Fitz > 運動 Sports > 行山 Hiking > [獅子山精神隊] 做毅行隊長的五大反思
隊長Law少許耀斌  攝影：威濂臣 William Leung

1. 唔好抖咁耐，做唔做到?

每一年都聽到「唔好停keep住行」呢一類型嘅忠告，但每一年都係軍心散渙，越抖越耐，無行過嘅不知者不罪，行過十年八年嘅我，依然在開步前覺得可以唔停咁耐，但後來又係繼續停。然後失敗完下一年又繼續咁諗，仲企圖咁執行。呢個唔係反思，直頭迷思。我相信唔少人未行之前都一樣，究竟點先執行到呢? 我宜家夠膽斷定24小時內完成嘅人就有能力執行，簡單講有體能個心就唔想抖，想抖即係攰，即係根本有心無力，只係想坐下。人嘅自制能力都需要體力，更何況毅行中，身心俱疲，根本無自制能力。所以，行24小時外嘅，預咗後面找數，亦係過去兩屆最後跑狗衝30嘅原因。

左起 Law少, Willy 黃宗顯醫生, Jacky, Raymond


2. Support Team 人多定人少好?

今年 SUPPORT TEAM 不論膳食同陪行都破歷年之冠，肯定過50人。就好似初戀咁，第一次玩就有咁行搞到咁行。以前我會覺得快 TEAM 少 SUPPORT 更快，慢 TEAM 多 SUPPORT 更慢。今年一帶三咁嘅形式，有人幫手夾人通頂上山，作為隊長先可以抖啖氣。所以最重要唔係人多人少，係事前有無好好 brief 嚟 supoort 嘅人，好似通宵第四段三組二夾一真係多得幾路英雄先做到。而有經驗 support 真係連嗰刻胃口如何都計埋真係好正。

3. 究竟四個人係咪要全程一齊行?

又係返去最根本問題，快 team 得，慢 team 本身個個都係靠意志，意志強弱無可能時時一樣，當然各行各、意外、迷路、受傷，慘慘豬自己一個機會大增，但實際並非如此，關鍵在於有無陪行。曾經得一個陪行上雞公，夜媽媽隊友同後來嘅陪行身邊過咗都唔知，又要等，唔知有無事，又好難逆線回頭搵，好在差不多決定回頭搵之際，發現原來上咗頂。之後有人陪，聯絡方便，可以按各人狀態向前走，務求平均最快到達。

4. 適當時候狗衝?

我被上年 support 人10小時走78910段嘅經驗所累，經常覺得到尾可以衝，追回時間。事實30幾小時嘅人可以試，但超過40小時嘅無謂試，因為可以快嘅前面都快咗，除左係瞓咗幾個鐘嘅人先會到呢一刻仲有力。所以唔好次次抱呢個期望。

5. 情緒點控制?

到尾段，成隊人最有經驗嗰個係我，但當有成班人嘅時間，情況就好似中央政府出 order，地方政府未知道個用意，跟D唔跟D，結果我都著咁燈幾次。我癲咗嘅位幾乎全部係靚石屎路，包括上草山，幾經辛苦 RAYMOND 忍痛踱落針山，我連陪行者都先撇低，叫 RAYMOND 搭我膊頭，急步一陣就追返大隊，好之後拜託其他人，再搭膊頭拖 JACKY 同 WILLY (黃宗顯醫生) 上。好，一心示範完一次，就手交手咁俾其他 SUPPORT 帶，點知上到就頂，見到大家用品字型方式圍住 RAYMOND，由佢自己慢慢上，我匪夷所思，點解你地唔跟足去做呢? 我又死死地氣再拖 RAYMOND 上。喺呢個情況下上到草山頂，其中一位 SUPPORT 就成為導火線，佢話「好到頂，抖抖先」，我秒回「抖咩呀抖，呢度抖實吹死，去下面抖!」（宜家諗返非常唔好意思，因為大家都按自己所諗去做，真係攞我命。

同樣情況，第九段朋友嚟到幫 RAYMOND，以半個鐘一公里咁行，真心等到炆，我又癲：「你唔可以由佢自己行，真係要推(動)佢!」到第九個站，我癲咗大叫，要四個一齊行，要四個一齊行，因為下個站已經到終點，仲想分散到幾時? 我爆咗幾鑊，但回想返辛苦 support 受我脾氣，佢地不知者不罪。但原來份經驗寶貴在你睇到全盤情況，而對方只睇到呢一刻 (即係無concept)。避免唔到兩晚通宵，都要避免48小時完成唔到嘅危機。俾我再做，都係要爆多鑊，因為大家都係義務性質，一定係實地執行調教。

最後反思

衝完終點，50%嘅人入醫療室，我心諗：

係咪真係太勉強呢? (非常感恩 RAYMOND 一家都喺度，無埋怨過我地一句，多謝你地體諒我地所做)

尤記得大會小冊子寫唔好勉強，但

「毅力」本身就包含勉強嘅意思，正常人唔勉強又點會行100KM呢?

去到差不多體能同精神上嘅最盡，完全行唔到，完全醒唔到，係為咗乜呢? 答案只有 RAYMOND 同 JACKY 知道。

第一次玩意外離場嘅 Grace 又係咩感受呢? 亦只有佢自己知道。 (見《2017毅行一記》)

如果你想知道呢份只屬於你嘅感覺，可出席我們的分享會。

獅子山精神隊 毅行分享會

  • 日期：11月30日 (星期四)
  • 時間：晚上八時正
  • 地址：彩恩堂 牛池灣銀池徑8號 (彩虹地鐵C1出口)
  • 對象：毅行參加者、支援隊，以至任何對樂施毅行者有興趣，及關心獅子山精神隊的朋友
  • 費用：全免
  • 主辦：Free Foundation
  • 登記：https://goo.gl/5Q1Jed (統計人數用)

Fitz 樂施毅行者

每年樂毅施行者，Fitz 都會組織一支隊伍，目的不是要挑戰時間，而是希望承傳毅行精神。今年我們以 Law少 許耀斌 帶領一支由精神康復者及精神科醫生組成的隊伍，期望可令市民對精神病有更正確的認識。

鳴謝行山鞋贊助：Merrell Hong Kong

>

樂施毅行者網站
樂施毅行者 Facebook 專頁

更多：
Fitz Facebook專頁
一次毅行一份情
毅行者的魔力
[樂施毅行者] Support Team 支援點攻略
[樂施毅行者] 毅行隊伍的「第5人」
Fitz 行山 Hiking

文章為作者意見，不代表Fitz立場。