[挑戰越野賽] 體會人生路

三月份期間，團跑隊員邀請我與她們一齊參加「元朗越野賽21km隊制賽」！

其實跑步已為我人生寫上新一頁，跑左大半年，速度未算快；所以根本無諗過會參加越野賽事，仲要係隊制賽，對我來說好似係好遙不可及嘅事情。

我認識嘅越野賽就係要响山路跑黎跑去–真係又越過高山又越過谷，自問吾係一個斯文嘅人，但跑山真係唔容易！但我竟然吾怕死，一囗應承她們！

曾經與朋友去行山，我都只可以一步步慢慢行，有時仲要朋友協助，幾經辛苦先到達獅子山山頂！

到達山頂感覺好似大地在我腳下

至於今次，由正式報名到賽前一晚，第一次因為參與賽事而感到有壓力！隊制賽吾係一個人嘅事，我擔心會拖累我嘅隊友！始終每個人參加比賽嘅目標會吾同，今次我吾可以只為自己負責，只顧享受比賽過程，我知道我需要配合大家！

「烈女．夜遊隊」隊制跑手

隊友們都知道我缺乏行山、跑山經驗，所以不停支持、鼓勵我，教我選購跑山鞋；跑團隊友在賽事前更發起「賽前試路」，我當然瞓少幾小時都要參與啦！

試路線，大家開開心心咁跑吓行吓

試路線當日天氣好好，路亦不太難走，即時把我內心壓力減低了。

賽事前一晚，跑友通知元朗區正下著大雨，我最憂慮嘅問題出現了。一向都不怕「雨戰」，渣馬已嘗試過了，平時練跑亦吾介意淋雨，點解今次會擔心？！因為山賽嘅路會比一般馬拉松嘅賽道更難，擔心自己論盡會受傷而影響隊友！所有嘅擔心令我整晚不能好好入睡！

零晨四點半起床準備往元朗出發，天仍下着雨.……點算好？！幸好到達場地時，天氣一直很好，甚至出太陽，上天對我實在太好了！大部分嘅路已乾，水氹亦不算多！

亦要多謝男跑友全程刻意放慢自己速度，為的就是照顧我們「女子組」

其實山賽比路跑變化較多，每踏出一步都要思考過、避開長滿青苔嘅石塊，但當中過程卻可以欣賞沿途美麗風景，我諗我已愛上這活動！

第一次玩山賽，這個獎牌亦得來不易

我覺得越野賽更加係人生路嘅寫真，路途上會有上有落、迂迴曲折、預計吾到嘅絆腳石、泥氹，雖然要小心翼翼，但每跨一步眼前見到嘅風景都係令人精神為之一振，當然亦會遇上難走嘅路，什至會跌到受傷，越怕就越難行，不如大步向前跨過去，就會見到更好嘅前路

而隊制參賽就係另一種學習，有如工作及家庭，與同事、親人都要互相體諒、幫忙，如果只顧自己感受、表現或推卸責任，只會令整個大家關係更差，所以必須要互相包容、學習、欣賞！

今次賽事令我領悟更多，又一次成功挑戰自己，原來我都可以做到，可以在山路上跑跑跳跳！

更多：
Fitz.hk Facebook專頁
用雙腳跑出人生新一頁
我是 Rain Lady
[狂野行] 0.1至42.195的蛻變
Fitz Running 跑步