[小學雞去跑山] 未學行先學走嘅下場……

終於明白，未學行先學走係有幾荒謬。而當呢種荒謬發生喺自己身上時，真係想搵窿捐。

是咁的，我參加咗山野之王嘅半馬山賽。1月31日係大埔站，由大埔舊墟天后宮起步，經過九龍坑山、沙螺洞、屏風山、最後去到新娘潭作終點。限時4個鐘。話係半馬，沿途路程其實係15.3公里。計一計數，即係話每公里唔可以用超過15分半完成。

(按圖放大)

(按圖放大)

參加得，我都預咗要跑，始終呢個都係一個跑山嘅賽事，都係想借全呢個機會去train下自己。但我估唔到，一嚟我就已被斜路KO。

你見過無盡嘅斜路未? 嗰種上極都有，永無見頂嗰隻? 我見過，我真係見過。仲唔止一條，係一條駁一條。後來我睇番資料先知，原來嗰日嘅total elevation有成1050米。

有上必有落，上嘅時候我已經擔心落山時點算。比賽之前幾日落雨地滑，加上嗰段路有好多都係由好大舊石組成嗰種，而我呢啲技不如人嘅小學雞嚟講，真係只能用個「捱」字嚟形容。地下好多泥漿，成日都睇錯，踩咗落水氹就成隻腳濕哂，好彩對鞋保護性都算強，所以先無整親，不過睇下對鞋跑前同跑後分別幾大，就知今次真係出晒事。好在去到近尾時有位高手教路落山，先叫做順利完走。

玩過今次，真係有啲怕怕。山呢樣野，都係要學咗行先好學跑好啲。

更多：
Fitz.hk Facebook專頁
放監加碳小攻略
為咗加碳，你可以食到幾盡？
[email protected]