[毅行備戰2015] 決戰前夕 5項注意 (參加者及支援隊適用)

自稱做「小編N號」嘅家聯，拋個波畀我，叫我喺樂施毅行者起步前一日，送最後一個備戰錦囊畀大家喎。唉，佢之前已經由食飯、瞓覺、飲水，甚至去廁所都講埋，我仲有乜好講呢？

事實上，呢個時候講多無謂，大家休息多啲，唞足精神好過。當然，今日嚟講，千祈唔好忘記keep住飲水食嘢，儲定多啲能量。

不過話就話無乜好講，但始終有啲規條上嘅嘢，都應該要提下大家。

1. 登記手續
老實講，我山雞搵勻樂施會網頁，都唔肯定登記時要唔要身份證核對身份，但問過幾個毅行老手，大家都不約而同都有帶身份證。點都好，帶咗無壞，最多用完咪塞入背囊暗格囉。

另外，如果要更換隊員，亦記得帶cash。而報到前亦要簽一份免責聲明，所以亦最好預備一支筆以備不時之需。

2. 善款
大家完賽之後唔好開心過頭無咗件事，記得喺一個月內（12月22日前) 將籌得善捐交畀樂施會。根據民間嘅講法，無交或者交唔足善捐嘅隊伍，所有隊員都會被列入黑名單，要交番善款先可以再報名毅行者活動。

3. 網上追踪
大會喺星期五11月20日嘅下晝3點，正式啟動網上追踪網頁，大家可以即時追踪各隊伍嘅進度。而支援隊亦可依照隊伍嘅進度再安排支援嘅時間。不過，根據經驗追踪網頁不時有延誤或當機，資料真係僅供參考。

(網上追縱系統超連結﹕http://otwtracking.oxfamtrailwalker.org.hk/)

4. 泊車
今年樂施會新安排，每支隊伍只能安排一部私家車進入終點保良局度假營，而且只係進出一次。相關車輛亦記得帶備泊車證。

此外，支援隊喺其他支援點（包括起點）亦好好計劃泊車位置，熱門支援點，如水浪窩、城門水塘等，往往插針都插唔入。如果物資唔多，或人手許可，反而搭公共交通仲有著數。

5. 環境衛生
支援隊喺完成任務後，唔該清理好啲地方，亦盡量將垃圾帶出市區再棄置或分類。始終麥徑屬於郊野範圍，就算有垃圾桶，都較難將垃圾運走。

最後，忍唔住都要講多次，參加者今日就記得飲多啲水，食多啲嘢，休息多啲，好好迎接聽日嘅人生盛事啦。

「行到邊，總有夥伴喺身邊」
“Side By Side, Together We Thrive”
Fitz全力支持樂施毅行者2015

#Fitz.hk為樂施毅行者2015媒體伙伴

更多：
[毅行速報] 10個路段 1次剖解
[毅行速報] 最完備的物資裝備清單
[毅行速報] 組織你嘅支援隊
[毅行速報] 最後的備戰階段
毅行者@Fitz.hk
Fitz Hiking 行山