行山最重要嘅補給，一定係飲用水。適時飲水，係避免中暑、維持身體機能重要一環。幾時飲水固然係重要學問，行山帶幾多水亦要認真研究。
行山飲水有學問
行山帶水
行山帶幾多水視乎以下因素:
- 行山路線: 路程越長就要預備更多水，路線難行亦會飲多啲
- 天氣情況: 氣溫超過33度，濕度超過80%，就會影響身體排汗機制，必須飲水調節體溫。就算係廿零度，其實都足以影響你嘅表現
- 路徑狀況: 多唔多樹蔭、多唔多斜路，可以影響身力消耗情況，影響飲水量
- 身體狀態: 體能良好可飲較少水，行山前睇下自己嗰排 fit 唔 fit，千祈唔好高估自己，有一段時間無運動就會特別注意
- 中途補給: 指行山途經的士多店舖，補充飲用水嘅地方，並不包括溪澗河流。山野流水有好多睇唔到嘅污染，切勿直接飲用，至少都要用濾水器過濾
- 負重能力: 1公升水 = 1公斤重量。拎多1公升水就要孭多1公斤，2公斤就要孭多2公斤……如此類推。而負重又會直接影響你嘅表現，令你行得更辛苦
所以帶幾多水，好視乎外界環境之及個人能力，不過粗略而言每行10公里，就帶1公升水。另外，裝備上亦要預留500毫升「後備水」，以備不時之需。
行山飲水
- 行山前一兩天定時飲水，以免身體缺水 (若尿液帶啡黃色即為缺水)
- 起步前，飲用約500毫升食水
- 行山時，就算唔口渴，仍須定時飲水。大概每15分鐘飲用150至200毫升清水
- 飲水時，可先將水含在口中，再緩緩吞下 (特別在飲凍飲時)，以令水溫更適合腸胃
- 切勿飲水過量，如一次過飲用超過500毫升清水，會令身體鹽份迅速沖淡，易引發抽筋
- 可適時飲用運動飲料，或在水中加入少許鹽
- 定時進食水果、乾糧、糖果，亦有助補充流失之礦物質，但注意部份食物需要配合飲水
- 天氣酷熱時，不妨先將支裝清水雪成冰，然後用毛巾及報紙包裏，在山頭也有冰凍飲料為你降溫
- 時下流行戶外用濾水器，但計劃行程時，必須要肯定水源情況
缺水徵狀
飲唔夠水，可引發抽筋、頭暈等情況，嚴重者更可導致中暑等。
----- 廣告 Ad -----
行山時當然不能藉磅重去了解身體流失水份，但憑徵狀已可知缺水程度。
行山補水
漁護署2019年於郊野公園加設「加水站」，令行山人士更方便補水，現時26個「加水站」及飲水機，遍佈全港郊野公園。
圖: 漁護署 (按圖放大)
郊野公園加水站及飲水機
郊野公園加水站位置 (2021.1.29更新)
| 1 | 北潭涌小食亭 (北潭涌家樂徑及麥理浩徑第一段) |
| 2 | 獅子會自然教育中心 (西貢蕉坑) |
| 3 | 大坑墩燒烤場地 (清水灣樹木研習徑) |
| 4 | 城門燒烤場地 (麥理浩徑第六段) |
| 5 | 西貢大網仔燒烤場地 |
| 6 | 西貢北潭凹 (麥理浩徑第二段) |
| 7 | 馬鞍山燒烤場地 (馬鞍山家樂徑及馬鞍山郊遊徑) |
| 8 | 扎山道晨運園 |
| 9 | 紅梅谷燒烤場地 |
| 10 | 鶴藪水塘燒烤場地6號 (鶴藪郊遊徑) |
| 11 | 西沙路燒烤場地5號 (麥理浩徑第三段) |
| 12 | 大棠燒烤場地1號 (大棠自然教育徑及大棠樹木研習徑) |
| 13 | 九龍山長源路 (麥理浩徑第六段) |
| 14 | 城門小食亭 (菠蘿壩自然教育徑) |
| 15 | 清水灣郊野公園遊客中心 (清水灣樹木研習徑) |
| 16 | 大潭篤水塘 |
| 17 | 林邊生物多樣性自然教育中心 (衛奕信徑第二段) |
| 18 | 香港仔傷健樂園燒烤區小食亭 (香港仔樹木研習徑及香港仔自然教育徑) |
| 19 | 薄扶林水塘 (薄扶林家樂徑及港島徑第一段) |
郊野公園飲水機位置
| 1 | 大美督郊野公園管理站 (八仙嶺自然教育徑) |
| 2 | 大美督燒烤場地 |
| 3 | 泥涌燒烤場地 |
| 4 | 北潭涌家樂徑 |
| 5 | 北潭涌傷健樂園 |
| 6 | 大潭燒烤場地 |
| 7 | 大棠燒烤場地6號 |
唔該錫住用!
山野設施維持困難，大家用加水站或飲水機時，敬請有公德心:
- 保持衛生，加水站唔好用嚟洗手、洗面，甚至洗腳
- 加水站係用嚟斟水，請自備水樽，唔好直接放個口入去飲水
- 加水站係使用過濾器，而過濾器係有壽命，所以加水站最好用嚟斟水，如果洗燒烤叉、洗毛巾、洗衫，請用返水喉
- 請小心使用，唔好太粗暴，壞咗嘅話大家都無得用
- 郊野公園亦有飲水機，但留意疫情期間暫停使用
加水站資料: 漁護署
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。