[澳洲墨爾本毅行者] 愛到不能澳洲毅行

由

2018-03-27

Fitz > 運動 Sports > 行山 Hiking > [澳洲墨爾本毅行者] 愛到不能澳洲毅行

有一刻，我個心：『如果最後檢查站宣佈雷暴惡劣天氣各樣然後玩完，咁就唔係我玩完，係無得玩，咁就好啦』當時我上半身赤裸，喺 check in 位坐喺自己撻水上面……

太多事都無諗過會係咁發生，但唯一可以肯定嘅係，行緊毅行嘅時候會同自己講以後唔行，行完又話下次再玩，60KM-80KM永遠係人生大考驗。

而今次最最最特別的莫過於同一班完全無見過面的人行連同 support，一次過識咗十幾個外國朋友，仲可以同佢地一齊著獅子山隊衣出發，真係好奇妙，加埋同日潘潘、何亨、Eric、Gloria、阿宗阿盛一齊都玩逆行100 Km，見到潘潘件隊衣，真係向高山舉目，在平行時空出發。

好想逐一寫出佢地嘅名，包括唯一有墨爾本毅行經驗的

澳洲人 Warren (同佢老婆 Helena 同超可愛仔仔 Daniel 同埋 Sister Natalie)
美國人 Simone 嚟澳洲一段時間，又係讀 Law
英國/澳洲人 Rejieli 13歲去英國，最近一年先返澳洲，又係做mental health (佢support 有細佬Sam，好朋友 Christine)
澳洲人 Nigel 熱心教會工作 (連佢家姐路過支持)
同埋我嘅 Support Cissy (香港山友)

先講路勢，如果我用麥徑做例子：

第一段到東壩 x 3 + 針草 + 第九段 x 5 + 雞公山

有玩過香港毅行就以為食菜咁食，其實平路就係墨毅嘅殺人武器。此時此處此模樣，喺香港梗係見平路就跑，咋咋臨搞掂。原來我從來都無行過咁多平路，又係另一種挑戰。因為用嚟用去同一組肌肉，尾段行到膝頭痛 (跑反而唔痛)，係相當痛苦……

同一個毅行，唔同地方有唔同文化，例如喺澳洲，咖啡係神聖，所以咖啡友一定要嚟墨爾本行，每個站都有 Coffee Van，開通頂。水站，佢地會將水喉縛鐵欄杆，一個欄4、5個水喉。同埋最重要係，幾乎所有Check point 揸車都到，所以佢地會用 tub，即係我地擺嘢嘅儲物膠筒。D隊友一到支援就成喼成喼咁擺好哂，所以 Helena 見到我只係拎一個袋，佢都盛讚我，我主要得一支濃縮 Gatorade 可以一沖五同Doughnut 3個。(因為佢地真係似搬屋，差在張 Mask 未帶出嚟，而全人類都咁做) 而佢地係無帶俾你剪，每次都要check in and out，用四隻色代表四個人，數齊色就搞掂。

一起行，Rejieli 就問『獅子山』咩意思，係咪衰嘢? 我笑住解釋咗，講埋背面，Lift Eyes on the Hill，後尾見到隊香港人，我叫 Rejieli 問問佢地:

What is 獅子山?

同香港毅行最唔同嘅係氣氛，澳洲呢邊真係好多水吹，可能平路多，唔同隊經過互相打招呼傾計，隊友之間每次行返近就『how are you doing?』，我就答咗30次 great。人嘅熱情真係好犀利，Rejieli 係講兩句就可以感染到其他人，包括路過嘅，加埋同 Nigel 每次離開 check point 都會錫錫，同埋互相幫大家整腳。

『Kevin, I will give whatever you want.』Rejieli said。香港人就好難表達到呢個意思。

或者香港人連上山都好趕，呢邊最快完成時間係9小時，分0630，0730，0830，同我地係0930四個時段出發，仲有50KM玩。

天氣方面，呢條墨徑最大敵人係猛烈陽光，朝9晚7，過咗兩日我先見到個咀有黑邊，要搽 SPF50+ 潤唇膏。但乾爽天氣之下，大家就少D男人大脾罅之苦。但喺一切有利嘅情況之下，一向以一對靚腳返終點見稱嘅我，第二個 check point 就在腳踭位起水泡，原因係….

