[馬高教練專訪] 男神的正面人生

續上篇《[馬高教練專訪] 同你講心的魔鬼》

上回講馬高SIR自己用咩態度跑步，今次要講佢嘅教練生涯。馬高教練嘅教練資歷絕對唔嘢小：

• 香港消防處體能教練
• 香港康文署長跑教練
• RunOurCity 街跑教練
• 威爾斯親王醫院中風及老人教練
• Polar master coach
• 吳師傅大本營教練

態度決定一切
跟馬高SIR講跑步，佢真係絕少同你講咩抬腿、呼吸、動作，反而從佢口中，發現佢好重視點樣建立一個跑者嘅態度。呢個態度，唔只係喺賽場上，亦伸延至生活、做人。

而咁多項教練工作，對馬高教練嚟講最深印象，原來並唔係幫跑步老手突破成績，亦唔係將消防員操到fit一fit，而係帶一班年輕人落社區跑步。

「嗰個係『全城街馬』嘅活動，我發揮嘅空間比較大。嗰陣中環有幾棵樹無故被斬斷，我就帶住班中學生專登跑經嗰到，同大家了解呢件事。希望大家喺練跑之餘，仲可以思考下多方面嘅問題。」

講到教學，馬高SIR雖然仍屬年輕一輩 (比起筆者而言)，但某幾方面竟然有啲老氣橫秋：

「每個學生都有唔同嘅能力，大家嚟學嘢，又會有唔同嘅目的。我嘅責任，就係用我嘅方法，教到佢哋可以達到佢哋嚟嘅目的。其中最重要，就係教曉大家正確目標。而我哋，就會將所有最好嘅嘢教畀學生。」

係咩？傳統中國人嘅師徒制度，有所謂「教識徒弟無師父」，馬高教練會唔會留一手先？

「邊有得留丫，而家網絡咁發達，咩都可以搵到，無得保留呀！」

馬高教練補充，做教練最重要係點樣鼓勵學員。難怪佢好重視教授學員嘅態度，因為呢啲嘢Google無得教，只能透人與人之間嘅關係，去互相影響。

而筆者相信，馬高教練對別人嘅關懷，足以令生命影響生命，而佢嘅學生必定得益不少。

暗中跑步
講到關懷別人，馬高教練其中一項義務工作，就係擔任視障跑者嘅領跑員。亦因為佢擔任了領跑員，所以開始了解視障人士嘅問題。

「喺呢個工作，我真係得到唔少正面能量，你會珍惜你而家擁有嘅嘢。」

馬高教練話，亦因為呢個工作，令佢更明視障人士喺日常生活嘅艱難，而我哋畀佢哋嘅支援其實真係唔足夠。

「你試下闔埋對眼跑步，你一定會覺得好驚。我反而諗，我哋所謂嘅正常人，對外界嘅信任，一定比起視障人士少！咁點解我哋對外間咁無信心呢？」

所以馬高SIR多次強調，做人要正面啲，亦唔好太計較結果。

呢個就係教練話跑步只著重過程，而並非追求時間嘅想法，同出一轍。

後話之一：
整個訪問筆者確實得益不少。同馬高教練嘅傾談，真係完全Feel到咩係正能量。當時嘅反應，就好似廟街嘅街坊，食完瀨尿牛丸一樣，個人開心咗，睇嘢靚咗，連身體都精神咗！與此同時，我終於明白咩係「堅持」。「堅持」就好似男人隨身袋入面包紙巾，平時唔用亂咁放，到打完個吃啑要搵嘢抹鼻，係永遠唔會搵到！態度決定一切，平時唔「堅持」，落到賽場就會輕言放棄。

師父，明白了。

後話之二：男神的歸宿
做完訪問，15分鐘之後，發覺自己問漏嘢！

大家死心了吧。

更多：
Fitz.hk Facebook專頁
[專訪馬高教練] 同你講心的魔鬼
[郁民教室] 新手10K訓練計劃
我的十大外國名人跑步女神
[郁民教室] 運動場踏出「第一步」
Fitz Running 跑步