利申：小弟係行山谷 (即係 Facebook 嘅行山群組) 嘅忠實 CD-Rom，只讀不回。山季開鑼後，唔少人會走上谷問嘢。唔少問題重覆重覆又重覆，變為月經問題 (甚至係周經或日經)。見到有啲谷友盡心盡力解答問題，好慘慘豬。
大家有咩要問，不如睇下呢度先。
1. 我想去大東山睇芒草，有無人可以帶我去? 我呢個星期三放假。
真心佩服谷中師兄/姐，可以循循善誘教佢哋點搭車、點落車、點搵入口，以至點樣走人。事實上，我真係唔明提出問題嘅師兄心態。你又唔講你自己有無行山經驗，年紀、體力，甚至性別都唔知嘅情況之下，人哋點敢一齊搵你上山呢?
2. 我未試過行山，想帶兩歲個囡行下山，請問有無路線推介? 行山要注意啲咩呢?
要解答呢個問題，寫幾本書都唔掂! 令人懷疑，究竟問問題嘅谷友真係想人答佢嘅問題，定係想喺行山谷R水吹？
----- 廣告 Ad -----
3. 想買支行山杖行山，見到淘寶 (或鴨寮街) 有幾十蚊貨色，其實用唔用得過?
百貨應百客，睇下你用支行山杖嚟打狗，定係用嚟行毅行者! 唔少伯伯嬸嬸拎支樹枝都可以行幾十公里。再加上，一分錢一分貨道理大家都明，你唔係真係期望鴨寮街貨色可以匹敵千幾蚊一對嘅 Black Diamond 呀話?
4. 行山鞋咩牌子最好?
理由同上，而且行山鞋真係好個人，有人腳闊有人腳窄，扁平足、高足弓都唔同玩法，最好真係去試下啦!
5. 我而家喺西貢，突然想行山，應該去邊到好?
我見過，我見係見過! 真係有山友實時教佢由西貢墟搭車去赤徑，仲教埋佢喺邊個路口入，邊個路口轉左轉右! (奇在佢中途可以搵到 network 上網) 不過，我就提醒大家，行山活動始終都帶危險性，未做好準備去行山，簡直係累己累人!
實用答案
上面5條月經問題，其實最佳答案就係呢條link：
----- 廣告 Ad -----
無錯，識上 Facebook 問大神，點解唔問 Google? 上面問題絕對可以上網搵到最合適資訊! (記得網上資訊唔好盡信，不過評判力同獨立思考呢家嘢，真係從小培育。)
Fitz 提提你：
任何行山遠足活動，必須在出發前作出詳細規劃以及準備，擕帶充足及合適裝備，以及告知親友目的地及回程時間。制訂路線，更要量力而為，注意補水，切忌逞強冒進。更多：《[顧己及人] 山野遠足安全常識》
更多：
Fitz Facebook 專頁
[KaiKuen] 瀑布灣
山友最需要咩保護?
[肥腸毅行前傳] 在水浪窩找到生命的意義
Fitz Hiking 行山
