越野山賽，我絕對係一個門外漢，長期只保持在門外看。人說玩山必須要對大山心存敬畏，我做到加零一，直情敬而遠之，大半生人賽過乜賽過物係未打過山賽。細細個時聽長輩講話 “欺山莫欺水”，膽小怕死嘅我二話不說落死命練好水性，練到叫做游得下唔容易浸死，山? 既然可以欺，遲啲先算啦!
歲月催人成為大叔同一個佬之後，愛上耐力運動，馬拉松三項鐵人海內外比賽參加過好多次，都仍然未玩過山賽，本港一位赫赫有名嘅教練曾經多次同我哋分享話: “ IRONMAN is nothing，100K山賽辛苦好多!” 佢唔講由自可，一聽嚇死咗，辛苦過 IRONMAN 226 喎? 點頂?
直至今年生日，同所有香港人一樣鬱悶咗十幾個月，忽發奇想俾幾個目標自己，其中一個就係要完成一次從來未試過嘅山賽，仲要係100公里山賽!
仲要係無練習之下就第一次打一個100公里山賽，HongKong100!
結果可想而知，36km拗柴鎩羽而歸，路跑跟跑山壓根兒係兩碼子事，兩種技巧，勇字當頭當然自取其咎，積極療傷之後再練幾課及向高人請教，重中之重係有一眾 MidageOn9 隊友 support 同陪行，最後終於完成咗第一個105公里山賽!
----- 廣告 Ad -----
局外人可能無辦法理解，點解要花咁多精力作賤自己 虐待自己嘅意志？其實好難解釋，因為只有鐘意玩呢類耐力運動嘅精神病患者至明白，受苦係長途比賽嘅吸引處之一，我繼續玩，係因為我想嘗試受苦嘅感覺同埋挑戰，If you want to do it，you can do it!
我記得蔡東豪先生講過 : 耐力運動引人入勝之處，係經歷呢啲脫力邊緣的時刻，會出現一場又一場平日唔會遇到嘅心靈角力，身體準備放棄，心靈死不肯放手，誰勝誰負，決定成敗! 的確係 True 到不得之了!
完成 HK100 之後，其中幾位上次未能完賽嘅隊友做咗一個非常熱血嘅決定，打多次！仲要係同上次相反，由尾打番上頭，兜督將軍由麥徑尾站打返上起點嘅 “逆走 100” ，而一班隊友又做咗個更熱血而好On9 嘅決定，一呼十幾應一齊陪佢打多次!
當你知道有人同行，已經構成強大嘅力量，孤單係跑者嘅死敵……well，for我哋呢類流流愁愁甩皮甩骨跑者 only 啫，高手，不在此列!
----- 廣告 Ad -----
如是者報名，練習，每個週末孖崗來回，進展到鰂魚涌小馬山孖崗來回，再到練針草帽……唔覺唔覺，要落塲比賽了!
起步前落咗兩日雨，但反而更好，烈日當空永遠係耐力比賽嘅死敵，落雨照跑嘅就要創造屬於自己嘅好天氣。起步無耐我哋已經忘記咗落雨，腳底習慣了濕嘅地面，皮膚習慣咗被雨打嘅感覺，身體發出熱量調節微冷嘅溫度，風褸唔夠幾分鐘就除埋，完全適應咗落雨嘅感覺。天氣係好係壞，的確由自己嘅心情控制，落雨天都可以係好天氣，而且反而更有利，氣溫低咗體力流失同水份消耗都無咁快，比要頂住太陽前進好太多嘞。唯一係雨水令到路上嘅山石比較濕滑，山林裏面嘅泥漿亦比較多，稍稍拖慢左進度。
今次好在有史上最好最機動性最貼心嘅 Support 團隊，站站有熱飯，次次有凍飲，體力可以盡快補充，一個 CP 又一個 CP 咁過，由晨曦打到黃昏，由深夜打到黎明，最後終於從如結界一般來回地獄又再折返人間嘅西灣山走出嚟，晨光清風之下向住東霸進發，興奮心情早已經將倦意趕到天腳底去，東霸到北潭涌一段居然仲可以間不中用六分頭披醒跑跑行行，到達終點一剎那由心度笑出嚟!
完賽後上磅，我輕咗4.5kg，但心境踏實，我居然可以幾個月內完成兩次100公里山賽，今次仲要 109 公里，最高興係大部份隊友都順利完賽，又一次一齊征服一個難關!
賽後抑鬱之後，好快又係同一個問題……..
Hi guys, what’s next?
