[印度孟買馬拉松] 一試難忘的冷門馬

 

其實我都幾喜歡嘗試新事物， 做一啲唔多人會做嘅事。 記得我人生第一個馬拉松， 都係響約旦跑， 貪佢夠獨特， 唔多人跑過。 近期得到航空公司 Jet Airways 嘅邀請，參加在孟買舉行嘅 Tata Mumbai Marathon (往年係 Standard Chartered 冠名贊助)，如此難得嘅機會，我又點會放過?

印度比人印象素來都係落後、破舊，治安欠佳同衛生差，大家都可能會質疑當地籌辦大型比賽嘅能力。不過我查閱返，原來 Tata Mumbai Marathon 都係合乎 Association of International Marathons and Distance Races (AIMS) 嘅標準賽， 究竟個比賽質素同水平又係如何的呢?

比賽嘅第一個步驟就係報名，以往我報外地賽事都試過遇上好大阻滯例如無英文、要用當地電話號碼而令我報唔倒。不過響網上報孟買馬拉松就十分簡易，輸入基本個人資料，用我地嘅信用卡比錢就已可， 報名費又便宜 (只係 50 美金)，報名後又即時收到 confirmation email，之後亦會收倒有關賽事資訊嘅 email，感覺相當專業同有系統。

除左全馬外，呢個比賽仲有半馬、10公里賽，有體驗式嘅 6.6km Dream Run，適合唔同能力嘅跑手參加。較新鮮的是設有專為60歲以上嘅參賽者嘅4.6km賽。我個人覺得呢個係一個十分窩心嘅安排，打破年齡局限，鼓勵年長跑者一同參與，十分有勵勉性。

航空公司每日有兩班直航往來印度孟買同德里嘅航班，適逢今年第二年成為 official airline partner，香港及北亞洲區總經理 Mr Anindam Choudhury 亦親身落場，支持是次 TATA Mumbai Marathon 賽事。當日抵埗已經係當地嘅午夜時份，所以大家返酒店後好快就就寢。之後我地先響孟買一d景點逛一逛，下湊我地就去 Expo 攞 racepack。猶記得當年我去約旦跑馬拉松，個 expo 係響一個類似麥花臣球場嘅公園度舉行，裡面只係攞號碼布並無任何嘅攤位擺賣，但孟買嘅 Expo 就響一個好似會展其中一個 convention hall 咁上下大嘅場館舉行，入會場需要經過安檢，會場攤位數目眾多，賣嘅貨品有我地香港熟悉嘅品牌，亦有當地的牌子，對比12月台北富邦及3月嘅首爾馬拉松嘅 expo，規模真的大得多。

跟其他熱帶地方舉辦賽事一樣，為避開日照最猛烈嘅時間，比賽起步時間都較早，全馬及半馬都係響0540起步，10km則遲半小時出發。我地半夜4 點就出車。如果自己嚟嘅朋友響午夜時份可以可以考慮乘坐篤篤、的士或者 call Uber，但需要留意嘅係孟買有 “sleepless city” 之稱，雖然在半夜時份交通仍相當繁忙及會有機會塞車，所以預備充分時間搭車，又或是選擇響起步點火車站附近搵住宿，咁會更容易掌握時間不會因為塞車而耽誤出發時間。

賽事嘅起步區只限參加者進入，參加者須帶上號碼布及經過安檢 (經過金屬探測器及逐個搜身)。起步範圍很大，幸好指示亦算清晰。洗手間數目亦很足夠，唔需要大排長龍。由於起步同終點響同一位置，寄行李唔駛擔心會因為輸送上有甩漏酬唔見左。但都有啲得意嘅係大會並唔係用 bib number 去寄存行李，而係好似響酒店寄行李咁再比一張有 number 嘅 luggage tag 你，張飛仔細細張所以要留意點樣袋好佢唔好跑跑下唔見左，除非你記得個飛仔嘅 number，如果唔係唔見左都應該會幾麻煩。

比賽有安排不同步速嘅 pacer 比跑手跟隨，賽道沿途嘅水站十分充足，跑左700m已經有一個水站，隨後大概每3km就有另一個。好多人都驚印度嘅水質會否好污漕飲到肚瀉，呢個問題完全唔駛擔心，水站提供嘅全是全新未開嘅細支支裝水，不過有好有唔好，變左無咁環保同要自己扭開。響水站後都會擺放幾個箱位提醒跑手要將d 水樽丟返入去勿胡亂掉在路上以免發生意外。但大會沒有提供 sports drink，取而代之係提供紙包裝橙汁同埋食鹽，通常係用啲柑點左啲鹽咁遞比你，我試過個味道都幾特別。至於食物補及除左柑外主要有朱古力、香蕉同餅乾，旁邊的觀眾都會自備一啲食品例如糖果，糕點等比你嘗試。或者多人都會擔心當地衛生問題，我同其他隨行嘅香港跑手都試吃過，結果都無什麼問題。

