生命要有故事

孫立民 2021-06-02

字 Decrease font size. 字 Reset font size. 字 Increase font size.

「除掉睡眠，人一輩子約活二萬多天，不同的在於，你真的活二萬多天嗎? 還是僅僅生活了一天，卻重複了二萬多次?」(惶然錄 The Book of Disquiet – Fernando Pessoa 2017)

生命不應是大台一小時戲拖夠三個月的爛劇，亦不可能只有勁 chok 硬照的片刻。生命應該是套連續劇，每季都有精彩的、美麗的、甜的、酸的、苦的、感動的、驚喜的、難忘的故事情節，令人追看，教人回甘。

對，生命要有故事，要有打大佬的片段!

----- 廣告 Ad -----

31天的故事

這次要說的故事，卻要你重複31日去打一個大佬，大佬個朵好響，叫「每天跑步」，驚未?

參加了 The Green Race 的 MayDays Run Challenge (見《每天跑步有幾難?》)，在5月內每天跑30或60分鐘，作為廢佬會會長，自然選擇了30分鐘，覺得細細粒容易食，平時每星期都跑兩至三天，跑足七天冇乜大不了，後來至發現唔跑由自可，一跑玩大左!

以跑步為生活軸心

雖然你每天在工作間 hea 的時間足以寫本「罪與罰」，但要把一項30分鐘的活動安插在每天的 routine中，原來不是易事。5月份每天32度以上，日間只想躲在洞穴，跑步都留在黃昏或晚上進行，有時黃昏要工作或晚上有約會，會好煩惱安排跑步時段。有同學會返工之前跑，她說要5點幾起床，行去運動場要2K，待6:30開門即時進入。我的經驗是話跑30分鐘，但換衫、熱身、來回場地、拉筋、沖身、洗衫都折騰了不少時間。 (我係唔係唔夠man?)。

呢位同學每天好辛苦晨咁早去運動場跑

也有同學與狗怒跑，三嬸一叔的 May 姐最近多了一位新的家庭成員狗狗 Luca，她每天蹓狗時都帶牠衝60分鐘，Luca 肯定已成外星狗 (又或者覺得好伏)。另一位同學還幫他8歲大的囝囝報了親子組 (每天跑5分鐘)，每日帶著兩兄妹落街跑放電，小朋友覺得十分開心興奮，因他們不知冇幾耐之後他們會被報名跑10K、半馬了。總之大家都把跑步溶入了每天的生活中。

May 姐趁蹓狗時與 Luca 怒跑

爸爸 (右)是30分鐘組冠軍，囝囝囡囡自然要被報名參加跑步

----- 廣告 Ad -----

記得蔡東豪說過，職業運動員是以運動為整個人生的軸心，其他讀書、社交、拍拖、結婚、生仔、買樓等人生頭等大事都要讓路配合，這亦是職員運動員與業餘運動愛好者之間存在的鴻溝，後者是沒法跨越這鴻溝。31天中淺嘗以跑步為生活軸心的滋味，開始原諒自己抽唔到時間陪阿仔傾偈或做點家務。

打大佬

第二要克服的是疲累和傷痛，自從發現金屬都有疲勞，覺得攰唔去跑步係好合理的事。4月中我拗柴，隻腳腫到唔見左隻眼，養傷冇跑個多星期。5月1日落場跑番，拗柴位 complain 我未好番晒去跑，跟住小腿都嬲嬲，拿住拿住痛，一連數天都係咁，間中膝頭都會加入抗議。捱完30分鐘，好懷疑人生，半退休了，都唔俾好日子我過，算點!

其實故事中真正要打的大佬是「重複」。辛苦一天半 day 冇問題，捱幾日都忍你，但要持續31天同一個冇乜感情、想起都反白眼喘晒氣令人心情一沉的活動相處，每天跑完已經熱爆攰透，但想起明天又要輪迴再跑 (5月大，仲要有31日)，真心崩潰，比每天見到方丈更難受。前文寫過21天會養成習慣，要感情麻木唔知要幾耐!

5月每天都熱爆，同學都變了肯亞人

人貴自high

31天如何渡過? 點樣令自己有落街跑的意志? 第一是靠自 high，當睇住個排名榜，一開始可能其他人還未認真參與，我有幸排在前列位置，心中產生了一團火，好想 keep 到這個位置，雖然不是第一第二位，只是某個足以自 high 的位置。跑步不是我的戰場，身負5、6把年紀和1個肚腩，有呢個位置足以耀武揚威了。一點點虛榮，可以是堅持的動力，也可以是倫敦金騙局，anyway，促使我每天都落街跑，係喪跑 (雖然只是生理和心理的感覺)。

苦主大聯盟發揮力量

第二是成立了苦主大聯盟。跑班約有13位同學參加了這個 challenge，開了個群組分享資訊，有快腳有慢腳，由20+到60+。最重要功能是圍爐吐苦，差不多每天都有同學說:

「今晚收9點，仲未跑，點算呀!」
「我今日打第二針，又攰又發燒，可唔可以俾我停賽一日?」
「今日M訪，好唔舒服，我要照顧佢嘅感受。」
「攰到趴街，好苦惱餘下兩日30mins點跑」
「阿姨，我唔想再努力!」
「你俾我瞓啦，好唔好?」
「喂呀，出面落緊雨!」
「喂呀，出面曬爆人!」

懷疑人生中

結果，佢地全部都落左街跑! 有一個同學試過太夜，係屋企跑，好匪夷所思。當圍繞你周遭都是一班 crazy 及 abnormal 的人，真係諗唔到藉口 hea 一次，斷跑一日會感到十分樣衰。我常常反思，遇上呢班咁有目標毅力的同學，生命會唔會太豐盛了點?

苦唔怕捱，但唔好要我一個人捱。(成條街所有車都被抄牌，與成條街得我架車被抄牌，痛苦程度相差十二萬倍)。Friend 除了用嚟互相呃like，更重要的是 I know that feel bro 的慰藉和鼓勵，令你有力量走下去。

----- 廣告 Ad -----

此女子同時是60分鐘組及400K冠軍，crazy and abnormal

被當成騙子

因為寫過前文《每天跑步有幾難?》，同學當左係我煽惑他人煽惑作出公眾參與 challenge，當他們跑到懷疑人生的日子，就會尋找元兇，想知道係邊個煽惑他們參加? 有女同學說當初錯信了我話30分鐘容易入口，又什麼每天跑步有槓桿效果高回報等，原來都是糖衣陷阱，她在群組內寫:

雖然有一種幸福是被女人怨恨受騙，但我自己都是苦主，現正掙扎中。其實這位女同學好正能量，她不是有跑步習慣的人，更不是快腳，要她每天跑30分鐘，比其仔人辛苦得多，但她自己可以激勵自己堅持下去，反而為其他苦主給力!

劫後魚生飯

一生人中我未曾試過咁思念5月31日，希望它盡快到臨，因為我可以不再努力了。終於來到完結的一天，這群經歷了31天艱苦奮鬥的戰友，相約在鰂魚涌一所日本餐廳，吃一頓「劫後魚生飯」，互相慰問和擁抱一下，悲壯中又帶一點溫暖。大家吃著魚生，拿著梅酒 cheer，盡吐慘痛經歷，一片劫後餘生災難片氣氛。但後期竟然隱約聽到隣枱幾位女同學在密密傾，又計劃6月組隊參加什麼 Everesting Challenge、百峰行、777怒什麼……，她們都是無可救藥了!