睇見眼火爆，成大抽葡萄，怪獸你就好
男人的浪漫，除了豆腐火腩飯和自彈自唱李香蘭 (夜雨凍，雨點透射…..，OKOK唔唱) 之外，還可以是與競爭對手衝線後來個深情擁抱、為累極躺下來的隊友溫柔地餵水、等了良久為向衝線的香港代表遞上枝區旗、對亡母的思念和虧欠流下男兒淚…..，再加上粗獷的外型，浪漫x 3。
阿歹與KC，衝線後情深的擁抱，唔臭嘅咩
粗獷外型的佬是34歲阿歹，謝覺偉，一個黑黑實實，剷個平頭裝，留有小鬍子的中佬。我同阿歹係深水埗運動場，一齊回望這個佬34年來由傑志足球隊跑到上山的路，仲係愈走愈快。
佢有幾快?
「係廣州跑左一隻馬，2:40:12。」
「嘩好快。」我例湯例水俾反應。
「跑完之後我睇番時間，跟住我攞左條大毛巾，包住個頭係度喊。就係爭個12秒破唔到2:40」好明顯我俾錯左反應。
不過去年渣馬阿歹終於跑2:39:18，攞左一千元番屋企俾老婆，好開心。相信今年謝太應該有10倍咁開心。
----- 廣告 Ad -----
阿歹近年冒起，山界年資唔算長，第一場山賽是2019年 Salomon TTTHK Challenge 40km，以04:20完賽，力克烏克蘭和法國選手奪全場冠軍。他在今年的紫崗挑戰賽 (28K) 和逆之男 (18K)都得全場總冠軍。
第一場山賽，已經To The Top
最令人津津樂道自然是今年9月的「香港山路錦標賽2022」50K，爭奪代表香港出戰泰國的越野世錦賽，他與 KC 和怪獸一齊衝線 (見KC的路 – Follow Your Heart)，分不出高下，猜猜誰是第三名在 FB 洗板數天。最終他能夠代表香港參加世錦賽40K，以3:58衝線，全場第49位，亞洲最快，前面全是歐美及澳洲的跑手。
KC、怪獸、阿歹一齊衝向終點，必入香港越野跑的歷史檔案
少年迷路，轉左好多彎都未到
阿歹條路由足球開始，他是學界足球精英，16歲加入傑志青年軍，一年後上到甲組，wow，傑志喎，不過成年坐係冷冰冰的後備席，齋睇，冇得落場。
----- 廣告 Ad -----
「我覺得自己冇乜價值，有點灰，加上好少錢，大個啦，唔可以仲要屋企人負擔。」其實當時他只不過18歲。
少年阿歹，連扭幾個，間條衫果個呀
「身邊好多朋友都做晒嘢，你每個月只得果幾千蚊，有時佢地叫我出去玩，我話唔啦，聽朝要練波，唯有咁講。」
「好失意，由18歲到26歲我都冇做運動。讀書唔叻，條路好窄。做下運輸、sales、後來做裝修。反而做左三行至開始番跑步。」
「點解? 照計冇乜關係，係唔係你之前踢波都操開跑步?」
「其實踢開波啲人都唔鍾意跑步。」我又自作聰明多一次。
「咁點解你會有動力keep住跑?」
阿歹開始細訴他生命中遇上的兩個女人和一個男人。
母親 – 一生的牽掛 永遠的力量
「媽咪在我29歲時去世，果時我跑馬的時間已經做到2:40，我諗我而家有嘅野、稍稍有一樣嘢會比部份人強一點的，其實都係佢俾我。
媽咪患有病毒性腦炎，懷住我的時候，醫生說如果繼續懷孕到BB出世，會對身體極不利，而且當時家庭已有兩個家姐和一個阿哥，四周圍的人，包括阿爸阿婆親戚都極力勸媽咪落左去，況且媽咪果時35、36歲，屬高齡產婦，高風險，但佢一意孤行，堅持帶我嚟呢個世界。
阿歹生命中的兩個女人，是牽掛也是力量
結果由我讀幼稚園開始，媽咪一直要卧床，不能行動，直至佢離世那天。後期更神智不清，連我都唔認得，叫唔出我個名。佢為左生我至會承受呢啲痛苦同折磨，呢條刺一世都在我心中。每當跑步看著天空，見到夕陽，我都諗起媽咪………」阿歹開始聲音顫抖，雙手掩眼。
----- 廣告 Ad -----
「我係泰國跑緊世錦賽期間，我喊左3次，想起媽咪如果見到我穿起香港隊的跑衣，代表香港參加比賽會係點…….」阿歹已說不下去。
阿歹在地上力拚，母親在天上微笑
「我係屋企好少講呢啲事情同感受，講起我一定喊，但我唔想俾佢地見到我喊。」
「雖然媽咪冇機會見到，但我用心去做，因為佢永遠係我裡面。」
母親，是阿歹一生的牽掛，永遠的力量!