大會沿途都有臨時洗手間，還有海綿提供，賽道亦設有醫療站，有為抽筋的選手提供噴霧，路上不時有單車在巡視選手狀況，路口位置都有工作人員守著以免行人阻礙跑手前進，逢過 timing mat 前都有溫馨提示提醒跑手要記得踏過。賽事亦有 apps 可查閱成績、追蹤其他選手進度等等功能； 賽道上亦有唔少攝影師幫跑手拍照，我自己都中左好多槍有三十張相。整個比賽安排給人感覺都係有系統兼合乎國際水準，一點都唔失禮。

有樣野幾特別嘅係，elite 選手比我地遲一個半小時出發，跑跑下啲elite 就會追過你，人生終於有機會可以見倒啲 elite 跑手嘅風采同尾燈，好感動呀!

成個比賽熱氣氛都好熱鬧。途中有唔少位置有 band 隊演奏當地嘅特色音樂，亦有表演者穿著當地民族服裝載歌載舞，除左上橋嘅位置外沿途都有唔少民眾在旁側落力打氣，走入市區嗰部份更加熱鬧，男女老幼都為你拍掌叫你加油，我每逢經過小朋友身邊都同佢地 give me five， 多謝及回應佢地為我地咁落力地打氣。

一月已是印度較涼嘅月份，但天氣都有28-32度左右。然而因為孟買係沿海城市，未出太陽嘅時間都算清涼。縱然出左太陽，由於清早煙霞仍重，陽光不太猛烈，加上21km後開始走入市區有建築物遮擋，所以感覺都不算酷熱。30km後開始跑回出海邊雖然少左遮蔭，但以我 pacing 嚟講30km至終點的時間仍只係當地早上約9點至10點左右，溫度仍不算高，以我超級無敵怕熱嚟講都應付到，對比嚟講我當年跑柏林嘅感覺仲熱，半馬開始已經抽筋；而跑孟買馬至少到我返終點嘅時候我一直都無因為太熱而抽筋過。其實因應本地天氣嘅特質大會響響尾段亦設置左幾個灑水區，仲有冰包比參賽者降溫，安排相當細心。

逢係跑馬拉松，好多人就會關心，條路好唔好跑，容唔容易做PB。如果純以路況來，孟買馬拉松嘅賽道係唔難應付。除左響8至9km 同34.5至35.5km有明顯嘅上斜外，有好多時間都係響又直又長嘅四線馬路度跑，轉彎位亦唔多。由於參加者主要係當地人，人數不算多，以我大概跑4個鐘嘅 pacing 嚟講都全程都好多位跑完全唔塞車。路段中雖然有些唔短嘅暗斜位，但感覺上跟柏林馬差唔多唔難應付。走入市區嗰部份路線會收窄得兩線及有啲路面欠修茸，不過如果有接受開訓練的話呢啲情況對不足以構成好大影響。而賽道所經過嘅景緻都相當吸引，起點嘅火車站 CSMT 夜景已經相當吸睛，跑到海邊亦會睇倒海上清真寺 Haji Ali Dargah，跑上 Bandra Worli Sea Link 嘅感覺也相當浩瀚，而跑全馬的話上橋仲會有機會睇倒日出及孟買沿海嘅市景，路段走入當地民居天更會令你認識當地居民嘅生活水平同文化。賽道畫面如此豐富，路面如此暢順，氣氛又如此熱鬧，跑起來就更是投入起勁。

比賽亦有豐富嘅紀念品，今次比賽嘅紀念 t-shirt 是我咁多次跑馬拉松以來質素最好嘅一件。完賽後嘅選手有毛巾、公仔麵、生果飲品、餅乾。最別開新面嘅係全馬嘅 finisher medal 係可以一分為二，大會嘅理念係選手可以將完賽嘅榮譽及喜悅分享比自己嘅 supporter，相當別具心思。

整體而言，孟買馬拉松確係十分好玩。大家第日想出外跑馬拉松嘅時候，不妨考慮下嘗試孟買馬，這絕對是一個相當不俗嘅體會及選擇。

更多：
Fitz Facebook 專頁
[台灣最高峰] 玉山之旅分享 (多圖)
[清澫馬拉松2017] 好抵玩海外馬 一玩難忘
香港長跑行山比賽
Fitz Running 跑步

---