前為大浪西灣，後面的是鹹田灣。
呢一段嘅路線同往年一樣，除非今年又有村民封路啦。不過，受6月份嘅大雨影響，第二段有多處地方有山泥傾瀉。載至7月初，政府嘅講法係「唔建議村民或旅客行經嗰度」(公告)，而出入西灣亭嘅穿梭巴士29R亦暫停服務。
根據山友嘅講法，山泥傾瀉受影響嘅地方，雖然有泥頭阻路，但係絕非不能通過。只要慢慢爬過泥頭，就可繼續行程。
操練毅行嘅話，亦避唔開呢啲問題，大家唯有畀啲耐性，行慢啲囉。
第二段：大浪西灣至北潭凹（CP1—CP2）
- 標距柱：M031-M049
- 距離：8.8公里
- 途經：離開大浪西灣後，越過小山落鹹田灣，再上大浪凹落赤徑，再上長命斜達北潭凹CP2。
- CP2官方補給：北潭凹為基本補給站，有齊基本補給飲食（水、麵包、熱飲、熱湯、水果等）
- 民間補給：大浪西灣及鹹田灣有多間餐廳士多，由汽水寶礦力以至餐蛋面一應俱全。其中鹹田灣海風士多更有即炒飯麵。
赤徑靚景。當然，行緊毅行你都未必有心情睇。
----- 廣告 Ad -----
路況：
- 途經兩個沙灘(大浪西及鹹田灣)，小心鞋子入沙（算啦，之後80公里你都唔會再見到沙灘了)；
- 基本為石屎行山徑；
- 由鹹田上大浪凹以及由赤徑上北潭凹，俱為長命大斜路；
樂施毅行者官方地圖：
不少人選擇在CP2大休。但若在鹹田灣食過飯，則可在此作簡短停留，再進入第三段，唔使同人逼。
第二段注意事項：
----- 廣告 Ad -----
1. 目標時間 (註)：.
- 全程25小時：CP1到達時間應為3小時15分，CP2則要1小時45分
- 全程30小時：CP1到達時間應為3.5小時，CP2則要2小時15分
- 全程35小時：CP1到達時間應為4小時，CP2則要2.5
2. 補給/食飯：最遲一組出發（中午12:30）的朋友，若果屬30小時左右的慢腳，到達鹹田灣大概下午五至六點（到CP2已天黑了）。我的經驗就是索性在此食晚飯，免卻麻煩Support Team之餘，又有熱飯可食。記住，未來廿幾個鐘，你唔係捱麵包，就係要冷飯凍湯架嘞。
3. 出大浪西灣往鹹田灣，到大浪西沙灘最左方時，要穿過河流上山。但河流經常改道，勿因心急過河而弄濕鞋襪。
4. 落鹹田灣的正式麥理浩徑，要穿過矮樹林。但該處或有積水，容易整濕鞋襪。我會選擇穿過沙灘，過橋路經士多，再接山徑。
5. 呢一段路程唔算長，路況甚佳。但仍要記住：仲有個鷄公山等住你爬，留下力啦。
註：有關「目標時間」
(按圖放大)
參考自樂施會官網2012年參加者小冊子，千祈唔以為係行貨，根據本人經驗，佢列出嘅「目標時間」極有參考價值，計埋路況、山徑艱難程度，甚至休息時間。參加者依住佢個時間，可控制自己步速。
至於我只列舉25至35小時作參考，是基於對新手來說，這個時間概不用捱兩晚眼訓，而又不太難去衝破。當然，提多一次，呢個毅行備戰系列主要為新手而設，各位老手有咩心得，記得留言同我多多交流呀。
更多資料：樂施毅行者官方網頁
----- 廣告 Ad -----
更多：
Fitz.hk Facebook專頁
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山
