[Merrell Challenge備戰] 大城石澗終極一課

為咗備戰4月17日嘅全新比賽Merrell Challenge，Fitz Team三位成員喺清明時節照樣開操，到大城石澗進行終極一課！

Fitz Team介紹：

隊長：小昭
小昭要喺七周內完成八場賽事，Merrell Challenge係佢連續第5周嘅比賽。上次佢喺大帽山為咗唔畀人爬頭，怒衝落山，嗰份堅決同膽色，一定可以激發隊伍嘅鬥志！

隊員：WaiYi
去年韌帶嚴重撕裂後，仍制止唔到佢鋪行山癮，年底更開始復出參加各項山賽。在這之前，更懷疑再次撕裂（另一條）韌帶！好彩經檢查後，發現傷勢無大礙，可以出戰！

隊員：李照邦
囉唆大叔李照邦，自稱係山澗及定向新手，鬥志頑強，平時上雞公山當食生菜！

呢次佢哋訓練地點係大城石澗，難度同上次馬大石澗不相伯仲，幸好天公造美，順利喺黃雨前完成這一課。

完成後，兩位行澗新手講下佢哋嘅感受：

WaiYi：「第一次行澗嘅感覺好刺激，好好玩。體驗到溯澗技巧比起單單行山要高，身體平衡好重要，需要用到手腳加上腰力，判斷能力亦好重要，要搵啱落腳點，否則就會跣到損手爛腳。因為之前有玩攀石，所以感覺上會較易上手，不過都跣左兩嘢！我覺得膽量都好重要，踏出第一步，踩上不平嘅石上面時，膽量好關鍵。」
李照邦不失其囉唆大叔本色，列舉10大行澗要點：

1. 唔好咁stubborn，發現前無去路，就要後退，另找過河路線。
2. 唔好咁old school，發覺路線不明，就上網查，接受最新消息。
3. 唔好naked body，穿梭樹枝亂石，切記戴帽，手套有袖衫過膝褲。
4. 唔要backpack，避免鈎著背脊，宜穿水樽背心，輕裝上陣夠食夠飲就算。
5. 唔敢jumpy，容易跣腳朽柴，記著腳踏實地，除非好有信心。
6. 唔掉rubbish，愛護自然環境，自己垃圾自己帶回家，最好執起其他人遺留下來的垃圾，亦要發聲糾正其他遊人的不當行為。
7. 唔搞wild nature，珍惜花草樹木，飛鳥游魚走獸，只觀察留倩影。
8. 唔亂著鞋，底要夠軟咬地，內籠唔「界」腳，鞋頭保護腳指，濕水要快乾，今次號稱wet grip的新款山澗鞋還可以。
9. 最重要睡眠夠，拉筋足，平衡好，全身充滿muscle power。
10. 最後緊記safety first，睇天行事。

講到呢度，介紹一下溯澗裝備：

• 毛巾：濕水後抹身之用
• 襪：濕水後更換
• 求救哨子
• 繩：遇有困難路徑，用來借力攀爬
• 電筒
• 加固電子產品嘅防水功能
• 一般行山裝備：如糧水、急救用品等
• 若要溯澗而行，不用帶行山杖

當然，仲有最重要嘅一項裝備，就係一對適合的山澗鞋。揀選山澗鞋，有以下4個要點：

1. 溯澗易濕腳，鞋要排水功能良好。所以專業嘅澗鞋在鞋底有出水孔。
2. 輕便
3. 抓地性強：可以是鞋底嘅膠令阻力加強，亦可以是鞋底物質具彈性，可依附在石面上。但總體而言，澗鞋鞋底應比行山鞋為軟。
4. 保護雙腳：溯澗容易踢到石頭，鞋頭最好有特別嘅保護。

Fitz Team隊長小昭，經過兩次溯澗訓練後，總結揀選行澗鞋嘅重點：

「其實一般跑步、行山鞋排水都唔錯，而抓地性能，其實亦取決於用家嘅技術。所以我反而要重視鞋嘅保護性能，因為安全應該係最重要。」

至於佢哋呢次著住嘅大會指定鞋Merrell Capra Rapid，除咗符合揀選山澗鞋嘅4項要點，小昭對佢嘅保護功能亦相當滿意。

而另一位隊員WaiYi，就對Merrell Capra Rapid以下評價：「鞋型好貼腳，索繩設計除方便外，就係可以將鞋索到可以貼住對腳，減少鞋入面嘅空位，增加穩定性。鞋底舒服，暫時未出現腳底因鞋底硬而出現嘅痛楚。濕咗水後，好快乾。」不過，WaiYi都話天下間沒有不跣的石頭，所以行走濕滑路段，都要技術搭夠。

三位隊員，磨拳擦掌，希望喺4月17日嘅Merrell Challenge，締造佳績！

*Fitz.hk為Merrell Challenge大會媒體伙伴

產品提供：Merrell

更多：
Fitz.hk Facebook專頁
[Merrell Challenge備戰] 溯澗考驗你智慧
[很想和你行行澗] 送你3條一星級山澗 (附行澗須知)
[Merrell Challenge] 一次滿足晒三個願望嘅全新比賽
Fitz Hiking 行山