[拒絕郊野石屎化] 專訪曾小強：希望更多人關心香港郊野

原圖載於 “香港初級行山之友” Facebook群組

上圖係屯門徑最新嘅「石屎化」工程，以「天然石材」建造山徑，網民狠批「預咗仆死人」！

相信每一位熱愛郊野嘅朋友，對於郊野「石屎化」一定會加以反對。而「郊遊徑石屎化關注小組」發起人曾小強Stone，有更深切體會。

圖片來源：MiuMiu Mou on Facebook

人稱為「越野跑山王」嘅Stone曾小強，曾勇奪四屆「山野之王」總冠軍、四屆「雷利衛徑長征」及「樂施毅行者」冠軍等等。佢更係唯一勝出Action Asia Challenge嘅香港華人。此外，佢亦挑戰過環勃朗峰超級越野耐力賽（簡稱「UTMB」）同埋250公里戈壁沙漠長征。

由香港嘅山徑跑到外國嘅荒野，曾小強體驗過唔同嘅山徑，明白石屎山徑有幾唔妥。(請參考《[膠嘢公園] 曾小強：郊野石屎化的5大問題》)

「元荃古道有70%鋪石屎，舖咗石屎咪失卻古道意義。更加保護唔到環境！」

曾小強有見及此，就不斷參考外國經驗，希望可以獻計畀政府。佢結識咗美國山徑建築師Donald Hays。Donald應承可以幫手設計香港嘅山徑，曾小強仲籌得經費，資助專家來港費用，而政府就得到外國專家協助。

不過，政府至今仍未答應。

多個月來，關注組不斷參考外國郊野嘅路徑修築方法。

----- 廣告 Ad -----

「我哋去漁護署開會，佢哋話，自從佢哋負責修築山徑嘅陳木勝師傅退咗休之後，政府呢方面嘅人材買少見少。」

對於政府官僚嚟講，山徑舖石屎肯定係最容易，最穩陣嘅做法。石屎路既唔會咁快損耗，免卻維修問題，亦可予人「有做到嘢」嘅觀感。

「見到錦上路西鐵站上面，有個山頭竟然無端鋪石屎，仲用石屎整張石屎櫈。呢個山頭唔會有村民上去，平時真係行山嘅人先會去。」

於是佢連同其他有心人，同漁護署開會，但始終進展有限。而各個地區嘅民政署，亦無理喺山頭舖石屎路 (例如沙田道風山，以及屯門徑)。

曾小強希望大家可以一齊行動，關心我哋嘅郊野。

所以，「郊遊徑石屎化關注小組」，就會喺7月16日到民政事務署表達大家嘅關注，希望大家踴躍支持！

活動詳情：
日期：7月16日 (星期六)
時間：早上9時
集合地點：沙田上禾輋路1號沙田政府合署民政署
活動流程：會先向民政署遞交請願信，然後再一齊慢行至正進行石屎化工程的「道風山」進行實 地考察。

查詢：石屎山徑導賞遊

更多：
Fitz.hk Facebook專頁
[膠嘢公園] 曾小強：郊野石屎化的5大問題
[山友傳奇] 鵬哥失踪兩日的奇幻之旅
[郊野石屎化] 你揀木櫈定石屎櫈?[行山友剋星] 石屎山徑一條都嫌多
Fitz Hiking 行山