[渣馬半馬2017] 堅持總會跑出態度來

記得今年一月街馬第一次跑畢半馬興高采烈同母親大人講「我三小時內跑完半馬呀，叻唔叻?」，而我相信我母親應該唔知咩係半馬，我就補一句「姐係跑21公里啊」，最後佢答我「又無獎既，跑得咁辛苦做咩」，我真係好似 ice bucket challenge 咁既樣，哈哈哈。某程度上母親大人又其實講得岩，跑馬拉松同毅行一樣係一種自虐。不過，我係個任性的女孩，明知辛苦都繼續跑只為遇見更強既自己。見到 Adidas 既 hashtag #堅持係一種任性 真是講得好，我都係一個堅持的女孩子啫。

跑前既一個星期，氣管未完全好返，都諗過有可能PB不成功。賽前最後一跑跟 HNR 跑步團隊 作最後練習，發現自己條氣唔夠順。停跑但不停郁，轉去游水練下氣。哈哈。
渣馬日前夕，買定早餐，執定書包，扣好號碼布，檢查裝備(帽/防曬手袖/護膝)，整理playlist等，心情唔知點解有如去旅行般興奮。結果係得個「執」字，護膝、防曬手袖 check-in 左，臨上場戴耳筒開 playlist，無聲既！耳筒線壞左。無緊要，醒起同行一位唔聽歌跑步既朋友話，唔塞耳聽下周圍環境既聲都幾好，確實幾有趣。專程準備好獅子合唱團既歌，無聽到，有點可惜；預備左最激勵人心既詩歌無力時聽，都派不上用場，唯有跑完聽返，呵呵。
渣馬起步
由於無耳筒聽唔到自己 pacing，本身跟緊6分披朋友，但慢腳如我確實未操到呢個速度跑21K，跟跟下都係甩左。猶記得睇過文章有位師兄提過跟鬼妹跑，因為佢地 pacing 比較穩定，於是我開始找人跟，剛剛好聽到幾句韓文，oppa 們跑緊7分幾，非常好，跟佢地。

捱到傳說中既西隧口，西隧聞名已久，第一次跑過海，但呢一刻我已經無咩力保持興奮既心情，攰到要分裂一個人格一路同自己傾計「試下撐住唔好停，跑哂佢」、「今次要PB」……哈哈哈。

其實膝頭哥已經開始有小小痛，好想好想行，突然望到句打氣語句，好正好到肉，#唔撐到尾咁點解要開始。我又繼續同自己傾計「又岩喎~得既，撐埋佢，突破自己!」。

西隧果段大風到帽都吹甩，大風到唔跑會凍；出西隧後剩餘既路程似少還多，第一次跑無咩概念，叫做都認得D建築物估到自己響邊度，距離銅鑼灣有幾多個站咁。終於跑到熱熱鬧鬧既銅鑼灣大街，終點在望，淨返大約1K嘗試加快步速時間大約2H20Mins，PB都成功在望。
感激化身攝影師既 WL 認到小妹，Yeah!

感恩第一次渣馬半馬能夠堅持到最後，相信每一段未知既路，每一步都有保守，也不孤單，成績雖然是慢腳成績但PB到已經好滿足，步係要一步一步咁進既，當中必有引領。見證到自己既進步同毅力，係另一種既自我認識。雖然跑馬拉松沒有行山咁令我著迷，但過程中既滿足感亦令我唔會棄跑。繼續跑，跑出一種態度來。