[毅行備戰2016] 路線分析 第八段 鉛礦坳至大帽山荃錦坳毅行者去到鉛礦坳嘅CP7,多多少少都已經形勢大定。你係30個鐘定40個鐘,已經可以大概計到數。不過,大家亦唔可以放鬆,始終仲有個香港最高峰等緊你。

第八段:鉛礦坳至大帽山荃錦坳(CP7—CP8)

  • 標距柱:M138-M155
  • 距離:9公里
  • 途經:CP7鉛礦坳食飽杯麵,立即登上全港最高峰:大帽山(957米)。登頂後沿大帽山道馬路,到達大帽山郊野公園遊客中心CP8。(注:雖麥理浩徑第八段已改動,但毅行路線仍維持舊路,即沿大帽山道馬路行。)
大帽山日出。行三十個鐘的毅行者應無綠目睹。(一係行二十個鐘。一係行四十個鐘)
大帽山日出。行三十個鐘的毅行者應無綠目睹。(一係行二十個鐘。一係行四十個鐘)

路況及地勢:

  1. 初段有石級、亂石陣、山路,變化多端。
  2. 登上山脊後,為泥石路段,緩緩而上,難度不大。
  3. 尾段為大帽山石屎馬路,路況良好,但坡幅甚大。

落山嘅N連髮夾灣
落山嘅N連髮夾彎

注意事項:

  1. 貴為香港最高峰,山路況多變,在走了七十多公里路後,對身心體力均是一大考驗。所以訓練時集中訓練針草帽三座大山,熟悉路途,在這時會有很大幫助。
  2. 石級、泥石路,對行了七十幾公里的毅行者而言,已駕輕就熟。而大帽山亂石陣在日間雖問題不大。但若參加者要夜間行經,在微弱光線下找路,就成了個大問題。除了加強夜間訓練外,亦可委派一眉精眼企的隊友(或支援隊朋友)作領航員。毅行者講求四人八腿一條心,這時就可發揮此精神!
  3. 大帽山為香港最高點,天氣極為不穩定。宜帶備風褸,防風防雨,以免著涼。(2009年毅行者活動期間,冷峰襲港,當日大帽山山頂錄得攝氏零度紀錄。)
  4. 尾段石屎路,坡幅極大。上斜要有耐性,因為真係有排行。
  5. 大帽山落斜要經多個髮夾彎,早前有爭標隊伍在此走捷徑被人投訴,大家切記要沿馬路而行。(其實所謂捷徑一啲都唔見得有著數。)
  6. 落大帽山為漫長之石屎路,腳部有水泡者會痛不欲生,無水泡者行到中段亦難免會腳痛。解決辦法除了多加練習,我嘅方法就係一口氣跑落山。所以,練跑亦應該毅行訓練其中一項(有人建議每周至少跑10K),更要練習跑步落斜。
大帽山天氣多變,有霧一啲都唔奇。
大帽山天氣多變,有霧一啲都唔奇。

到達CP8的目標時間:

全程25小時:20小時15分(分段2小時45分)
全程30小時:24小時30分(分段3小時)
全程35小時:28小時(分段3小時30分)

註:有關「目標時間」

毅行者各站目標時間

參考自樂施會官網2012年參加者小冊子,千祈唔以為係行貨,根據本人經驗,佢列出嘅「目標時間」極有參考價值,計埋路況、山徑艱難程度,甚至休息時間。參加者依住佢個時間,可控制自己步速。

至於我只列舉25至35小時作參考,是基於對新手來說,這個時間概不用捱兩晚眼訓,而又不太難去衝破。當然,提多一次,呢個毅行備戰系列主要為新手而設,各位老手有咩心得,記得留言同我多多交流呀。

更多資料:樂施毅行者官方網頁

更多:
Fitz.hk Facebook專頁
[毅行備戰2016] 路線分析: 第七段 走私坳至鉛礦坳
[毅行備戰2016] 路線分析: 第六段 畢架山至走私坳
[毅行備戰2016] 路線分析: 第五段 基維爾營至畢架山
[毅行備戰2016] 路線分析: 第四段 水浪窩至基維爾營
[毅行備戰2016] 路線分析: 第三段 北潭凹至水浪窩
[毅行備戰2016] 路線分析: 第二段 大浪西灣至北潭凹
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山