[運動科學] 跑得快必殺技: 微笑

Eliud Kipchoge 笑住跑，原來真係會為佢帶來好成績。

上年5月，Eliud Kipchoge 喺 #breaking2 挑戰全馬2小時大關，雖然最後失敗，但沿途尤其是末段，都見到他展露笑容。Kipchoge 甚至喺之後記者會話：「希望笑容可以帶我快啲返到終點。」此話當真? 最近有研究就發現，原來呢番說話真係有科學根據。

《紐約時報》最近引述咗北愛爾蘭同威爾斯大學共同研究嘅學術報告，話跑步時面露笑容，可更有效運作體力。研究團隊搵咗24位男女，進行一系列研究，最後發現：

跑步時緊皺眉頭，可顯示決心，但對提升表現沒有明顯效果
跑步時微笑，會達到較佳表現，根據統計，笑容可令跑步效率* (Running Economy) 提高達2.78％

Dr Noel Brick (右)

負責研究嘅教授 Dr Noel Brick 認為，運動時微笑有助肌肉放鬆，從而提升跑步效率，但如果笑容造作或僵硬，是不能達到上述效果嘅! Dr Brick 強調，由心出發嘅真誠嘅笑容先係關鍵，佢建議最好喺比賽末段先使出呢招，而且唔好連續微笑，相隔30秒笑一笑會更好! 呢個相信亦係 Kipchoge 喺 #Breaking2 嘅策略，你覺得佢笑得夠唔夠真誠?

----- 廣告 Ad -----

*「跑步效率」係用來評估人喺低於最大強度嘅跑步過程中，每跑一步所消耗氧氣量嘅效率。喺跑速相同情況下，有人消耗較少能量，亦即跑步經濟性較高，會比其他人跑得更快更持久

資料來源：紐約時報

Fitz 編輯部

我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。