原本計劃2017年第一項挑戰是渣打半馬,點知2016某月某日同事們講講下就爆左隊 男女混合@吓  出來參加左九龍街馬半馬,計劃趕不上變化,好刺激地街馬既半馬賽事成為我人生第一個半馬賽事。

今次街馬原本預期自己剛剛好3小時限時內完成,計返數月前練毅行練跑時自己既pacing係接近10mins /1km,係有可能完成唔到der~



半馬起步:
第一次跑大型公開賽事,作為一名半馬新丁(好似全隊都係),等待起步時我內心是又興奮又緊張又驚驚,哈哈哈。出發前,當然唔少得要做適當既跑前準備,拉筋,寄行李,食大會送既energy bar (出奇地好食) ,selfie,之後就係調整心情準備起跑。起跑後頭十幾k 我都同自己講唔可以停,直至觀塘繞道,因為貪新鮮,跑行車天橋一開頭覺得好過癮,好有動力,但過 turning point 後半段開始小腿有點想抽筋就停埋一邊拉拉筋,繼續再跑,心諗點解跑極都未完落橋既,呢個就是鍛鍊意志既時候了。「向著標竿直跑」(腓3:14) 因著有目標知道終點響邊,就知道只要堅持就會跑到去終點。軟弱既我明顯是訓練唔夠就開始停下跑下,停左一次就會有第二次第三次,剩餘既路程都係跑下行下咁,有太陽曬住既路段就用跑,無太陽曬既路段就行走,可能呢個方法係錯的,以致跑完就有些小中暑既情況。不過,感恩平安返到終點。

賽後檢討:

  1. 練習係唔夠既,好彩毅行後都無停止上山落山同下水既練習,哈哈,所以心肺功能應該比之前零運動習慣既我好左。
  2. 後尾用跑走法策略,跑下行下,好似對於我唔係好work ,人是軟弱有惰性的準沒錯,停左唔知幾多次,下次渣馬決定要搵返自己既happy pacing ,限住自己只可以停幾多次,set 個limit 。
  3. 可能因為飲唔夠水,又曬,爆汗,跑完企左陣,就見頭暈暈,小小中暑。如果大會有多點遮陽既地方可稍作休息就更好了。

最後超出我預期能在3小時內 (2小時44)咁完成到全程,已經好滿足!212既渣馬半馬目標要快過自己。



欣賞街馬之:

  1. 鼓勵打氣既人力物力陣容強大;
  2. 有牌匾提你跑左幾公里;
  3. 仲額外加d. 前面有靚女靚仔等緊你既字眼;
  4. 有熱情既打氣大軍;
  5. 仲有即場既 live band 在跑道外表演,好有氣氛。

其中最令人感動最深刻既係跑到觀塘繞道剛好是十公里準備起跑,我前後左右既跑友老手(應該係除非唔係)大大聲同十公里跑手講「加油 」,沿途亦都不斷聽到有跑友同隔離唔識既人講「加油」。在獅子山下跑步,見證住獅子山下既精神,好有愛,好難忘。希望下次既我敢大膽同唔識既跑友大大聲講句「加油」啦!

哈哈! 大家加油!

更多:
Fitz.hk Facebook專頁
[毅行者後記] 寫給自己的戰書
[找數真漢子] 馬拉松之旅 由街馬DQ開始
[金SIR教室] 我對街馬的3點觀察
2017 街馬賽後檢討
Fitz Running 跑步


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 渣馬前哨戰之街馬新手