萬宜水庫東壩小巴 7月22日開通

諮詢半年，經歷過的士團體嘅反對，北潭涌 <>萬宜水庫東壩嘅專線小巴路線 (路線9A)，終於定於7月22日啟航。根據政府新聞網，小巴嘅班次如下:

• 行駛日: 逢星期日及公眾假期
• 服務時間: 下午3點至6點
• 班次: 每20至25分鐘一班
• 車費: $11.3

政府公報又無講過路線，不過北潭涌巴士總站入東壩，其實都係得一條路: 萬宜路。

消息一公佈，大家嘅反應都係話「黑的」 (即係濫收車資、揀客嗰啲的士) 將宣告「滅亡」! 事實上，佢哋過份樂觀，只要細心諗諗就知都有好多問題:

1. 只得星期日同公眾假期服務，仲要係得下晝3個鐘頭。即係話，只會方便由東壩出番去嘅遊客，朝早想入東壩，都係要打的
2. 服務嘅3個鐘頭，就當佢去到最密嘅班次，每20公鐘一班，即係一個鐘頭3班，3個鐘就9班。用埋而家最高載客量嘅19座位小巴，每個服務日都只係載到171個客人 (35部5人的士)
3. 最後，反而因為大家以為有小巴走而吸引更多人入去，而當小巴消化唔到呢班遊客，結果大家又要任由被的士劏到一頸血!
4. 諮詢期間，已有山友擔心小巴會令萬宜路有更多車輛，影響大家行山、跑步

政府話「會密切監察該專線小巴服務的乘客需求情況，並會在需要時適當調整服務」，希望到時評估供求情況外，亦會評估小巴對環境嘅影響。

最新嘅19座小巴，會唔會行走呢條路線，就要睇小巴公司安排。

資料來源: 政府新聞網、明報

Fitz 連結: https://fitz.hk/?p=98733