[逆走100] Sub 17完成 Supporter是我的力量

第三個100km了，逆走麥徑100
完成時間：16小時52分鐘

今次能夠做到咁好時間自己都估唔到，一開始諗住目標20小時，plan都寫好晒。能夠做到咁好時間我諗主要係因為月頭既 translantau，多左經歷之餘，今次仲少左幾百米爬升，可以講係易好多。

圖: Leung Pui Sun

第二一定係要多謝 supporter，雖然冇食到準備好既野 (要怪就怪自己計錯數應該唔停畢架山 checkpoint 直接落獅子亭 support 全程最期待就係果碗好好食既鴻福堂熱粥，冇得食真係好 sad 因爲一黎 cp 食左野，食唔落，二黎又唔想再停多10分鐘食野)。

除左中段既獅子亭，仲有 HNR KK 喺中後段水浪窩幫我按腳，諗番起真係覺得自己好幸福好似 F1 入維修站咁，一黎到就幫我除背囊拎 pole，幫我拎杯麵，朱古力鹽糖等等，我就一路食野一路講邊度痛，KK即刻幫我搽按摩膏，又噴防抽筋，成個站剩係停左8分鐘就重新上路，成個感覺喚燃一新，對腳好似新既一樣。

今次真係做到平路落斜跑足全程，去到西灣山都諗住應該輕輕鬆鬆都可以17個半鐘掛，點知遇到一位 Andy 師兄話一齊追17啦 (講緊果刻落緊西灣山我地兩個都一步步慢慢落…你叫我跑6分披…)，落到最後一個 cp 冇參賽者，義工都趕我地走，叫我地加油追17，痴線架本黎諗住半行半跑輕鬆完賽，你地啲熱血搞到我都唔好意思行番去…最終用57分跑完東霸10K我真係覺得自己好勁。雖然有一刻諗過對腳會唔會頂唔住，個膝頭第時會幾痛，但趕時間都冇唔理得咁多，到臨尾500米見到康師父真係估你唔到，陪我5分披咁跑番終點! 真係好熱血，好開心!

Btw 第一屆既逆走100真心覺得搞得超好，每個cp有冰凍可樂! (要知道凍同唔凍差幾遠!)，好多 cp 都有杯麵，終點仲有咖哩魚蛋，燒賣，仲有雞蛋腐竹糖水!!! 仲要係好食既! 唔係hea整就算，仲有杯麵，咖啡，熱茶，冰凍可樂啤酒，同埋野食非常足夠，個個有得食。真心非常欣賞 #RebelWalker 大會同各位工作人員!

最後多謝第一次做 support 既啊Pi幫我準備左咁多野，知你地辛苦，我突登唔食留番比你地食架啲粥~

與隊友徐匯宗 (右)

Fitz 文章連結: https://fitz.hk/?p=90066