毅行朋友籌組支援隊，其中一項重要安排，就係安排膳食，搵support team做「外賣仔」，不過好多時熱心嘅朋友會做多咗都唔覺，毅行者去到自己安排嘅支援站，除咗上一集講嗰6項工作，仲有幾點要留意：
1. 聚舊搵日先
Support team有時會好熱心，準備一大堆食物，安排一連串節目，燒下野食，按下摩咁，又真係好令毅行者賓至如歸。不過，毅行萬事以時間為先，如果為會同Support Team聚會，令休息時間過長，又真係幾無謂。
我曾經見過有班support team，索性喺毅行期間搞中同聚會。佢哋十幾人，燒住野食支援毅行朋友。嗰幾位毅行者，見到班舊同學咁齊人，真係唔好意思食兩啖飯就走番上山囉。
所以，毅行者籌組support team時，不妨先小人，叫朋友們唔好搞咁多嘢。而support team亦應該以毅行活動為先，聚舊嘅嘢，慢慢唔遲丫。
2. 個人清潔
毅行者到支援站，食嘢休息之外，其實亦要爭取時間清潔下自己，亦要趁唔使排隊去埋廁所。
----- 廣告 Ad -----
而行山友大多不修篇幅，但毅行者其中一項挑戰就係捱眼訓。清潔自己，完全可令自己回復精神，其中包括洗面、洗身，甚至刷牙。而且，如果support容許的話，亦可以勤啲換衫、換襪。
3. 療傷
毅行者行100公里，身體小小唔舒服，完全可以放大100倍。所以，如果有傷，簡單至腳底起泡，肶位擦傷，其實都應該諗諗計處理好。毅行期間兵荒馬亂，雖然未必有足夠物資好好處理患處，但頂得一段得一段，膠布甩咗，可以再黐過。千祈唔好怕麻煩，怕嘥時間，有傷都唔理。
更多資料：樂施毅行者官方網頁
更多：
[毅行備戰] 到支援點要做的事(上)
[毅行備戰] 系列
山雞其他文章
Fitz Hiking 行山
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。