今次真名符其實快閃之旅，星期五夜晚凌晨機飛過去，到左羽田機場已經係5點鬆d，再坐七點到巴士去富士山河口湖。基本喺機上完全訓下醒下，唯有喺巴士上果兩粒幾鐘盡量快補眠。之後幾條友喺酒店放底行李，喺附近行下影下相，就去前夜祭會場。真係奧賣吉，會場門口已經聞到加碳情侶陣除《Pizza與Pasta》，兩個月前東馬先食足三日九餐，見到個胃已經巴黎鐵塔反轉再反轉，但都冇法，唔食第二日一定冇力到 hihi。最癲既係班日本人全部係咁隊啤，大哥大姐你地聽日好似跑最少都71k，仲隊？唯有令自己好訓少少我都飲左半杯～都冇。成晚其實地唔知佢地up 乜春，佢地企起身痴牙士，我地咪照跟，係度揮多士，咪照跟。食完渣渣林返酒店，求其淋下個身就未夠9點上床訓，真係小學時都冇試過咁早。
訓左四個零鐘，點半幾條友喪屍咁爬起身換衫去食宵夜（早餐？）。食完坐兩點十巴士去會場拎 bib。但真係好忟水。因為架車仲要接埋其餘果一兩間酒店既人，落車已經成3點幾，拎完 bib 準備兩個寄存點既野都係得半粒鐘時間，賴住屎咁上線。
我，Kat 姐 Eric : 五湖118 K
小鳯 Peter: 四湖100K
Karen: 三湖71K
Amy: ?湖?K
五湖最早起步，四點好Q凍，得三度呀，睇天氣預報又會升溫，局住背心加薄風褸長tight手袖，仲有對暖手套，但真係頂唔順。日本仔真係唔係善男信女咁款，個個都高手高手高高手既樣。同 Kat 姐預定好策略，6分鐘1k，咁到後邊drop 都唔駛死得太快，仲有就係slip 到少少上前諗住唔駛咁塞人蝕左時間，呢次爭分奪秒，少一秒都死人冧樓。
----- 廣告 Ad -----
前邊既馬匹已經準備就緒，一開閘呢。。。
次次又係例牌跑個圈先走出運動場，條街冇街燈，烏燈黑火，要靠其他人頭燈去睇路。一黎就上段斜，再落斜，好似幾爽咁喎。跑左一粒鐘天開始光，先兜左去最大個湖～山中湖～跑左14K先到，沿住湖邊都有人緩步跑。跑完山中湖其實要路經返起點出邊，所以之前落斜果d ，嘿嘿有排找數，而且返到去時已經係跑左40K，但已經chur左我好多體力，太多上落暗斜陰乾晒。好在每隔3公里 或5 公里都會有cp水站同食物提供，奈何 Kat 姐頭60 k 真係快到癲，同佢長期保持百零米距離，玩山真係唔同d，總之拍住跑互相鼓勵就會易捱好多，邊個先到cp 就先等，但休息唔超過兩分鐘就起行，想拉拉條脾隙都冇時間。
之後跑左半邊河口湖，到左56K 第一個寄存行李位，撞到Eric，同時即刻袋返4包gel 保命先。出左Cp 就上果條幾百米斜，同舊山頂道一樣咁甘。之後跑過西湖、精進湖、都keep 住有暗斜上落斜，呢個時候我終於明白點解對腳Q攰同重，腦入邊彈左郭承基教練 Winter 把聲叫「擺手，擺手呀！！」（心諗點解老遠都唔放過我）就係我頭果段冇擺手全部用晒腳力去跑，蝕卓左。之後果50k 我都keep 住擺手跑，對腳輕返晒。（佢把聲係不斷loop 左咁多K）Kat 姐問我係咪食左禁藥
到左72k，我地同跑100k 既暫朋友暫時分開，要跑去最後一個湖本栖湖。果條長長既斜真係落得好爽丫丫，喺75k 第二個行李位又再入gel 同放低件風褸，因為有太陽同埋溫度高返d，件野好影響我流暢而優美既跑姿但我發覺係一個極極極錯誤既決定（稍後提及）
----- 廣告 Ad -----
18k就係多左跑呢個湖，最值得既係，只有跑呢度先見到富士山個全景。其實之前果日好多雲完全睇唔到，點知跑果時咁好天仲望得好清楚
呢18k人數少左好多，cp 水站既野食都少一大截，偏偏呢個時候個肚空空地，局住隊幾粒朱古力頂住檔。
睇到個景，邊跑邊唱下富士山下
「前塵硬化像石頭 隨緣地拋下便逃走
我絕不罕有 往街裡繞過一周
我便化烏有」
歸家需要幾里路誰能預算…..
