隔離阿婆成日話欺山莫欺水，但我就一直欺水莫欺山。
如果水追求嘅係刺激同技巧，山追求嘅就一定係磨練耐力同意志，完全另一層次，對於我呢啲跳跳紮無時停嘅人嚟講，喺水平線龍精虎猛，一諗到要上山其實真係怕怕。
但作為好勝心極強嘅傻婆，既然知道自己有恐懼，就硬係想挑戰佢，於是我又去咗行山。
雖然去大浪灣滑浪經過土地灣已經冇數咁多次，但第一次喺土地灣巴士站落車，由旁邊小路慢慢行上打爛呈頂山。
上山路嘅路其實都唔係太斜，以平時有做開運動嘅人來講都游刃有餘，再行一陣已經嘩一聲遠眺大潭灣同赤柱半島。
----- 廣告 Ad -----
突然間一個巨型黑影籠罩著整個地面，就好似一隻大鵰喺半空翱翔萬里，而且喺我頭上低飛略過，我即時抬頭一望！原來係一隻滑翔傘，優哉游哉咁喺天上滑行，見證著人類征服大自然規限嘅毅力同勇氣。
其實滑翔傘平時係大浪灣滑浪時見得多，但咁近距離見真係第一次，於是好勝嘅我又同自己講，有機會一定要征服埋呢個！
見完滑翔傘之後喺休息亭右邊的小徑向上走，好快就上到龍脊。
哩段路可以睇到整個石澳、大浪灣同遠處既清水灣半島，連小學雞學返嚟嘅四字成語都要用埋，真係美不勝收！
繼續沿山脊行就可以到達山脊頂，就好似被三百六十度景觀圍繞住我地，喺景觀台除咗可看到紅山半島同赤柱一帶，另一面仲見到一望無際嘅太平洋。
沿住小徑一路行，最後目的地到達大浪灣～ 我哋當然歡天喜地，滑浪去了！
其實對於行山嚟講，龍脊實屬BB級數，好多深山高人可能會覺得小兒科，但對於我來講，就得到一個好好嘅經歷，原來企喺另一個角度，另一個高度睇嘅世界，一樣可以好自由好舒服，我喜歡行山了！
至於實際龍脊路線係點樣行，唔使我講，因為好多地方都有，睇呢度啦！
更多：
Fitz.hk Facebook專頁
床上運動初體驗
向著太平洋流的鹽血，香港人到台灣花蓮衝浪小記!
PingTing C@Fitz.hk
