HK100，有感而發

(圖片來源：HK100 Facebook專頁)

HK100，有感而發。

原本想早d發，但因為比賽後要專注學校分享，現在先有時間發，希望都不太遲。

1月26 號那天已被邀請出席一個港台節目嘅訪問, 講述返當日 HK100嘅情景同埋對大會安排嘅意見; 由於自己完賽時間尚早, 並未經歷過重災時段, 訪問前我盡量收集身邊有參賽朋友嘅意見之餘, 亦睇左唔少平台嘅 comment,務求多一點了解唔同處境嘅參賽者嘅情況, 多一點持平嘅態度去看今次比賽.

結果發現，有九成嘅參賽者仍然支持著大會，當中包括未腰斬已經中途退賽，唔知賽事已經腰斬，甚至係被困在山上多時，要由民安、消防拯救嘅選手; 節目主持人對呢個現象都感到十分愕然，不明為何因主辦「安排失當」而受盡折騰嘅參賽者，反而是力撐大會嘅主要群體。

歸納外間對今次比賽所提出嘅質疑及批評，主要有以下幾點：

(圖片來源：HK100 Facebook專頁)

(一) 大會應否取消賽事或延期
不只 HK100 或其他越野賽事, 所有戶外嘅競技賽, 包括風帆, 哥爾夫球, 單車等等，都需要面對天氣對賽事嘅影響。以香港來說，一般戶外比賽需要取消嘅指標，是懸掛三號以上風球以及黑色暴雨警告。然而HK100起步當日，氣溫縱是寒冷及大風，卻並無懸掛任何訊號，大帽山更未出現有結霜問題；在這種情況下，大會繼續如期比賽，確是不為過錯。

那，能否因應比賽嘅特質，或就著個別特殊嘅因素而作出取消，答案相信是可以。然而寒冷天氣是否一個取消越野賽嘅理由，那就恐防未夠充份。大自然就是越野賽的競賽場地，不同國家就有不同嘅氣候、地勢條件，而好多外國嘅越野賽事都在冰涼嘅氣溫下進行、甚至乎有些賽道是雪山群中奔跑；所以對一些專業及較有經驗嘅選手來說，因為身經百戰，在嚴寒天氣下作賽可以說是加常便飯、駕輕就熟，對其表現唔會有太大影響，甚至可以說是有利；就以今年男女子組均能打破大會紀錄來看，就足以解釋寒凍不一定係一個問題；只是對本地選手來說，確實係非他們所熟練嘅競賽氣候環境。

HK100 亦非只是一項普通嘅越野賽事，而係一項國際性嘅世界賽，係Ultra Trail World Tour 嘅第一站，選手成績均用作計算佢地世界排名嘅位置。就以今年來說，已經吸引左共50個國家嘅選手參加，可見賽事水平之高；也因為涉及多個國家嘅選手，除非有非不得意嘅原因，否則賽事確是不應輕言取消。

(圖片來源：HK100 Facebook專頁)

----- 廣告 Ad -----

(二) 腰斬時間太遲
當日就這個問題，我響節目中嘅回應是: 永遠都無一個 perfect time。

無論響什麼時間決定腰斬比賽, 總會有唔同嘅聲音、唔同嘅 concern；可以批評你還何不再早一點截停, 同一時間亦可以質疑 ｢情況都未去到最好差, 點解唔比我繼續玩落去？」(尤其係已在鉛礦坳嘅選手)

腰斬比賽，並不是大家想像中咁容易嘅事, 並非「話斬就斬」; 記得2000樂施毅行者亦因天氣問題腰斬，電台訪問過有關負責人時，佢亦曾表示｢腰斬係一個非常沉重同沉痛嘅決定」，而腰斬賽事所需要做嘅功夫，遠遠比繼續比賽還要繁複還要多，然而大會仍決定中止賽事，清晰地只為一個原因：safety has to be the priority。我相信大會一直有以參賽者嘅安全為首要，並慎重地評估過各方面嘅情況，才於這個時間性作出決定，當中相信已作了最恰當的平衡了。

張思縈Facebook

(三) 參賽者明知山有險, 偏向險山行
好多人都有個錯覺，認為呢次比賽嘅選手，就好似追霜者或趁打風嘅觀浪者一樣，刻意在嚴寒天氣先去跑山，將自己擺放在一個危險環境，結果弄得如廝天地，可以說是咎由自取。

這裡必須再三澄清的是：這個賽事所舉行嘅日子，其實早於去年已經決定，並非「即興」，只是比賽當日遇著不利嘅天氣，所以性質跟追霜觀浪者完全不一樣，不應混為一談。既然如此，我就以「突如其來嘅不利天氣增加左賽事難度及危險性」嘅角度去看，來討論「參賽者應否在開賽前已經要選擇退出比賽」。