對鞋，腳踭位鞋墊後有個尖位突出嚟，就係縛口位，隊到正，唔使兩段平路就出事，真係唔係你著開嘅牌子，唔好拎嚟玩 100 Km。我發誓以後行100都著返 Salomon。

剪爆水泡用紙巾攝，總算行到佢麻木返，當然呢一刻都完全無問題，check point 2第一次見到 Warren 嘅囝囝 Daniel 飛撲嚟攬住爸爸，真係好 Sweet，而且太太 Helena 已經擺好個野餐格局。聖誕節一樣咁食火雞、芝士夾麵包。沙律方面有紅蘿蔔條、紅椒條、青瓜條同提子，全部都有好多水份。估唔到紅椒係咁正。

不過，亦都因為有車到，資源過剩，Support 時間就長，如果唔係多平路，D肌肉真係好難撻返著。同埋好早有隊友開始整腳，而且無剪脚甲、同埋 GEL 甲，所以都少少擔心。

當然，沿路有幾靚，大家可以睇相。

我地頭三段，大家無離開過視線範圍，直到 Check point 4 最高點前，三個身型大嘅隊友上得吃力，我都要同 Warren 輕輕按鬆兩次先到頂。今年佢係參加得比較倉促，所以應該少練。感謝主，我地最終都到最高點。

Cissy 呢個朋友仔就一見如故 (睇舊文介紹)，同聲同氣香港人，為佢而驕傲。佢一個女人仔，黑嘛嘛擺好哂五張椅，鋪地蓆帶埋爐整熱嘢食，係通粉加薯蓉，薯片、仲為隊友按哂摩，準備埋 nuts 俾我地上路，真係非常專業。大家要記住仲有四個大 tub。當大家要去搵 physio，我就瞓咗喺 Olinda 草地度睇星，匪夷所思的毅行生活，而 Warren 亦都回復狀態。

過第一晚夜唔難，難就難在之前住 Air BnB 喺正大馬路邊，車聲嘈足一晚，八個鐘瞓到四個鐘，所以真係好眼瞓。然後就係奪命第九段 x 5，真係惡夢。

日頭平路傾計，忍住唔跑享受風景，講講過去講講教會生活，夜晚又變返無盡旅途。一路捱到天光。已經Check point 6. Still have 30 KM to go. Support Crew Christine 喺我傻更更之下，俾咗杯熱飲我。

出發無耐，就係呢嚿雲，追住我地，最後籠罩大地，我真係估唔到，去到澳洲雞公山先嚟打水戰。開頭唔覺唔覺，越祈禱越落得大，件褸加多兩磅水嘅情況之下，我決定狂奔，或者最後20KM毅行就係應該要爆。然後防水鞋就變成裝水鞋，又重多磅地跑去 Check point 7。勁多胡思亂想，又驚病，又怕電話壞，好惡劣好想 quit。唯一係我今次身份唔係隊長，所以我要先照顧好自己。

喺呢個時間，完全無澳洲人會跑，有無 rain coat 都係咁話，但唔跑真係會凍死。與其頹廢地在紅雨中龜速前進，不如豁出去到 check point ，死咗都有人救。

去到 check point 7 要搞到半祼都係始料不及，而現場體育館就好似臨時災難中心咁，而我就一路期盼，支援來臨，本身 support crew 阿Sam 有傷要揸拐杖嚟幫手，我仲要勁無人性咁，請佢拎袋嚟，無計，唔通唔著衫週圍走? 連隔離嚟 support 其他隊嘅人，都忍唔住問我有咩要幫手，所以無衫著之下又食咗隻蕉，無耐 Rejieli 趕到，終於有返件衫著，感謝主。

最後孤注一擲，換上韓國毅行買嘅薄底去水鞋，行最尾15Km。沿用香港策略，Tee, rain coat, drinks and go. 跑完平路5KM就停雨，雞公山大雨過後，大家都知係咩一回事，我呢對水鞋真係好正地俾我過盡泥濘。然後，就好似上年 Raymond 上身咁，不斷嗌住不斷俾石仔拮腳頂足10Km。沿途對脚版不斷咁問我：點解澳洲咁多碎石路? 最尾再剷上一個史無前例嘅泥鈄路，再落，就到終點大草地。

然後我嚟就見到 Daniel，好開心咁擁抱，然後我喺草地瞓低，一邊等，個零鐘後隊友徐徐趕到。

終點前嘅畫面係 Daniel 企喺棉花糖雲之下。

當中一段嘅小插曲值得大家去思考吓，當時 Simone 一早講佢訂咗晚上八點幾機返悉尼，但最後一站 Rejieli 同 Nigel 繼續原本 pacing 嘅整腳各樣，睇得出 Simone 內心焦急，如果喺香港，我或者會請大家盡快完成，等隊友趕到班機，但當最終都趕唔到嘅時候，Simone 就話佢係上咗一課，應該再早D去安排改行程。呢個真係唔同文化，如果係香港人，大家都會覺我幫手趕埋去，但事後諗返，要人地最後一段同你趕路又係咪強人所難，或者一步一步到終點先係真正享受毅行的方法。我無結論，但至少大家無不滿，感恩。