[毅行備戰2016] 路線分析: 第三段 北潭凹至水浪窩

牛耳石山遠望的西貢海

第三段：北潭凹至水浪窩（CP2—CP3）

標距柱：M049-M069
距離：10.1 公里
途經：北潭凹巴士站起步，即上400百幾米高的牛耳石山，之後過密林，到嶂上（有「許林士多」可補給）。離開嶂上，經過雷打石，大上大落，並要經過碎石路。到雞公山谷底，要爬升約400米之雞公山。最後，落長命樓級到達水浪窩西沙公路。（CP3之檢查站是在麥徑第四段起點)

1. 毅行圈子裏，第三段可說是大多數人心目中嘅「大佬」。論距離它並不比第四段長；論高度肯定比大帽山針山矮；論山徑嘅路況，亦未必比大帽山艱難。但它集合了所有麥理浩徑要面對環境：上山、落山、碎石路、密林、長樓級……
2. 正因為它集合了十段麥徑嘅所有情況，所以新手想嘗試毅行滋味，就叫佢行第三段，十之五六之行山新手，行完之後連報名都唔想。老手開始新一年度毅行練訓，第一課好多時都係行第三段，因為一段路可以試到自己所有技能有無生疏。 (請參考《[毅行備戰2016] 如何挑選你的隊友?》)

嶂上的密林

注意事項：

1. 根據非正式統計，第三段係最多人退出嘅一段路。若果心理同生理準備唔夠的話，真係好易投降（仲要你之前已行完廿幾公里）。而且，因為大多數參加者行到呢度已經入黑，心理上亦較脆弱。所以，可將第三段安排多幾次練習，始終打多幾次大佬，都容易「升呢」啲。
2. 由於呢段路路況多變，裝備上作充分準備，如穿上抓地性能較強嘅跑鞋或行山鞋，以及可考慮帶備行山杖。
3. 補給：全程只有嶂上有士多，但士多老闆許先生平日未必開門。若行到中途唔夠水，要到終點水浪窩公廁汽水機先買到水，而汽水機亦成日畀人禁晒啲嘢飲。 (毅行當日，許先生會喺嶂上路邊恭候大家。大家記得帶錢買嘢食。)
4. 目標時間過30小時嘅朋友，到達第三段應已天黑。可在此段練習夜間行山。
5. 炎夏行呢一段，真係要帶備充足食水。特別係上雞公山一段，極為悶熱。(記得帶扇帶遮)
6. 咁係咪要喺夏天避開唔好行呢一段呢？咁又未必。因為喺酷熱天氣下行雞公山，真係可以令戰鬥力一下提升唔少。

雞公山碎石路

到達CP3的目標時間：

• 全程25小時：7小時45分（分段2小時45分）
• 全程30小時：9小時（分段3小時15分）
• 全程35小時：10小時（分段3小時30分）

註：有關「目標時間」

(按圖放大)

參考自樂施會官網2012年參加者小冊子，千祈唔以為係行貨，根據本人經驗，佢列出嘅「目標時間」極有參考價值，計埋路況、山徑艱難程度，甚至休息時間。參加者依住佢個時間，可控制自己步速。

至於我只列舉25至35小時作參考，是基於對新手來說，這個時間概不用捱兩晚眼訓，而又不太難去衝破。當然，提多一次，呢個毅行備戰系列主要為新手而設，各位老手有咩心得，記得留言同我多多交流呀。

更多資料：樂施毅行者官方網頁

更多：
Fitz.hk Facebook專頁
[毅行備戰2016] 路線分析: 第二段 大浪西灣至北潭凹
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山