唱到呢句都咪話唔頂癮
兜完本栖湖返到剛剛第二個行李點，就向返終點方向走，跑返頭先爽翻天果條大長斜去翻同100k 分叉點位置，終於完左91k，個心開始由28k 倒數。長期冇出現既心理關口竟然走左出黎，因為跑馬多左，好耐冇再出現呢個問題。心諗點解自己要咁攞苦黎辛，好想跳船唔跑，但見到身邊經常喺你左右出現既跑手，就會繼續頂埋佢。對腳雖然入左自動跑步模式，但真係好差攰，同好眼訓。
其實沿途都好多櫻花樹，最後半邊河口湖係最多櫻花，同埋……到呢度係會跑經我地酒店出邊
好想返上房訓呀
好辛苦去到最後一個補給點113k，之後就要上4K 斜。Kat 姐冇補給就先行一步，而我到呢個位莫講話jog，連行快兩步上斜都氣端。但 Kat 姐行上斜好快唔見左人
----- 廣告 Ad -----
同埋太陽開始落山，著住背心加手袖頂唔到凍，早知唔應該喺第二個行李位放低件風褸，唯有用盡奶力加快兩步行，足足凍左2k。果下我小左聲，仲咩會整個運動場喺山上邊架？高原訓練咩
而我都希望 Kat 姐快d 返到終點拎行李，因為真係凍多秒都好易出事。
另外最有趣既係 117k 會有個 check point 比你踏過，究竟用意何在?
最後1k日本仔算有人性，全程落斜。返到運動場，已經好多人企喺度凍住同自己打氣，有種我已經死返黎既感覺
喺終點見 Kat 姐同 Amy 已經等緊我，辛苦佢兩位凍住等
沖線時真係喊左少少，因為真係好辛苦
最後完成時間14:37:23 ，對比我第一次自隊116k 快左7個鐘，算對自己有交代
呢鑊超馬對我黎講對我意義重大，自我內在對話少不免，跑果時完全勾起返晒初次跑馬拉松練習同比賽時既感覺。經歷期待》辛苦》跳船》堅持》完成果種喜悅，這些經驗用多多錢都買唔到。就好似跑到80多公里，如果唔堅持落去，根本唔會見到富士山咁靚既景色，果刻感受最深，身所有疼痛全消（果刻）但也很值得。
人生如此，堅持唔一定可以見到你想要既結果，但唔頂落去，就乜都唔會見到。
最後多謝 Kat 姐一齊拍住頂落去，唔係既可能返終點時間好鬼忟水
多謝小鳳一齊老連咁早去會場，明明條友晏過我地起步
多謝Amy 全能既安排同等左我地幾個成日同影相
----- 廣告 Ad -----
從來冇諗過自己完唔到，只要敢想就有可能！
<Your success in life is limited by your own imagination and hardworking>
多謝埋我對腳，容許我著對 adios 薄鞋強姦佢走咁遠，真正帶我邊走邊看風景。
仲有，短期內都唔想再見到d 梅……食足廿九個CP……..
梅
附：富士山五湖超馬 賽道
路線圖 (按圖放大)
更多：
Fitz.hk Facebook專頁
[出走到天涯海角] 悉尼 Royal Coast Track
[怯~你就輸了!] 一對踏上大賽頒獎台的地球人
沙灘@Fitz.hk
Fitz Running 跑步
