[渣馬2017] 賽道內外的N個觀察

集合場裏場外的渣馬參與者嘅所見所聞，有邊件事會令你最難忘？肯肯定不能盡錄，歡迎 Facebook 留言寫低你見到乜！

跑手篇

1. 全馬比賽初段，前前後後左左右右，都聽到流利嘅普通話
2. 國內選手有趣舉動：揸支大旗跑、一字排開5個人一齊慢跑、突然停低等朋友 (係咪戰術嚟?)
3. 印有「廈門路跑會」嘅大旗，傳出惡臭，逼人跑快兩步
4. 昂船洲大橋，有人以普通話說：「青馬大橋真是很漂亮呀！」
5. 又係昂船洲大橋，有人以普通話截停一位跑手，說：「可以幫我拍個照嗎？」
6. 特首參選人令跑手違規：於賽道上selfie
7. 唔少跑手「留力」至維園，以吃奶之力衝線，險象橫生

圖片來源: 曾俊華 Instagram

賽道篇

1. 唔跑青馬大橋，青馬管制區變成無間地獄兜兜兜，汀九橋跑極都跑唔完
2. 全馬二組，過咗汀九橋開始曝曬，唔少跑手乾塘。成條三號幹線似足Walking Dead，千幾條喪屍喺天橋上行
3. 有半馬跑手跑錯路，上埋汀九橋！
4. 西隧出口入口加大咗抽風系統，隧道無咁焗，不過變得好大風，跑手想慢慢行都唔得 (因為好凍)
5. 馬師道12:50截龍。負責落閘嘅阿叔好mean，同慘被DQ嘅跑手講：「恭喜你哋中左頭獎，可以上巴士」

打氣補給篇

1. 今年有 Live Tracking，跑手嘅親友可以跟住搵位打氣，時間幾準，呢個抵讚 (更新：亦有網友留言話唔係太準)
2. 完賽無雪梨，跑完好似爭咗啲嘢咁……
3. 今年啲蕉夠晒熟
4. 汀九橋，一巴士司機同跑手打氣，話：「大家咪諗住上我部車呀！」
5. 出西隧口上天橋後，某大台記者喺賽道拉住跑手扑咪做訪問
6. 完賽後派嘅朱古力變細咗好多

大家仲有咩補充？歡迎 Facebook 留言分享！