剛過去嘅星期日，參加咗NB半馬，作為渣馬前嘅備戰。不過，隨著天氣突變，氣溫急降，沿途除咗要迎接一浪接一浪嘅上斜落斜外，仲要抵檔猶如八號風球嘅烈風。整個賽事可以說係苦戰，真係跑得好辛苦。
呢個時候，有隻鬣狗，唔係，係有位年輕人，將你當係水牛盯住你。
非洲草原有好多掠食動物，其中鬣狗最為殘酷。獅子，會以群體攻擊嘅方式，速戰速決去圍捕獵物。不過鬣狗，就利用佢嘅獨有嘅耐力，將動物驅趕，到動物體力不支，十幾隻鬣狗先至一湧而上，將獵物五馬分屍。
而我最深印象，就係陪阿囡睇BBC Earth，一隻比鬣狗大幾倍嘅水牛，畀6隻鬣狗追咗成五個鐘，最後都走唔出魔掌，坐喺草地上面任由宰割……
講返NB半馬啦。當時喺萬宜東壩畀大風吹到步履不穩，呢個時候有位後生仔，著住一套中學體育堂嘅運動裝，喺後面急步而上。佢之後喺我面前停低，再緩步而行。我心裏面同佢講：「少年，你咪衝動呀，仲有十幾公里呀！」
就喺呢個時候，少年對我微微笑，而我見佢放慢步，當然過佢頭，以好慢嘅均速繼續作戰啦。
如是者，我同呢位少年不斷相遇，我亦開始覺得自己似隻水牛，畀隻鬣狗追踪。到咗創興水上活動中心，我見有機會，就喺落斜時候發力狂奔，一心希望可以放離呢隻鬣狗。
----- 廣告 Ad -----
不過，唔夠兩公里，呢隻鬣狗又喺我後面跑上嚟，然後又停喺我前面，開始慢慢行。
我當時十分震驚：傳說中嘅「跑走法」真係名不虛傳！
就喺我繼續同大風、寒冷苦戰嘅情況，我仲要想盡辦法，去擺脫呢隻鬣狗。
少年嘅跑步服飾，真係好似圖中呢啲中學咁。漏咗講，佢仲係著住白色運動鞋。
到最後兩公里左右，希望可以兩個半小時內完賽。於是就忘記雙腳嘅痛苦，衝向去終點。
----- 廣告 Ad -----
到終點前嘅大斜路（即係麥徑一起點後）嘅一公里，我更以最快速度（唔好見笑，其實都係講緊五分鐘左右）跑落山。望住隻錶，仲差兩分鐘，睇嚟應該可以達到目標了。
就喺臨到終點50米左右，諗住喺攝影機前擺個靚pose影番張相，呢位少年竟然從後而上，越過我衝過終點，仲喺攝影機前擺個V字手勢！
水牛終於輸咗！呆呆地站喺終點線後，連香蕉都唔記得攞，一步一步行番去渡假營……
鬣狗與水牛的故事就此完結，無乜大教訓。水牛只係決意要喺呢大半個月畀心機努力操練咁上下囉……
更多：
Fitz.hk Facebook專頁
跑步是跟自己說話的好機會
中佬的祈禱 — 我要激戰!
Fitz Running 跑步
