為支國旗 中國選手蘇州馬失金

呢位路人乙 (黑衣)，成功將國旗送到何引麗手中。

星期日 (十一月十八日) 舉行嘅蘇州 (太湖) 馬拉松，出現戲劇性一幕。現年30歲的大陸女子馬拉松選手何引麗，同埃塞俄比亞選手德米塞，於最後幾百米鬥得難分難解，互有領先。

就喺呢個時間，唔知係邊到，跑出一位路人甲，並向何引麗遞上五星紅旗，何引麗唔理佢，並加快腳步放甩路人甲。點知之後又衝出一位路人乙，佢成功將國旗交畀何引麗，結果何引麗拎住支國旗，跑兩步覺得唔對路，就將國旗丟喺路邊。而呢個時候，埃塞俄亞比選手趁機加速，衝向終點。何引麗食塵，最後只能屈居亞軍。

跑唔掂，被迫被國旗隨手丟埋一邊。

----- 廣告 Ad -----

領獎時何引麗終於有支國旗披上身，不過企唔到喺凸台最高位。

失去冠軍嘅何引麗，非但沒有怪責遞國旗畀佢嘅民眾，佢仲要因為亂丟國旗一事向公眾道歉，話自己當時膊頭彊硬，只係甩手跌咗支旗啫。

不過，咁都唔算最荒謬。當網民質疑比賽大會何以容許路人甲乙丙丁衝入賽道干擾選手之制，主辦單位喺星期一 (11月19日) 公開回應，話「比賽中前三名的中國選手，均要身披國旗衝向終點。」

網上亦流傳一份大會嘅規定，裏面講到:

「馬拉松衝刺前約200米，準備4號國旗兩面，設立專人等候中國籍領跑選手，將國旗遞給選手，請選手身披國旗或雙手高舉國旗衝過終點線。」

即係話，披國旗緊要過爭冠軍。完。

(星期一21:30更新：中央電視台旗下央視網發表評論文章，指義工將「國旗硬塞給何引麗的行為相當不專業」，是「刷存在感的自私行為」，對何引麗的批評是「有道德綁架之嫌」。似乎為何引麗辯護。)

資料來源: 自由時報、新浪網

Fitz連結: https://fitz.hk/?p=107945