太太 – 唔反對當支持
「你唔做三行，走去做教練，花咁多時間跑步，老老實實，你知唔知太太心底點睇你，係人生中轉左個咁大嘅彎?」
「我係IG都分享過，其實我冇聽過太太對我嘅支持，但至少佢冇反對!」
「人地唔反對，你就當支持，咁鬼正面?」
「其實佢開頭係有啲擔心，佢問，有冇錢架? 你搞唔搞得掂呀? 夠唔夠呀你? 做男人緊係答話掂呀，OK呀，唔洗擔心。」
「最重要係佢見到我開心過以前好多，以前我成日黑口黑面，唔出聲，殺死人咁。佢而家見到我日間去練跑同教班，返到屋企係笑嘅，開心嘅。」
你睇見痛苦？我睇見幸福囉
「佢知我冇乜朋友，但而家好多跑班學生變左我嘅朋友，係跑界越野界將我嘅世界擴闊左好多，同以前真係好唔同，所以佢都開心。」
「我同佢講趁而家我有能力嘅時候就要去做，如果到我40歲時，想做時已經做唔到，佢就話你想做咪去做囉!」
----- 廣告 Ad -----
唔好覺得老婆說來雲淡風輕，阿歹，呢啲堅係百分百嘅支持!
Sammy – 幫我自閉解鎖
「我係一次私房賽認識左 Sammy (Kolor主音歌手)，佢想搞個跑會玩下，踫啱我剛剛考左個美國田徑教練證書，我覺得係一個機會試下做教練，另闖一條未試過嘅路。而且裝修的工作也不太穩定。我問過太太，佢話你咪去試下。
於是我地係今年5月成立了「頑張」跑會 (日文有加油的意思，根據維基辭典，「頑張」也有堅持己見、堅持渴望的意思，可能好反映到 Sammy 同阿歹的性格)，不收費用，歡迎想接觸跑步的朋友嘗試一班人跑步的樂趣。最多時候有八十多位，active的也有三、四十個，算唔錯的發展。有些同學一開始行快少少都覺得辛苦，到完成10K、半馬、全馬，見證佢地成長、進步、奮鬥，好開心同好有成功感。」
頑張跑班，唔係個個都有紋身，絕大部份個樣都好善良
「Sammy 對你有乜野改變?」
「唔係識到 Sammy，唔會有而家嘅阿歹。我當 Sammy 係我阿哥，佢同我阿哥一樣年紀。我係一個好孤癖的人，朋友聚會的邀請我都會say no，冇乜朋友，收收埋埋，同人傾偈一句起兩句止。」在我前面的阿歹絕對不是。
Sammy 把阿歹帶進一個遼闊的世界
「我同 Sammy 講頭幾堂我唔講野，所以佢向啲同學講，你地有嘢就要問教練，佢唔係好講嘢。同學真係問，我開始同佢地溝通，完左一齊食飯，吹水，成個人開朗左。其實開頭我仍然有啲唔自在，唔係咁享受，諗起又要食飯又要見到佢地要諗嘢講，但到後來大家已經無所不談，包括失戀、個人感受等等。我學識對人要敏感，要主動關心人，都係一個教練必須具備的條件。」
Sammy 幫阿歹打開左一道閘，解鎖左一個叫自我封鎖，帶他進入一個遼闊的人際世界。
阿歹 – 重新裝修生命
「26歲我結婚，我食左十幾年煙，覺得自己好肥，開始諗起要戒煙。我去度蜜月時帶左3條煙，同老婆講，我食埋呢3條煙，我從此唔再食。」
「佢信?」
「我用結果遊說左佢，我真係冇再食」
「你係意志力好強的人?」
「係，我係一個唔服輸的人，我第一次跑半馬，1小時50幾分，喘晒氣，撞晒牆，唔掂，同自己講唔可以再食落下。」
阿歹的戒煙之路說來輕描淡寫，其實背後是一份上天的禮物 – 意志。
阿歹未來的目標是路跑同越野雙線並行，明年3月有渣馬和東馬，也想有機會參加國際性的越野跑，例如 UTMB 和 CCC 等，他說目前最有優勢的距離都是70K或以下，但會嘗試去到100K以上的賽事。
他最近成立了屬於他自己的跑班 (叫「無名」)，目前人數雖然唔算多，但這是他希望做和喜歡做的事情，長路漫漫，生活迫人，但艱險我奮進，困乏我多情。喜歡哭的阿歹，絕對是個多情的人。
「我相信只要肯擺時間俾同動力去做一件事，一定唔會差，點解見唔到成績? 只因為你未夠想做。」
阿歹努力呀，轉個彎就到
阿歹條路絕不平坦，好 technical，彎彎曲曲，唔係 runnable，但憑藉遺傳自父母親的一份優質意志，加上遇到幾位天使，雖然要上山落坡，阿歹展現了他細膩的腳法和堅強的鬥心，盤扭越過難關，朝著龍門衝去，希望他最終取得 score，看見一位慈祥的女人在天上的微笑!
彩蛋
「你點解叫阿歹? 個名點嚟?」
「原本啲 friend 因為我跑得快，叫我做大大，簡單啲就咁叫阿大。後來遇上 Sammy 同跑班同學，成日話我迫害佢地跑，於是改左叫我做阿歹，表示我唔係好人嚟，仲好鬼惡死。咁我又覺得呢個名OK型。」
「咁跟我學跑步的，都會叫歹徒!」
PS
原來這是我第60篇在 Fitz 寫的稿，像跑手回頭看 Strava 才知自己已跑了那麼多里數，咀角或多或少有啲啲微微向上。最近睇林日曦一篇文章，他說電台流傳一個笑話：好多人應徵 DJ 時被問到投考原因? 他們都說因為好鍾意講野，其實電台唔會因為你鍾意說話而請你，喜歡做節目主持人因為有好多意念和感覺想講俾人聽。我真係咁多嘢想講咩? 會唔會係腦霧?
