[揸車去行山] 4大熱門郊野停車場

我山雞雖然平時都有部「錢七」代步，不過去行山嘅話，都盡量會坐巴士坐地鐵。除咗係為咗盡量製造少啲污染外，亦係因為揸架車去行山，其實比搭車仲麻煩，因為：

1. 行山勝地通常好難搵位
2. 揸架車去起點，行完山就要由終點去返起點攞車，意味住行山嘅路線好大機會要走回頭路。

之但係，有朋友係愛犬之人，話想車隻狗去行山，問我可以泊邊到喎。我就試下講我熟悉嗰幾個停車場啦。

烏蛟騰

• 烏蛟騰路盡頭有20個左右合法免費停車位。若無大型活動，早上九點前都有機會搵到位。
• 車場無位，沿烏蚊騰路兩旁都有避車處。嗱，抄唔抄我都唔知。不過呢兩年我泊過大概5次，都仲未有事嘅……

泊車難度（5星最難）：2星 (指泊街)
熱門景點：吊燈籠可遠望Double Heaven嘅印洲堂，三椏村有走地雞食、荔枝窩海岸公園……

北潭涌

• 北潭涌巴士總站有幾十個私家車停車位 (免入錶)。但由於北潭涌係熱門行山地點，車位難求。喺每年9月開始，行山比賽高鋒期，朝早九點去到都未必搵到位。
• 唔少人其實行半朝已經會走，大概11點後會有一批車走。
• 保良局度假營若無活動，會提供有日泊車位，大概100蚊。
• 連保良局都無位，就係要沿路搵地方泊。我就試過泊到去某條村入面嘅爛地，行番北潭涌要成半個鐘！(真係揸乜鬼車丫)

泊車難度（5星最難）：4.9星
熱門景點：香港三尖之一蚺蛇尖、萬宜水庫、大枕蓋、赤徑、浪茄、大浪西……… (真係多到數唔晒)

(注意：因為北潭涌實在太難搵位，有人喺停車場周圍泊。我山雞親眼見過，因為啲人太猖狂，警察call晒拖車將亂咁泊嘅車拖走。大家唔想行完山仲要去警局攞車，就咪咁狼死啦。)

大棠

呢張相肯肯定係閒日影，假期邊有咁少車呀。

• 大棠停車場有大概20個私家車位。假期會一早爆滿，不過流動都算快，大概等半粒鐘都有位。(除非睇紅葉旺季)
• 好多人都會泊喺燒烤場嘅路邊。不過我唔建議囉。
• 大棠山路入口嘅餐廳對出都會有人泊。

泊車難度（5星最難）：2.5星
熱門景點：大棠自然教育徑、紅葉、吉慶橋、元荃古道……

城門水塘

呢度兩邊都可以泊到8至10部車。

• 嚴格上佢唔算係停車場，不過喺燒烤場公廁繼續往前走，到閘口前可以泊到大概10部車。而沿路平時亦會有人泊車。不過如果太多車又有人唔生性亂泊，會有警察抄牌。
• 城門道出面嘅和宜合村，有兩個錶位停車場，行去小巴總站只係15分鐘。

泊車難度（5星最難）：2.5星
熱門景點：金山、針山、草山、大帽山、城門水塘、馬騮……

今年年初三，太多人泊晒喺城市水塘嘅路邊，結果要動員警察趕車，走唔切就被罰320囉。

注意事項：

1. 記得留意泊車嘅地方有無大型活動。譬如話明知北潭涌跑馬拉松，咁停車場肯肯定唔會有位啦。可參考：Fitz.hk《香港長跑行山比賽》
2. 真係逼不得已要泊街泊路邊，就睇清楚會唔會阻住其他車出入。我試過喺北潭涌畀個泊車L頂住，要廿幾手呔先走到！(留電話啦)
3. 泊路邊記得留電話，真係會有好心慈母會抄牌前打畀你架。
4. 千祈千祈千祈唔好泊巴士站，超級無品，阻人上落車。同埋巴士車長通常會報警。
5. 盡量唔好泊車村。你唔知會唔會阻到村民出入。而據講村民會有自己嘅方式辦事……
6. 揸車去行山真係下下策，最方便始終都係搭車。

更多：
Fitz.hk Facebook專頁
[行山考牌路線] 杯靈雙渡
[走入台北山徑] 5條捷運可達的步道
崖上的PingTing，東龍洲做營人，真美!
Fitz Hiking 行山