係由納稅人畀,我有少少要求都唔係咁太過份啫。
![](https://i0.wp.com/fitz.hk/wp-content/uploads/2019/01/山徑陷阱-元荃古道跣到PK-10.jpg?resize=558%2C393&ssl=1)
個牌話呢個工程係慶祝回歸15年,真係多L謝晒。
後補資料
我雖然唔算係咩行山高手,不過都知道行山要做好準備。我PK當日所著嘅鞋,係 Mizuno Wave Kien 4,正常行山鞋,著咗大半年,鞋底仲完好。
延伸閱讀:《秋風起,又是行山時—元荃古道半道走》
Fitz連結: https://fitz.hk/?p=111370
Fitz Facebook專頁
[慢活主義] 大欖涌水塘 新年行大運
[台灣百岳] 我看到的藍寶石嘉明湖
Fitz Hiking 行山
----- 廣告 Ad -----