[毅行備戰2016] 路線分析: 第四段 水浪窩至基維爾營

「漫漫長路有幾多風光，無心機細心賞……」最啱形容呢一段路。毅行者喺西貢兜咗一大個圈，過幾座山之後，終於有一段平路行下。不過，絕大多數參加者喺呢到都要摸黑進行，呢一段咁長嘅路，就成為大家嘅耐性、忍耐力，以及毅力嘅大考驗！

圖片來源: http://johnchan.phychembio.com/

第四段：水浪窩至基維爾營（CP3—CP4）

標距柱：M069-M093
距離：12.5 公里
途經：由CP3檢查站，緩緩登上馬鞍山山坳；過大金鐘山腳，經昂平、芧坪；以及路過黃牛山、花心坑、三塊田。最後至基維爾營地。

1. 在CP3檢查站，一口氣登上600米馬鞍山山脊（樓梯佔九成），可說耐力大考驗。
2. 在登上馬鞍山山脊之後，就是漫長（超過10公里）及相較平緩嘅泥路，夜晚行進，絕對令人瞌眼瞓。

登上馬鞍山嘅山脊後，就係漫長嘅泥路。

注意事項：

1. 驟眼睇，第四段只要翻越一座大山：馬鞍山（算係半座啦），但千祈唔好掉以輕心。唔少行山友都覺得呢段麥徑係10大難行之首。原因係登上馬鞍山山脊後，漫長之泥路，少啲耐性都唔掂。
2. 切記：對新手嚟講，未過標距柱M100都唔好發力跑，所以就算條路有幾長有幾悶，都唔好心急。留力，留力，留力呀！
3. 初段要一口氣登山五六百米，所以在檢查站休息時，記得拉拉筋，唔好畀身體cool down。
4. 雨天行呢一段，泥路令人舉步艱難。正式毅行活動固然令人意志消沉，不過訓練時，可專登安排在雨天試試這一段，試下行山鞋畀爛泥啜住嘅滋味啦。
5. 此段完全無士多店舖，路程又長，可多帶點零食，邊行邊食。
6. 在昂平前山脊有時非常大風，夜間行經要預備風褸。
7. 此段終點基維爾營，沒有公共交通到達（的士可到，但唔會有吉車上），訓練時要留意這點。一般人會索性沿沙田坳道行落黃大仙，或經飛鵝山落彩雲邨。
8. 基維爾營地為毅行者補給最豐富，服務最完善的檢查站（有按摩及腳部護理，2015年仲有熱辣辣燒賣食。）。而參加者無論體力及心理上，均要好好休息。若唔係要做時間，可安排喺呢度大休，不過千祈唔好訓覺，一訓著要撻番著就唔易。

呢啲密林內嘅泥路，可安排一次雨天訓練，試下畀爛泥啜下對鞋嘅滋味。

第四段地標「長城」

到達CP4的目標時間：

• 全程25小時：11小時15分（分段3小時30分）
• 全程30小時：13小時30分（分段4小時30分）
• 全程35小時：15小時（分段5小時）

註：有關「目標時間」

(按圖放大)

參考自樂施會官網2012年參加者小冊子，千祈唔以為係行貨，根據本人經驗，佢列出嘅「目標時間」極有參考價值，計埋路況、山徑艱難程度，甚至休息時間。參加者依住佢個時間，可控制自己步速。

至於我只列舉25至35小時作參考，是基於對新手來說，這個時間概不用捱兩晚眼訓，而又不太難去衝破。當然，提多一次，呢個毅行備戰系列主要為新手而設，各位老手有咩心得，記得留言同我多多交流呀。

更多資料：樂施毅行者官方網頁

更多：
Fitz.hk Facebook專頁
[毅行備戰2016] 路線分析: 第三段 北潭凹至水浪窩
[毅行備戰2016] 路線分析: 第二段 大浪西灣至北潭凹
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山