成日有勵志 Slogan 話「辦法總比困難多」,但筆者我會話「嗜好總比時間多」。都市人生活忙碌,尤其係香港呢個工時世界第一長嘅地方,扣除食飯瞓覺,能夠用黎發展興趣嗜好嘅時間空間,已經少之又少。而响云云嗜好當中,選擇利用呢啲珍貴時間黎玩運動嘅人,都要有番咁上下意志堅定,因為大多都要面對一系列無盡嘅抉擇。

運動項目的抉擇

鐘意玩運動嘅人,都係好動一族,單項運動好多時都滿足唔到我地。但係運動項目多如天上繁星,路跑、玩山、游水、單車、各式田類及各式球類,划艇風帆獨木舟等等,數都未必數得晒,更遑論要玩得晒。當中除左因爲時間實在有限,體力同金錢都唔可能無限量支持,所以選擇投入咩運動,都要睇下本身有咩條件。跟住落黎講既其他抉擇,就可能直接影響呢個決定。

裝備的抉擇

相信大家都聽過「輸人唔輸陣」、「裝備先決」、「工欲善其事,必先利其器」、「唔打得都睇得」等等形容裝備重要性嘅各式字句。事實上除左對靚同型嘅需求,合適嘅裝備又真係會提升到運動表現,甚至可以減低受傷嘅機會。可惜運動本身雖然係免費,但裝備從來都唔係免費,而且好多運動都要有專用裝備,除非大家都有私家金庫,又或者有品牌贊助,否則一般人都必須先好好篩選一番。各大運動品牌都不斷推出新產品、新款式,浄係衫褲鞋襪都千變萬化,仿佛不斷挑戰大家荷包嘅底線。不過香港玩運動通常仲有另一樣野幫你戰勝購買慾,無錯,就係地方!

香港貴為居住面積世界第一細兼樓價租金世界第一高嘅地方,莫講話大型器材,就算係一對運動鞋,要搵位安置都唔係易事。萬一買錯左件唔啱用嘅裝備,好彩嘅就搵到好心人接收,令裝備可以展開第二生命,唔好彩嘅就眼白白睇住佢佔用你珍貴嘅空間,又或者 total loss。所以各式裝備開箱文同用家包膠往往特別受歡迎,就係希望可以將選擇失敗嘅可能性減到最低。咁當然,我相信大家身邊都不乏 Buy them all 或者揀唔到就 Why not both 嘅朋友,佢地嘅煩惱可能就只係唔知用邊件好。

訓練與生活之間的抉擇

運動離不開訓練,而對成績有一定追求嘅,一星期幾課訓練都好正常。但係好多訓練動輒都以小時計算,耐力型運動如馬拉松、長途山賽、鐵人等等,更加須要不時長課,快則半日慢則用曬全日。對於有家室甚至有小朋友嘅師兄師姐們,莫講話工作要 OT,就算無事無幹,要搵時間出黎都已經唔簡單,所以先會有「獄長簽發臨時出獄紙」同埋「等價交換長課」呢類情況出現,否則贏左 PB 輸左頭家就真係喊都無謂。

而那怕無乜野牽掛住嘅,都一樣要面對各式各樣嘅娛樂消遣抉擇,打機、睇戲、行街 Shopping、睇波、睇書、玩 boardgame、同朋友聚會樣樣都非常吸引。尤其係大熱天時,仲要出去日曬雨淋咁辛苦,訓練時都不免要問番自己一句: 係愛呀定係責任呀?

比賽的抉擇

雖然玩運動唔一定要玩比賽,但無可否認比賽有佢獨特嘅魔力。除左禮品獎牌一籮籮,比賽往往令人更有動力邁向目標同挑戰自己,平日未必做到嘅速度或者距離,都有機會响比賽氣氛加乘之下有所突破。之但係正正因為咁,玩比賽嘅損耗往往比平常練習大得多,過份頻繁嘅比賽,會對身體做成一定負擔兼且容易受傷。

再者,近年舉辦嘅比賽愈來愈多,一眾主辦單位又良莠不齊,偶有大量參加者投訴嘅比賽,而比賽收費亦有愈來愈貴嘅趨勢,唔顧身體都要顧下個荷包。最慘嘅係,好多比賽舉行時間非常接近,甚至係同日發生,除非你識影分身術,否則都唔到你唔放棄。而一般人想比賽有好成績,每年其實只可以主打玩兩三個大賽 (輕鬆小型比賽另行計算)。如果想再玩多啲?絕對可以,但請先努力改進自己,變成外星人級別吧!

飲食的抉擇

玩運動需要一個強健嘅身體,而休息質量同飲食習慣都對身體狀況有住舉足輕重嘅影響。工作家庭各方壓力之下,香港人嘅精神就係無精神,所以休息質量真係好難話想有就有。相對黎講,飲食已經算係可以控制嘅一環。每日都盡量減少進食垃圾食物同飲品,一齊以營養及健康為先,達到補充同增肌之效。但問題係,辛苦得黎搵啖食,响美酒佳餚同運動成績之間,食慾同理智上嘅不停交戰,應該如何抉擇?

心態的抉擇

正所謂心態決定命運,呢個抉擇看似簡單,但正正先係最影響一切嘅源頭。每個人手上嘅資源同條件都唔同,但無論點充裕都無可能可以滿足一切需求,呢個時候就要識得將生命上不同嘅人、事、物都好好定下緩急輕重。咩對你先係最重要? 你嘅工作事業? 你嘅家庭? 你嘅愛侶? 定係你對挑戰嘅渴求? 只要你知道同辦清一切之後,自然地會將資源分配到合適嘅方向。當然,好嘅時間管理同財務分配都係一個學問,想玩運動玩得稱心平衡,就點都要下啲苦功鑽研,又或者作出一定程度嘅犧牲同妥協。

最後,希望大家都無選擇困難症,玩乜運動都可以痛快淋漓,無憂無慮。

Fitz 連結: https://fitz.hk/?p=101673

更多:
Fitz Facebook 專頁
循環泳線七不思議事件
在跑步運動上,你覺得自己係阿樂、比達定係悟空?
[email protected]


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 業餘運動的抉擇