因為毅行，我開始行山；
因為行山，我了解自己更多。
毅行比賽一路上，我以平常心mode去行，
不過，原來我對自己係有要求，
Hea到一個點，再也忍不住，就衝，就跑。
毅行者講求的都是團隊合作、配合，
這些需要與人互動的事情，
都是我比較弱的地方。
當我太快一支箭走左去既時候，
偶爾都有其他參賽者以為隊友們捨我而去，
就問:「點解得你一個?你d隊友呢?」
又，麥3途上，為左趕及會合水浪窩Fitz support team和突然話過黎支援我既朋友，我選擇了自己先跑，快了半小時到達。
又，為了不想我的朋友放工坐的士趕來支持我一陣就要走，我寧願自己一陣追返d隊友，而選擇停耐一d(水浪窩位置前後停左一小時)
起初我孤身上M4，全石屎路，完全冇意慾想快腳追隊友，直至山路出現，我又開始”上身”，無論上山落山，手執頭燈，遇人過人，為既就係唔想隊友等。
----- 廣告 Ad -----
大概個半小時，我自己過左自己隊友都唔知，隊長大嗌:「Voice你唔好再跑喇你已經好耐冇一team人一齊行」
依句說話有如當頭捧喝，
好，就慢返d.,,之不過，我真係忍唔住，愈行又愈快，之後，又係遇人過人.,,
我，就好似甩繩馬騮咁.,,
去到獅子山已經零晨四點幾，
就算平時二點幾先訓既我經過左半日既山路，
唔眼訓就奇啦，嘩，原來一個人可以好脆弱！
響我果陣冇乜意識之際，收到我另一個朋友whatsapp問我幾點到金山.,話過黎陪行。
我話「就到」，嚇死佢，因為比預期快好多，哈哈，惟有約城門等陪行針草帽。
不過因為我朋友過黎城門都需要一d時間，我惟有叫隊長同隊友先上針山，原本隊長否決，不過，我有我的堅持。大概半小時後，朋友到左，我地就一路上山一路吹水，十分寫意。
去到鉛鑛坳終於追到隊友們，就一齊行落去大帽山CP.,,
因為上次操小雙坳一上大帽山就撞牆，令我好有陰影。之不過今次冇事，一路順暢，慢慢行下望下風景，好舒服，如果唔係比緊賽，我會訓響到吹風～
----- 廣告 Ad -----
我發現原來石屎路係我剋星，真係即刻冇力，要朋友拖行先搞得掂去到大帽山波波.,然後，就係我另一個剋星：長命斜，我個膝頭已經傷傷地，不過今次唔覺膝頭痛喇，因為我腳腕既痛(其實未到M2已經開始痛)已經蓋過左膝頭既痛，認真無得頂。
一去到荃錦坳就出事，我生水泡，唔單止腳趾，仲係腳板有一大個。原來水泡先係最強大佬，因為你每踩地一野都一定掂到佢，嘩，好慘，寧願捱痛，我都唔想立即處理！
就係因為水泡，搞到我條生命值見紅，
就係因為水泡，就算我有力跑，依家我連企都唔多掂。
陪行既師兄響CP9拖住如同死屍既我行，我形容唔到自己有幾痛、有幾攰、有幾眼訓，
我只記得，我沿途問左好多次「行完未？」
有幾次痛到停低，
去到有一刻，我好大力一手打落自己大脾，唔係拍鬆肌肉，係發自己脾氣：點解我咁無用？
又有一刻，諗起”要學習與痛做朋友，好好共存”
真係㗎，人生流流長，無可能事事順境，總會有d日子係難捱d，避免唔到～
惟有咩？頂硬上！
臨尾果幾K跑住去，係跑，跑慣左連水泡都打撃唔到我，因為已經痛到無feel～最終我地Silver Hunter隊以29小時49分鐘完成。
今次比賽一路上有遇到幾個行山朋友，又遇到好多谷友，為我打氣支持，或者行住山/跑住山咁吹水，更遇到Fitz讀者，話等睇我既賽後感言；遇到行山人士，一個二個為已經半死既我打氣叫加油…
多謝你地，簡單一句鼓勵，已經有好大power!!!
----- 廣告 Ad -----
正如一開始我話因為行山，我了解自己更多。
我係一個好hea好散漫，得過且過既人，冇人生計劃同目標。
不過當我遇到一樣野可以令我好有興趣，我就全情投入，極度認真，好有動力，從小到大都零運動既我，無諗過行山/跑步/跑山就係其中一樣。
有自己一套思維、堅硬頸、對自己有要求、進取、有鬥心。
所以黎緊既日子，應該會向個人賽發展。
P.S.有興趣睇我毅行當日既相，可以去我facebook相簿[2015毅行者，我的第一個大型比賽]
再次多謝曾經支持、鼓勵和關心我的你們！
更多:
Fitz.hk Facebook專頁
[毅行者] 愛比一切更重要
訓練與休息的微妙關係
Voice [email protected]
Fitz Hiking 行山