其實我相信，大部份人心裡，都已經有著同一個的答案。

越野賽要比拼的，其實不單止是體能，還有人在山野及大自然中那份求生技能及意志，有能力從絕處發掘生機，可以從絕望裡看得到希望；所以面對嚴峻環境，其實可以是一份鍛鍊及操練；然而若然我只係因為艱苦、困難而選擇不作賽，那麼我就只能停留在現有嘅水平，永遠不能提升自己；無法跨越，無法突破。再者，作為選手可以隨時選擇放棄不出場，然而工作人員、義工又如何？佢地要比我們更早一步到達崗位，並一直要緊守到最後一刻，照顧每一個參賽者，直至比賽正式完結為止。當日比賽中有唔少義工係只得幾歲的孩子，猶記得我到達城門嘅檢查站，當時已經係夜晚十一時半左右；一個我相信只有7、8歲嘅外藉小朋友，兩頰同鼻哥已經凍得通紅，主動走來慰問我感覺如何、凍不凍，那裡有熱茶，那裡有毛毯……連小孩子都咁落力地去做好一件事，作為成年人嘅我，如果無盡力嘗試去應付過就選擇退出，我覺得，我會很對不起他們。

所以在我自己立場而言，我還是會選擇繼續作賽，寧願真的發現力有不逮才中途退出。至少從這個過程裡面，我有機會磨練過自己嘅鬥志，訓練過克服艱辛環境嘅能力，而更重要嘅係，認識退場所需要付出嘅那一份勇氣，那是比賽心態成長中十分寶貴的一課。當然，我也不以一早選擇 DNS 嘅選手為恥；畢竟每位參賽選手能力及水平不同，以保障自己安全為在先，亦是選手應付嘅一份重要的責任。

為左應付北極馬拉松，過去年半裡本地大大小小嘅越野賽事我幾乎都有參加過，HK100 係咁多賽事中辦得最好嘅一個。主辦了解越野跑手嘅各種需要、賽事中人力物力相當充沛、競賽物資亦十分豐富，比賽氣氛亦很熱鬧。就今次寒流襲港事件而言，大會亦立即作出不同應變，於比賽前已再三出過電郵提醒及叮嚀參賽者帶備足夠保曝衣物，並於起點有廣播提醒參賽者，臨時亦增設借用衣物服務以防有選手準備不足。檢查站中嘅熱水供應亦從不缺乏，每逢到檢查站都有義工走來慰問你有什麼需要及協助你補及；熱食亦早已準備好不用排隊等候，check pt 亦有太空毯、毛毯供應，亦有強制檢查每一位選手之必須裝備；部份檢查站更設有 camp fire 及暖爐供參賽選手取暖。大會亦將最後一段賽道作出更改跑入山徑，以免追霜者所駕嘅車輛有機會危害選手安全。

如此完善配套，如朋友所說, 所有 precaution 層面可以做到嘅事，大會真的已經做得十分充足。只是天氣變化從來不是任何人可掌管，大會亦無法阻止追霜者上山；其實大部份參賽者均能感受到大會辦比賽嘅那份專業及誠意，所以縱然救援工作受到阻礙以至飽歷滄桑，他們會體諒及明白並非大會責任；而且越野選手大多會有份克己精神，心境亦會有份豁然，對苦難亦會視作鍛鍊；他們嘅專注並不放在問責，而是如何從經歷參透及領悟人生。所以大部份選手會為大會發聲，我的朋友更希望我在節目中為大會平反，主要大家都是擔心若然因為一些不知就裡的群體胡亂作出批判，令政府日後進一步打壓以及限制批辨越野賽事，如此高水準、高質素嘅賽事因此不能再辦的話，那就真的是十分十分可惜。

其實自己一度也對追霜阻塞賽道及增加救援負擔有份斥責，但細心一想，香港出現百年難得一遇嘅奇觀，也難怪大家會有份趨之若鶩嘅心（比在自己發現外地有天文異象，自己亦真的即時飛撲去看）；何況追霜者亦唔知當日有越野比賽正在進行中；然而亦因為追霜者嘅存在，唔少虛弱、衰竭嘅選手都得到佢地嘅援手，得以取暖保溫渡過最危急嘅關口。在此再次多謝曾向參賽者作出支援嘅朋友，更加多謝大會工作人員、義工、消防、民安、警察，大家竭盡力氣不辭勞苦地為協助被困嘅參賽者以及市民，真的要向你地致敬。

原文載於張思縈Facebook

Hong Kong 100 Ultra Marathon Facebook

更多：
Fitz.hk Facebook專頁
[HK100] 義工面對生死的12小時
發生在 HK100 的幾件小事
[HK 100] 參加者自述：被困大帽山極地10小時
Fitz Hiking 行山